newsics.com/ನ್ಯೂಸಿಕ್ಸ್
ಭಾರತದಲ್ಲಿ ಬೇಸಿಗೆಯ ಕಾಲದಲ್ಲಿ ಜನರ ದೇಹ ಹಾಗೂ ಮನಸ್ಸಿಗೆ ತಂಪೆರೆಯುವ ಮಾವಿನ ಹಣ್ಣು ಈಗ ಏಳು ಸಮುದ್ರಗಳನ್ನು ದಾಟಿ ಅಮೆರಿಕ ತಲುಪಿದೆ. ಈ ವಾರ ಅಮೆರಿಕದ ವಾಷಿಂಗ್ಟನ್ನ ಸಿಯಾಟಲ್ನಲ್ಲಿ ಭಾರತೀಯ ಮಾವಿನ ಹಣ್ಣುಗಳ ಆಗಮನವು ಒಂದು ವಿಶಿಷ್ಟ ಹಬ್ಬದ ವಾತಾವರಣವನ್ನು ಸೃಷ್ಟಿಸಿದೆ.
ಭಾರತೀಯ ಮಾವಿನ ಮಾಧುರ್ಯ ಮತ್ತು ದೈವಿಕ ಸುವಾಸನೆಗೆ ವಿದೇಶಿ ಗ್ರಾಹಕರು ಈಗ ಫಿದಾ ಆಗಿದ್ದಾರೆ.
ಗಮನಾರ್ಹ ಸಂಗತಿ ಎಂದರೆ, ಈ ಮಾವಿನ ಹಣ್ಣುಗಳು ಇನ್ನು ಮುಂದೆ ಕೇವಲ ಅಮೆರಿಕದಲ್ಲಿರುವ ಸಣ್ಣಪುಟ್ಟ ಭಾರತೀಯ ದಿನಸಿ ಅಂಗಡಿಗಳಿಗೆ ಮಾತ್ರ ಸೀಮಿತವಾಗಿಲ್ಲ. ಬದಲಾಗಿ ಅಮೆರಿಕದ ದೈತ್ಯ ರೀಟೇಲ್ ಸಂಸ್ಥೆಯಾದ ಕಾಸ್ಟ್ಕೋ (Costco) ನಂತಹ ಪ್ರಮುಖ ಚಿಲ್ಲರೆ ಮಾಲ್ಗಳಲ್ಲಿಯೂ ಬಹಿರಂಗವಾಗಿ ಮಾರಾಟವಾಗುತ್ತಿವೆ.
ಒಂದು ಕೆಜಿಗೆ ₹1,900 ರೇಟ್: ಅಮೆರಿಕದ ಸಿಯಾಟಲ್, ಲಿನ್ವುಡ್, ಎಡಿಸನ್ ಮತ್ತು ನಾರ್ತ್ ಬ್ರನ್ಸ್ವಿಕ್ ಸೇರಿದಂತೆ ಪ್ರಮುಖ ನಗರಗಳಲ್ಲಿ 1 ಕೆಜಿ ಕೇಸರ್ ಮಾವಿನ ಹಣ್ಣಿನ ಬೆಲೆ $20 ಡಾಲರ್ (ಅಂದಾಜು ₹1,919 ರೂಪಾಯಿ) ಗೆ ಮಾರಾಟವಾಗುತ್ತಿದೆ
ಅದೇ ಭಾರತದಲ್ಲಿ, ₹1,900 ರೂಪಾಯಿ ಖರ್ಚು ಮಾಡಿದರೆ ಒಂದು ಮಧ್ಯಮ ವರ್ಗದ ಇಡೀ ಕುಟುಂಬಕ್ಕೆ ಹಲವಾರು ದಿನಗಳವರೆಗೆ ಸಾಕಾಗುವಷ್ಟು ಮಾವಿನ ಹಣ್ಣುಗಳು ಸಿಗುತ್ತವೆ. ಆದರೂ ಅಮೆರಿಕದಲ್ಲಿ ಭಾರತೀಯ ಮಾವಿನ ಕ್ರೇಜ್ ಎಷ್ಟಿದೆಯೆಂದರೆ, ಅಲ್ಲಿನ ಗ್ರಾಹಕರು ಮುಗಿಬಿದ್ದು ಖರೀದಿ ಮಾಡುತ್ತಿದ್ದಾರೆ.
ಅಮೆರಿಕದ ಸಿಯಾಟಲ್ನಲ್ಲಿರುವ ಭಾರತದ ಕಾನ್ಸುಲ್ ಜನರಲ್ ಪ್ರಕಾಶ್ ಗುಪ್ತಾ ಅವರು ಅಲ್ಲಿನ ಪ್ರಸಿದ್ಧ ಫಾಕ್ಸ್-13 ನ್ಯೂಸ್ (Fox-13 News) ವಾಹಿನಿಯಲ್ಲಿ ಭಾಗವಹಿಸಿ ಭಾರತೀಯ ಮಾವಿನ ಹಣ್ಣುಗಳ ಬಗ್ಗೆ ಭರ್ಜರಿ ಪ್ರಚಾರ ಮಾಡಿದರು.
