ಭಾರತದ ಡಿಜಿಟಲ್ ಲೋಕದಲ್ಲಿ ಸುನಾಮಿಯಂತೆ ಅಬ್ಬರಿಸಿ ಕೇವಲ ಐದೇ ದಿನಗಳಲ್ಲಿ ಕೋಟ್ಯಂತರ ಫಾಲೋವರ್ಸ್ ಗಳಿಸಿದ್ದ ಕಾಕ್ರೋಚ್ ಜನತಾ ಪಾರ್ಟಿ (CJP) ಈಗ ಭಾರೀ ವಿವಾದಕ್ಕೆ ಸಿಲುಕಿದೆ. ವ್ಯವಸ್ಥೆಯ ವಿರುದ್ಧದ ವ್ಯಂಗ್ಯ ಎನ್ನಲಾಗುತ್ತಿದ್ದ ಈ ಜಿರಲೆ ಪಡೆಯ ಹಿಂದೆ ನೆರೆರಾಷ್ಟ್ರ ಪಾಕಿಸ್ತಾನದ ಕೈವಾಡವಿದೆ ಎಂಬ ಶಾಕಿಂಗ್ ಅಂಶ ಈಗ ಬೆಳಕಿಗೆ ಬಂದಿದೆ.
ಐದು ದಿನಗಳಲ್ಲಿ 1.5 ಕೋಟಿ ಫಾಲೋವರ್ಸ್ ಗಳಿಸಿ ಬಿಜೆಪಿಯಂತಹ ದೊಡ್ಡ ಪಕ್ಷಗಳನ್ನೇ ದಂಗುಬಡಿಸಿದ್ದ ಈ ಪೇಜ್ ಅಸಲಿ ಮುಖವಾಡವನ್ನು ದೆಹಲಿಯ ಬಿಜೆಪಿ ನಾಯಕರೊಬ್ಬರು ಬಿಚ್ಚಿಟ್ಟಿದ್ದಾರೆ. ಸೋಷಿಯಲ್ ಮೀಡಿಯಾದಲ್ಲಿ ಹರಿದಾಡುತ್ತಿರುವ ಇನ್ಸೈಟ್ ಡೇಟಾ ಪ್ರಕಾರ ಈ ಪೇಜ್ ಗೆ ಇರುವ ಫಾಲೋವರ್ಸ್ ಸಂಖ್ಯೆಯಲ್ಲಿ ಭಾರತೀಯರಿಗಿಂತ ಪಾಕಿಸ್ತಾನದವರೇ ಅತಿ ಹೆಚ್ಚು ಎನ್ನುವುದು ದೃಢಪಟ್ಟಿದೆ.
ಯಾರಿದ್ದಾರೆ ಈ ಜಿರಲೆ ಪಡೆಯ ಹಿಂದೆ
ಬಿಡುಗಡೆಯಾಗಿರುವ ಅಂಕಿ ಅಂಶಗಳ ಪ್ರಕಾರ ಈ ಕಾಕ್ರೋಚ್ ಪಾರ್ಟಿಯನ್ನು ಫಾಲೋ ಮಾಡುತ್ತಿರುವವರಲ್ಲಿ ಶೇಕಡಾ 49 ರಷ್ಟು ಮಂದಿ ಪಾಕಿಸ್ತಾನದವರು. ಇನ್ನುಳಿದಂತೆ ಅಮೆರಿಕ ಶೇಕಡಾ 14, ಬಾಂಗ್ಲಾದೇಶ ಶೇಕಡಾ 14 ಹಾಗೂ ಭಾರತದ ಪಾಲು ಕೇವಲ ಶೇಕಡಾ 9 ರಷ್ಟಿದೆ. ಅಂದರೆ ಈ ಪೇಜ್ ಸೃಷ್ಟಿಸಿರುವ ಕ್ರೇಜ್ ನ ಶೇಕಡಾ 90 ರಷ್ಟು ಭಾಗ ವಿದೇಶಿ ಫಾಲೋವರ್ಸ್ ಗಳಿಂದ ಕೂಡಿದೆ. ಇದನ್ನು ನೋಡಿರುವ ಬಿಜೆಪಿ ನಾಯಕರು ಇದು ಕಾಕ್ರೋಚ್ ಪಾರ್ಟಿ ಅಲ್ಲ ಬದಲಾಗಿ ಪಾಕಿಸ್ತಾನ್ ಪಾರ್ಟಿ ಎಂದು ಗುಡುಗಿದ್ದಾರೆ.
