newsics.com | ನ್ಯೂಸಿಕ್ಸ್
ಪುರುಷರಲ್ಲಿ ವಯಸ್ಸಾಗುತ್ತಿದ್ದಂತೆ ಟೆಸ್ಟೋಸ್ಟೆರಾನ್ ಮಟ್ಟವು ಸಹಜವಾಗಿಯೇ ಕಡಿಮೆಯಾಗುತ್ತದೆ. ಇದರಿಂದ ಸುಸ್ತು ಮತ್ತು ಲೈಂಗಿಕ ಆಸಕ್ತಿ ಕಡಿಮೆಯಾಗುವಂತಹ ಲಕ್ಷಣಗಳು ಕಾಣಿಸಿಕೊಳ್ಳುತ್ತವೆ.
ಅಮೆರಿಕ ಸೇನೆಯಲ್ಲಿರುವ ಎಲ್ಲಾ ಪುರುಷ ಸಿಬ್ಬಂದಿಗೆ ಪ್ರತಿ ವರ್ಷ ಟೆಸ್ಟೋಸ್ಟೆರಾನ್ ಪರೀಕ್ಷೆ ಮಾಡುವುದು ಕಡ್ಡಾಯ. ಸೈನಿಕರು ತಮ್ಮ ಕೆಲಸವನ್ನು ಅತ್ಯುತ್ತಮವಾಗಿ ಮಾಡಲು ಅವರಲ್ಲಿ ಸರಿಯಾದ ಪ್ರಮಾಣದ ಟೆಸ್ಟೋಸ್ಟೆರಾನ್ ಮಟ್ಟ ಇರಲಿ ಎಂಬ ಕಾರಣಕ್ಕೆ ಈ ಹೊಸ ಪರೀಕ್ಷಾ ನಿಯಮವನ್ನು ತರಲಾಗಿದೆಯಂತೆ.
ಈ ಹೊಸ ನಿಯಮದ ಪ್ರಕಾರ, ಒಂದು ವೇಳೆ ಸೈನಿಕರಲ್ಲಿ ಈ ಹಾರ್ಮೋನ್ ಮಟ್ಟ ಕಡಿಮೆ ಇರುವುದು ಕಂಡುಬಂದರೆ ಅಗತ್ಯಕ್ಕೆ ತಕ್ಕಂತೆ ಅವರಿಗೆ ಟೆಸ್ಟೋಸ್ಟೆರಾನ್ ರಿಪ್ಲೇಸ್ಮೆಂಟ್ ಥೆರಪಿ ಅಂದರೆ ಟಿಆರ್ಟಿ ಚಿಕಿತ್ಸೆ ಪಡೆಯುವ ಅವಕಾಶ ನೀಡಲಾಗುತ್ತದೆ. ಇದರಿಂದ ಪುರುಷರು ತಮ್ಮ ʼಪುರುಷತ್ವʼವನ್ನು ಮರಳಿ ಗಳಿಸಿಕೊಳ್ಳಬಹುದು ಎನ್ನಲಾಗಿದೆ. ಆದರೆ ಈ ಹೊಸ ಥೆರಪಿ ಎಷ್ಟು ಸುರಕ್ಷಿತ? ಇದರಿಂದ ಸಿಗುವ ಲಾಭ ಹೆಚ್ಚಾ, ತೊಂದರೆಯೇ ಹೆಚ್ಚಾ?
ಟೆಸ್ಟೋಸ್ಟೆರಾನ್ ಥೆರಪಿ ಎಂದರೇನು ಮತ್ತು ಅದರಿಂದ ಆಗುವ ಲಾಭ ಹಾಗೂ ತೊಂದರೆಗಳು ಏನೇನು ಎಂಬುದನ್ನು ಮುಂಬೈನ ಸರ್ ಎಚ್ಎನ್ ರಿಲಯನ್ಸ್ ಫೌಂಡೇಶನ್ ಆಸ್ಪತ್ರೆಯ ಎಂಡೋಕ್ರೈನಾಲಜಿ ವಿಭಾಗದ ನಿರ್ದೇಶಕ ಡಾ. ಡೇವಿಡ್ ಚಾಂಡಿ ವಿವರಿಸಿದ್ದಾರೆ. ಅವರ ಮಾತುಗಳ ಸಾರ ಇಲ್ಲಿದೆ.
