newsics.com | ನ್ಯೂಸಿಕ್ಸ್
ನವದೆಹಲಿ: ಬಂಗಾಳಕೊಲ್ಲಿಯಲ್ಲಿ ಬೆಚ್ಚಿಬೀಳಿಸುವಂತಹ ಭೀಕರ ಕಡಲ ದುರಂತವೊಂದು ಸಂಭವಿಸಿದೆ. ಮ್ಯಾನ್ಮಾರ್ನಿಂದ ಪಲಾಯನ ಮಾಡುತ್ತಿದ್ದ ನೂರಾರು ರೋಹಿಂಗ್ಯಾ ನಿರಾಶ್ರಿತರನ್ನು ಹೊತ್ತೊಯ್ಯುತ್ತಿದ್ದ ಎರಡು ದೋಣಿಗಳು ಸಮುದ್ರದ ಮಧ್ಯೆ ಮಗುಚಿ ಬಿದ್ದಿದ್ದು, ಕನಿಷ್ಠ 500ಕ್ಕೂ ಹೆಚ್ಚು ಜನ ನೀರಿನಲ್ಲಿ ಮುಳುಗಿ ಸಾವನ್ನಪ್ಪಿರುವ ಭೀಕರ ಶಂಕೆ ವ್ಯಕ್ತವಾಗಿದೆ.
ಈ ದಾರುಣ ಘಟನೆಯ ಕುರಿತು ಅಂತಾರಾಷ್ಟ್ರೀಯ ವಲಸೆ ಸಂಸ್ಥೆ (IOM) ಮತ್ತು ವಿಶ್ವಸಂಸ್ಥೆಯ ನಿರಾಶ್ರಿತರ ಹೈಕಮಿಷನರ್ (UNHCR) ಜಂಟಿ ಜಾಗತಿಕ ವರದಿಯೊಂದನ್ನು ಬಿಡುಗಡೆ ಮಾಡುವ ಮೂಲಕ ಆತಂಕಕಾರಿ ಮಾಹಿತಿ ಹೊರಹಾಕಿವೆ.
ಎರಡು ಹಡಗುಗಳು ಮುಳುಗಿದ್ದು ಹೇಗೆ?
ವಿಶ್ವಸಂಸ್ಥೆಯ ಜಂಟಿ ಹೇಳಿಕೆಯ ಪ್ರಕಾರ, ಮ್ಯಾನ್ಮಾರ್ನ ತೀವ್ರ ಸಂಘರ್ಷ ಪೀಡಿತ ರಾಖೈನ್ ರಾಜ್ಯ ಹಾಗೂ ಬಾಂಗ್ಲಾದೇಶದ ಗಡಿಯಲ್ಲಿರುವ ನಿರಾಶ್ರಿತರ ಶಿಬಿರಗಳಿಂದ ಜೂನ್ ಅಂತ್ಯದಲ್ಲಿ ಈ ಎರಡು ದೋಣಿಗಳು ನೂರಾರು ಜನರನ್ನು ತುಂಬಿಕೊಂಡು ಹೊರಟಿದ್ದವು.
- ಮೊದಲ ದೋಣಿ: ಸುಮಾರು 250 ರೋಹಿಂಗ್ಯಾ ಪ್ರಯಾಣಿಕರನ್ನು ಹೊತ್ತೊಯ್ಯುತ್ತಿದ್ದ ಮೊದಲ ಹಡಗು ಪ್ರಯಾಣ ಆರಂಭಿಸಿದ ಕೆಲವೇ ಸಮಯದ ನಂತರ ಸಂಪರ್ಕ ಕಳೆದುಕೊಂಡಿದೆ.
- ಎರಡನೇ ದೋಣಿ: ಸುಮಾರು 280 ಕ್ಕೂ ಹೆಚ್ಚು ಜನರನ್ನು ಹೊತ್ತೊಯ್ಯುತ್ತಿದ್ದ ಎರಡನೇ ಹಡಗು ಜುಲೈ 8 ರಂದು ಮ್ಯಾನ್ಮಾರ್ನ ಅಯೆಯರ್ವಾಡಿ ಕರಾವಳಿಯ ಸಮೀಪ ಭೀಕರವಾಗಿ ಮುಳುಗಡೆಗೊಂಡಿದೆ. ಈ ಎರಡೂ ದೋಣಿಗಳಲ್ಲಿದ್ದ ಬಹುತೇಕರು ಅಂದರೆ ಕನಿಷ್ಠ 500 ಮಂದಿ ಸಾವನ್ನಪ್ಪಿದ್ದಾರೆ ಎಂದು UNHCR ಮತ್ತು IOM ಕಳವಳ ವ್ಯಕ್ತಪಡಿಸಿವೆ.
ಮಳೆಗಾಲದ ಅಪಾಯಕಾರಿ ಕಡಲ ಪ್ರಯಾಣವೇ ಮುಳುವಾಯ್ತಾ?