ಬ್ಯಾನ್ ಆದ ಎಕ್ಸ್ ಖಾತೆ ಮತ್ತು ವಿದೇಶಿ ಬಾಟ್ಗಳ ಹಾವಳಿ
ಈಗಾಗಲೇ ಈ ಪಕ್ಷದ ಎಕ್ಸ್ (ಟ್ವಿಟರ್) ಖಾತೆಯನ್ನು ಭಾರತದಲ್ಲಿ ನಿಷೇಧಿಸಲಾಗಿದೆ. ಭಾರತದ ರಾಜಕೀಯ ಮತ್ತು ಸಮಾಜದಲ್ಲಿ ಗೊಂದಲ ಮೂಡಿಸಲು ಹಾಗೂ ಸೋಷಿಯಲ್ ಮೀಡಿಯಾ ಟ್ರೆಂಡ್ ಗಳನ್ನು ಹೈಜಾಕ್ ಮಾಡಲು ಪಾಕಿಸ್ತಾನದ ಬಾಟ್ಗಳು ಮತ್ತು ಫೇಕ್ ಅಕೌಂಟ್ಗಳನ್ನು ಬಳಸಲಾಗುತ್ತಿದೆ ಎಂಬ ಅನುಮಾನ ದಟ್ಟವಾಗಿದೆ. ಯಮುನಾ ನದಿ ತೀರದಲ್ಲಿ ಕಸ ಆಯ್ದು ಸ್ವಚ್ಛಗೊಳಿಸುವ ವಿಡಿಯೋಗಳ ಮೂಲಕ ಜನರ ಗಮನ ಸೆಳೆದಿದ್ದ ಈ ಪೇಜ್ ಈಗ ದೇಶದ ಭದ್ರತೆ ಮತ್ತು ಡಿಜಿಟಲ್ ವಾರ್ ಗೆ ಸಂಬಂಧಿಸಿದ ಗಂಭೀರ ಚರ್ಚೆಗೆ ಕಾರಣವಾಗಿದೆ.
ಒಟ್ಟಿನಲ್ಲಿ ಕೇವಲ ಜೋಕ್ ಅಥವಾ ಮೀಮ್ ಪೇಜ್ ಎಂದು ಭಾವಿಸಿದ್ದ ಈ ಜಿರಲೆ ಪಾರ್ಟಿಯ ಕಥೆ ಈಗ ಅಂತರಾಷ್ಟ್ರಿಯ ಪಿತೂರಿಯ ಆಯಾಮ ಪಡೆದುಕೊಂಡಿದೆ. ಭಾರತದ ಯುವಕರು ಇದನ್ನು ಹೊಸ ರಾಜಕೀಯ ಪರ್ಯಾಯ ಎಂದು ಸಂಭ್ರಮಿಸುತ್ತಿದ್ದರೆ ಮತ್ತೊಂದೆಡೆ ಶತ್ರು ರಾಷ್ಟ್ರದ ಫಾಲೋವರ್ಸ್ ಸಂಖ್ಯೆ ನೋಡಿ ದೇಶದ ನೆಟ್ಟಿಗರಲ್ಲಿ ಆತಂಕ ಮತ್ತು ಆಕ್ರೋಶ ಮೂಡಿದೆ. ಈ ಜಿರಲೆ ಪಡೆಯ ಅಸಲಿ ಉದ್ದೇಶವೇನು ಎಂಬುದು ಈಗ ತನಿಖೆಯ ವಿಷಯವಾಗಿದೆ.