ವಯಸ್ಸಾಗುತ್ತಿದ್ದಂತೆ ಟೆಸ್ಟೋಸ್ಟೆರಾನ್ ಇಳಿತ
ವಯಸ್ಸಾಗುತ್ತಿದ್ದಂತೆ ಜನರ ದೇಹದಲ್ಲಿ ಟೆಸ್ಟೋಸ್ಟೆರಾನ್ ಮಟ್ಟ ಬದಲಾಗುತ್ತದೆ. ಹದಿಹರೆಯದಲ್ಲಿ ಮತ್ತು ಇಪ್ಪತ್ತರ ಹರೆಯದಲ್ಲಿ ಇದು ಅತ್ಯಂತ ಹೆಚ್ಚಾಗಿರುತ್ತದೆ. ಮೂವತ್ತು ವರ್ಷ ದಾಟಿದ ಮೇಲೆ ಪ್ರತಿ ವರ್ಷ ಶೇಕಡಾ ಒಂದರಿಂದ ಎರಡರಷ್ಟು ಕಡಿಮೆಯಾಗುತ್ತಾ ಹೋಗುತ್ತದೆ. ಪುರುಷರಿಗೆ ನಲವತ್ತು ಮತ್ತು ಐವತ್ತು ವರ್ಷ ಆಗುವಷ್ಟರಲ್ಲಿ ಅವರಲ್ಲಿ ಟೆಸ್ಟೋಸ್ಟೆರಾನ್ ಮಟ್ಟ ತುಂಬಾ ಕಡಿಮೆಯಾಗಿರುತ್ತದೆ. ಇದನ್ನು ಲೇಟ್ ಆನ್ಸೆಟ್ ಹೈಪೋಗೊನಾಡಿಸಮ್ ಎಂದು ಕರೆಯಲಾಗುತ್ತದೆ.
ಈ ತೊಂದರೆ ಇರುವ ಪುರುಷರು ಹೆಚ್ಚಾಗಿ ಸುಸ್ತು ಅನುಭವಿಸುತ್ತಾರೆ, ಲೈಂಗಿಕ ಆಸಕ್ತಿ ಕಡಿಮೆ ಇರುತ್ತದೆ, ಬೇಗನೆ ಮೂಡ್ ಬದಲಾಗುತ್ತದೆ ಮತ್ತು ಮಾಂಸಖಂಡಗಳು ಕರಗುತ್ತವೆ. ಇಂತಹ ಲಕ್ಷಣಗಳು ಬೇರೆ ಕಾರಣಗಳಿಂದಲೂ ಬರಬಹುದು, ಆದ್ದರಿಂದ ಸಮಸ್ಯೆ ನಿಜವಾಗಿಯೂ ಕಡಿಮೆ ಟೆಸ್ಟೋಸ್ಟೆರಾನ್ನಿಂದಲೇ ಆಗಿದೆಯೇ ಎಂದು ಖಚಿತಪಡಿಸಿಕೊಳ್ಳಲು ಪರೀಕ್ಷೆಗಳನ್ನು ಮಾಡುವುದು ಅಗತ್ಯ.
ಟೆಸ್ಟೋಸ್ಟೆರಾನ್ಗೆ ಏನು ಕೆಲಸ?