ಸಾಮಾನ್ಯವಾಗಿ ರೋಹಿಂಗ್ಯಾ ನಿರಾಶ್ರಿತರು ಮಳೆಗಾಲದಲ್ಲಿ ಕಡಲ ಮಾರ್ಗದ ಮೂಲಕ ಪ್ರಯಾಣಿಸುವುದನ್ನು ತಪ್ಪಿಸುತ್ತಾರೆ. ಏಕೆಂದರೆ ಈ ಅವಧಿಯಲ್ಲಿ ಸಮುದ್ರ ಭೀಕರ ಸ್ವರೂಪ ಪಡೆದಿರುತ್ತದೆ. ಆದರೆ ಇತ್ತೀಚೆಗೆ ಮ್ಯಾನ್ಮಾರ್ ಮತ್ತು ಬಾಂಗ್ಲಾದೇಶದಾದ್ಯಂತ ಸುರಿಯುತ್ತಿರುವ ಧಾರಾಕಾರ ಮಳೆ ಹಾಗೂ ಪ್ರವಾಹದ ಪರಿಸ್ಥಿತಿಯಿಂದಾಗಿ, ಜೀವ ಉಳಿಸಿಕೊಳ್ಳಲು ಅನಿವಾರ್ಯವಾಗಿ ಅಪಾಯಕಾರಿ ಹವಾಮಾನದ ನಡುವೆಯೂ ನಡೆಸಿದ ಈ ಕಡಲ ಪಯಣ ನೂರಾರು ಜೀವಗಳನ್ನು ಬಲಿಪಡೆದಿದೆ ಎನ್ನಲಾಗಿದೆ.
ಮಿಲಿಟರಿ ದಮನಕ್ಕೆ ಹೆದರಿ ಪಲಾಯನ ಮಾಡುತ್ತಿರುವ ರೋಹಿಂಗ್ಯಾಗಳು
ಹಿನ್ನೆಲೆ: ಮ್ಯಾನ್ಮಾರ್ನಲ್ಲಿ 2017 ರಲ್ಲಿ ನಡೆದ ಮಿಲಿಟರಿ ಕಾರ್ಯಾಚರಣೆ, ಆಂತರಿಕ ದಬ್ಬಾಳಿಕೆ ಹಾಗೂ ಜನಾಂಗೀಯ ಸಂಘರ್ಷಕ್ಕೆ ಹೆದರಿ ಇದುವರೆಗೆ ಸುಮಾರು 1.2 ಮಿಲಿಯನ್ ರೋಹಿಂಗ್ಯಾ ಸಮುದಾಯದವರು ದೇಶ ಬಿಟ್ಟು ಓಡಿ ಹೋಗಿದ್ದಾರೆ. ಇವರು ಆರಂಭದಲ್ಲಿ ಬಾಂಗ್ಲಾದೇಶದ ನಿರಾಶ್ರಿತರ ಶಿಬಿರಗಳಲ್ಲಿ ಆಶ್ರಯ ಪಡೆದು, ಬಳಿಕ ಅಲ್ಲಿಂದ ಬೋಟ್ಗಳ ಮೂಲಕ ಬೇರೆ ದೇಶಗಳಿಗೆ ವಲಸೆ ಹೋಗಲು ಯತ್ನಿಸುತ್ತಾರೆ.
ಬಂಗಾಳಕೊಲ್ಲಿ ಮತ್ತು ಅಂಡಮಾನ್ ಸಮುದ್ರ ಮಾರ್ಗಗಳ ಮೂಲಕ ಹೀಗೆ ಕಳ್ಳಮಾರ್ಗದಲ್ಲಿ ವಲಸೆ ಹೋಗುವಾಗ ಸಂಭವಿಸುವ ಅಪಘಾತಗಳಿಂದಾಗಿ ಇದುವರೆಗೆ ಮಕ್ಕಳು, ಮಹಿಳೆಯರು ಸೇರಿದಂತೆ ಸಾವಿರಾರು ಅಮಾಯಕರು ಕಡಲಿನಲ್ಲೇ ಸಮಾಧಿಯಾಗಿದ್ದಾರೆ. UNHCR ದತ್ತಾಂಶದ ಪ್ರಕಾರ, ಕಳೆದ 2025 ರ ವರ್ಷವೊಂದರಲ್ಲೇ 6,500 ಕ್ಕೂ ಹೆಚ್ಚು ರೋಹಿಂಗ್ಯಾಗಳು ಸಮುದ್ರ ದಾಟಲು ಯತ್ನಿಸಿದ್ದು, ಅದರಲ್ಲಿ 900 ಕ್ಕೂ ಹೆಚ್ಚು ಮಂದಿ ಮೃತಪಟ್ಟಿದ್ದರು. ಈ ಮೂಲಕ ವಿಶ್ವದಲ್ಲೇ ಅತ್ಯಂತ ಅಪಾಯಕಾರಿ ಮತ್ತು ಅತಿ ಹೆಚ್ಚು ಮರಣ ಪ್ರಮಾಣ ಹೊಂದಿರುವ ವಲಸೆ ಮಾರ್ಗವಾಗಿ ಈ ಕಡಲ ತೀರ ಬದಲಾಗಿದೆ ಎಂದು ವಿಶ್ವಸಂಸ್ಥೆ ಕಳವಳ ವ್ಯಕ್ತಪಡಿಸಿದೆ.