ಕಳೆದ ವರ್ಷದಿಂದ ಭಾರತೀಯ ಮಾವಿನ ಹಣ್ಣುಗಳು ಅಮೆರಿಕದ ಪ್ರಮುಖ ಚಿಲ್ಲರೆ ಸೂಪರ್ ಮಾರ್ಕೆಟ್ಗಳನ್ನು ತಲುಪುವುದನ್ನು ಖಚಿತಪಡಿಸಿಕೊಳ್ಳಲು ಭಾರತ ಸರ್ಕಾರ ತೀವ್ರ ಪ್ರಯತ್ನ ನಡೆಸುತ್ತಿತ್ತು. ಅದರ ಫಲಿತಾಂಶವೇ ಇಂದು ಕಾಸ್ಟ್ಕೋ ಮಾಲ್ಗಳಲ್ಲಿ ಮಾವಿನ ಹಣ್ಣುಗಳು ರಾರಾಜಿಸುತ್ತಿವೆ. “ಭಾರತದಲ್ಲಿ ಮಾವು ಕೇವಲ ಒಂದು ಹಣ್ಣಲ್ಲ, ಅದು ಬೇಸಿಗೆಯ ಸಡಗರ ಮತ್ತು ಪ್ರತಿಯೊಂದು ಕುಟುಂಬದ ಭಾವನೆ” ಎಂದು ಪ್ರಕಾಶ್ ಗುಪ್ತಾ ಅವರು ಅಮೆರಿಕನ್ನರಿಗೆ ವಿವರಿಸಿದ್ದಾರೆ.
ಭಾರತವು ವಿಶ್ವದ ಅತಿ ದೊಡ್ಡ ಮಾವಿನ ಹಣ್ಣು ಉತ್ಪಾದಕ ರಾಷ್ಟ್ರವಾಗಿದ್ದು, ಜಾಗತಿಕ ಉತ್ಪಾದನೆಯ ಸುಮಾರು ಅರ್ಧದಷ್ಟು (50%) ಪಾಲನ್ನು ಹೊಂದಿದೆ. ಭಾರತದ ಕೇಸರ್, ಅಲ್ಫೋನ್ಸೊ (ಹಾಫೂಸ್), ದುಸ್ಸೆಹ್ರಿ ಮತ್ತು ಲ್ಯಾಂಗ್ರಾ ಮುಂತಾದ ಮಾವಿನ ಪ್ರಭೇದಗಳು ತಮ್ಮ ವಿಶಿಷ್ಟ ಸಿಹಿ ಮತ್ತು ದಟ್ಟವಾದ ಸುವಾಸನೆಗಾಗಿ ಪ್ರಪಂಚದಾದ್ಯಂತ ಪ್ರಸಿದ್ಧಿ ಪಡೆದಿವೆ. ಪ್ರಸ್ತುತ, ಕೇಸರ್ ಮಾವಿನ ಹಣ್ಣುಗಳು ಸಿಯಾಟಲ್ಗೆ ಲಗ್ಗೆ ಇಟ್ಟಿದ್ದು, ಮುಂಬರುವ ವಾರಗಳಲ್ಲಿ ಉಳಿದ ಪ್ರಭೇದಗಳು ಅಮೆರಿಕ ಮಾರುಕಟ್ಟೆಯನ್ನು ಆಳಲಿವೆ.
ಇಲ್ಲಿಯವರೆಗೆ ವಿದೇಶಗಳಲ್ಲಿ ಭಾರತೀಯ ಮಾವು ಸಿಗುವುದು ತುಂಬಾ ಅಪರೂಪವಾಗಿತ್ತು, ಆದರೆ ಈಗ ವಿಸ್ತರಿಸುತ್ತಿರುವ ಇದರ ಮಾರುಕಟ್ಟೆ ಭಾರತೀಯ ಕೃಷಿ ಕ್ಷೇತ್ರಕ್ಕೆ ಜಾಗತಿಕ ಮಟ್ಟದಲ್ಲಿ ದೊಡ್ಡ ಗೆಲುವನ್ನು ತಂದುಕೊಟ್ಟಿದೆ.
ಮೌನ ಗುಡ್ಡೆಮನೆ ಬಿಂದಾಸ್ ಅವತಾರಕ್ಕೆ ಪಡ್ಡೆ ಹೈಕ್ಳು ಫಿದಾ; ವೈರಲ್ ವಿಡಿಯೋ ನೋಡಿ