ಟೆಸ್ಟೋಸ್ಟೆರಾನ್ ದೇಹದಲ್ಲಿ ಹಲವು ಕೆಲಸಗಳನ್ನು ಮಾಡುತ್ತದೆ. ಇದು ಲೈಂಗಿಕ ಜೀವನಕ್ಕೆ, ಮಾಂಸಖಂಡಗಳನ್ನು ಬೆಳೆಸಲು, ಮೂಳೆಗಳನ್ನು ಬಲವಾಗಿಡಲು, ಶಕ್ತಿ ಹೊಂದಲು ಮತ್ತು ಸ್ಪಷ್ಟವಾಗಿ ಯೋಚಿಸಲು ಜನರಿಗೆ ಸಹಾಯ ಮಾಡುತ್ತದೆ. ಟೆಸ್ಟೋಸ್ಟೆರಾನ್ ರಿಪ್ಲೇಸ್ಮೆಂಟ್ ಥೆರಪಿ ತೆಗೆದುಕೊಳ್ಳುವುದು ಸುರಕ್ಷಿತವೇ? ಈ ಥೆರಪಿ ದೇಹದಲ್ಲಿ ಟೆಸ್ಟೋಸ್ಟೆರಾನ್ ಇಲ್ಲದ ಅಥವಾ ಕಡಿಮೆ ಮಟ್ಟದಿಂದ ಬಳಲುತ್ತಿರುವ ಪುರುಷರಿಗೆ ನಿಜವಾಗಿಯೂ ಸಹಾಯ ಮಾಡುತ್ತದೆ. ಇದು ಅವರಿಗೆ ಶಕ್ತಿಯನ್ನು ನೀಡುತ್ತದೆ, ಲೈಂಗಿಕ ಆಸಕ್ತಿ ಹೊಂದಲು ಸಹಾಯ ಮಾಡುತ್ತದೆ ಮತ್ತು ಅವರ ಒಟ್ಟಾರೆ ಜೀವನದ ಗುಣಮಟ್ಟವನ್ನು ಸುಧಾರಿಸುತ್ತದೆ.
ಒಂದು ಅಧ್ಯಯನದ ಪ್ರಕಾರ ಅಮೆರಿಕಾದಲ್ಲಿ ಪ್ರತಿ ಹತ್ತು ಪುರುಷರಲ್ಲಿ ಒಬ್ಬರು ಕಡಿಮೆ ಟೆಸ್ಟೋಸ್ಟೆರಾನ್ ಸಮಸ್ಯೆಯಿಂದ ಬಳಲುತ್ತಿದ್ದಾರೆ. ಬಹಳ ಮಂದಿ ಥೆರಪಿ ಪಡೆಯುತ್ತಾರೆ. ಆದರೆ ಇದರಲ್ಲಿ ಕೆಲವು ತೊಂದರೆಗಳೂ ಇವೆ.
ಏನು ಸಮಸ್ಯೆ?
1. ಇದು ಪುರುಷರಲ್ಲಿ ಕೆಂಪು ರಕ್ತಕಣಗಳ ಉತ್ಪಾದನೆಯನ್ನು ಹೆಚ್ಚಿಸಬಹುದು
2. ಇದು ಅವರ ನಿದ್ದೆಯ ಸಮಸ್ಯೆಯನ್ನು ಅಂದರೆ ಸ್ಲೀಪ್ ಅಪ್ನಿಯಾವನ್ನು ಇನ್ನು ಹೆಚ್ಚು ಮಾಡಬಹುದು
3. ಇದು ಪುರುಷರ ಸಂತಾನೋತ್ಪತ್ತಿ ಸಾಮರ್ಥ್ಯವನ್ನು ಕಡಿಮೆ ಮಾಡುವುದರಿಂದ ಮತ್ತು ವೀರ್ಯಾಣುಗಳ ಸಂಖ್ಯೆಯನ್ನು ಗಣನೀಯವಾಗಿ ಇಳಿಸುವುದರಿಂದ ಅವರು ಮಕ್ಕಳನ್ನು ಹೊಂದದಂತೆ ತಡೆಯಬಹುದು
4. ಇದು ಪ್ರೊಸ್ಟೇಟ್ ಗ್ರಂಥಿಯ ಸಮಸ್ಯೆಗಳನ್ನು ಉಂಟುಮಾಡಬಹುದು
ಮಹಿಳೆಯರಲ್ಲೂ ಟೆಸ್ಟೋಸ್ಟೆರಾನ್ ಇದೆಯೇ?
ಮಹಿಳೆಯರ ದೇಹದಲ್ಲೂ ಟೆಸ್ಟೋಸ್ಟೆರಾನ್ ಇರುತ್ತದೆ. ಇದು ಅಂಡಾಶಯ ಮತ್ತು ಅಡ್ರಿನಲ್ ಗ್ರಂಥಿಗಳಲ್ಲಿ ಉತ್ಪತ್ತಿಯಾಗುತ್ತದೆ. ಇದು ಅವರ ಲೈಂಗಿಕ ಆಸಕ್ತಿಯನ್ನು ಕಾಪಾಡಿಕೊಳ್ಳಲು ಸಹಾಯ ಮಾಡುತ್ತದೆ, ಮಾಂಸಖಂಡಗಳನ್ನು ಬೆಳೆಸಲು ಸಹಾಯ ಮಾಡುತ್ತದೆ, ಮೂಳೆಗಳನ್ನು ಬಲವಾಗಿಡಲು ಸಹಾಯ ಮಾಡುತ್ತದೆ ಮತ್ತು ಅವರಿಗೆ ಶಕ್ತಿ ನೀಡುತ್ತದೆ. ಮಹಿಳೆಯರಿಗೆ ವಯಸ್ಸಾಗುತ್ತಿದ್ದಂತೆ ಅವರಲ್ಲಿಯೂ ಟೆಸ್ಟೋಸ್ಟೆರಾನ್ ಮಟ್ಟ ಕಡಿಮೆಯಾಗುತ್ತದೆ. ಇದು ಮುಖ್ಯವಾಗಿ ಅವರು ಮುಟ್ಟು ನಿಲ್ಲುವ ಹಂತವನ್ನು ಅಂದರೆ ಮೆನೋಪಾಸ್ ತಲುಪಿದ ನಂತರ ಸಂಭವಿಸುತ್ತದೆ.
ಕಡಿಮೆ ಟೆಸ್ಟೋಸ್ಟೆರಾನ್ ಎಂಬುದು ಗುಣಪಡಿಸಬಹುದಾದ ಒಂದು ಸಮಸ್ಯೆ. ಹಾರ್ಮೋನ್ಗಳ ಬಗ್ಗೆ ತಿಳಿದಿರುವ ವೈದ್ಯರ ಬಳಿಗೆ ಹೋಗಿ ತಮಗೆ ನಿಜವಾಗಿಯೂ ಕಡಿಮೆ ಟೆಸ್ಟೋಸ್ಟೆರಾನ್ ಇದೆಯೇ ಎಂದು ಪರೀಕ್ಷೆಗಳನ್ನು ಮಾಡಿಸಿಕೊಂಡು ಮುಂದಿನ ನಿರ್ಧಾರ ತೆಗೆದುಕೊಳ್ಳಬೇಕೇ ಹೊರತು ಸ್ವತಂತ್ರ ನಿರ್ಧಾರ ತೆಗೆದುಕೊಳ್ಳದಿರುವುದು ಉತ್ತಮ.
Personal Health ಕಡಿಮೆ, ಕಳಪೆ ನಿದ್ದೆಯಿಂದ ಬೇಗ ಮುದುಕರಾಗ್ತೀರಿ! ಲೈಂಗಿಕತೆ ಮೇಲೆ ನೇರ ಪರಿಣಾಮ, ಮಕ್ಕಳಾಗದಿರಬಹುದು
ಲೈಂಗಿಕ ಸಮಸ್ಯೆಯಿಂದ ಆಗುತ್ತಾ ಹಾರ್ಟ್ ಅಟ್ಯಾಕ್? ತಜ್ಞರು ಹೇಳಿದ್ದೇನು?
Personal Health ಲೈಂಗಿಕ ಆಸಕ್ತಿ ಕಡಿಮೆ ಆಗ್ತಿದ್ಯಾ? ಈ ಏಳು ಆಹಾರಗಳಿಂದ ದಾಂಪತ್ಯ ಜೀವನ ಸುಖಮಯ
