newsics.com
ಹೊಸ ವರ್ಷ 2025ರ ಪ್ರವೇಶವಾಗಿದೆ. ಇದರೊಂದಿಗೆ ಹೊಸ ಪೀಳಿಗೆಯೂ ಆರಂಭವಾಗಿದೆ. ಇಂದು ಅಂದರೆ 2025ರ ಜನವರಿ 1 ರಿಂದ 2039 ರ ನಡುವೆ ಹುಟ್ಟುವ ಮಕ್ಕಳನ್ನು ಜನರೇಷನ್ ಬೀಟಾ ಎಂದು ಕರೆಯಲಾಗುತ್ತದೆ.
2010 ರಿಂದ 2024 ರ ನಡುವೆ ಜನಿಸಿದ ಮಕ್ಕಳನ್ನು ‘ಜನರೇಷನ್ ಆಲ್ಫಾ’ ಎಂದು ಕರೆಯಲಾಗಿದ್ದು, ಬೀಟಾ ಬೀಟ್ ಶುರುವಾದ ಮರುಕ್ಷಣದಲ್ಲೇ ಆಲ್ಫಾ ಯುಗ ಮುಗಿದಿದೆ.
ಈ ಹೊಸ ಪೀಳಿಗೆಯ ಮಕ್ಕಳನ್ನು ಜನರೇಷನ್ ಬೀಟಾ ಎಂದು ಕರೆಯಲಾಗುತ್ತಿದೆ. ಈ ಪೀಳಿಗೆಯು ತಂತ್ರಜ್ಞಾನದ ಮೇಲೆ ಅವಲಂಬಿತವಾಗಿರುತ್ತದೆ. ಕೃತಕ ಬುದ್ಧಿಮತ್ತೆಯ ಮೇಲೆ ಹೆಚ್ಚು ಅವಲಂಬಿತವಾಗಿರುತ್ತದೆ. 22 ನೇ ಶತಮಾನಕ್ಕೆ ಪರಿವರ್ತನೆಯ ಮೂಲಕ ಬದುಕಲು ಸಿದ್ಧರಾಗಿದ್ದಾರೆ.
ಭೂಮಿಯ ಮೇಲೆ ಬದುಕುಳಿಯಲು ಹೋರಾಟ ಹೆಚ್ಚಾಗುತ್ತದೆ. ಅದಕ್ಕೂ ಈ ಹೊಸ ಪೀಳಿಗೆ ಸಾಕ್ಷಿಯಾಗಲಿದೆ. ವಿಶ್ವದ ಜನಸಂಖ್ಯೆಯಲ್ಲಿ ಬದಲಾವಣೆಗಳಾಗಲಿದ್ದು, ಅದರಲ್ಲಿ ಈ ಮಕ್ಕಳ ಪಾತ್ರ ದೊಡ್ಡದಾಗಿರುತ್ತದೆ.
ಬೀಟಾ ಏಕೆ ಭಿನ್ನ?:
ದೀರ್ಘಕಾಲದಿಂದ ಸಮಾಜದ ಬಗ್ಗೆ ಸಂಶೋಧನೆ ನಡೆಸುತ್ತಿರುವ ಮಾರ್ಕ್ ಮೆಕ್ರಿಂಡಲ್ ‘ಜನರೇಷನ್ ಆಲ್ಫಾ’ ಪದದ ಪ್ರತಿಪಾದಕರು. ಈಗ ಜನರೇಷನ್ ಬೀಟಾ ಬಗ್ಗೆ ಮಾರ್ಕ್ ಹೇಳುವಂತೆ, ಕಳೆದ 14 ವರ್ಷಗಳಲ್ಲಿ ಜನಿಸಿದ ಮಕ್ಕಳಿಗಿಂತ ಈ ಹೊಸ ಪೀಳಿಗೆ ವಿಭಿನ್ನವಾಗಿರುತ್ತದೆ. ಅವರು ಹಲವಾರು ಸಮಸ್ಯೆಗಳನ್ನು ಎದುರಿಸಬೇಕಾಗುತ್ತದೆ. ತಂತ್ರಜ್ಞಾನದ ಸಹಾಯವನ್ನೂ ಪಡೆಯುತ್ತಾರೆ. ಈ ಪೀಳಿಗೆಯ ಮಕ್ಕಳು ಹೆಚ್ಚು ಕಾಲ ಬದುಕುತ್ತಾರೆ.
ಇಲ್ಲಿಯವರೆಗೆ ಬಂದ ಎಲ್ಲಾ ಪೀಳಿಗೆಗಳಿಗಿಂತ ಜನರೇಷನ್ ಬೀಟಾದ ಸರಾಸರಿ ಆಯಸ್ಸು ಹೆಚ್ಚಾಗಿರುತ್ತದೆ. 2025 ರಿಂದ 2039 ರ ನಡುವೆ ಜನಿಸುವ ಮಕ್ಕಳಲ್ಲಿ ಹಲವರು 2100 ರವರೆಗೆ ಆರೋಗ್ಯವಾಗಿ ಬದುಕುತ್ತಾರೆ.
ಮುಂದಿನ ದಿನಗಳಲ್ಲಿ ವೈದ್ಯಕೀಯ ವ್ಯವಸ್ಥೆಯಲ್ಲಿ ಸುಧಾರಣೆಯಾಗಲಿದೆ. ತಂತ್ರಜ್ಞಾನದಲ್ಲೂ ಅಭಿವೃದ್ಧಿಯಾಗಲಿದೆ. ಇದರಿಂದಾಗಿ ಜನರೇಷನ್ ಬೀಟಾದ ಮಕ್ಕಳು ಹಿಂದಿನ ಎಲ್ಲಾ ಪೀಳಿಗೆಗಳಿಗಿಂತ ಹೆಚ್ಚು ಕಾಲ ಬದುಕುತ್ತಾರೆ.
ಭಾರೀ ಬದಲಾವಣೆ?:
ಜನರೇಷನ್ ಬೀಟಾದ ಮಕ್ಕಳು ‘ಜನರೇಷನ್ ವೈ’ನ ಕಿರಿಯ ವ್ಯಕ್ತಿಗಳು ಮತ್ತು ‘ಜನರೇಷನ್ ಝಡ್’ ನ ಹಿರಿಯ ವ್ಯಕ್ತಿಗಳ ಮಕ್ಕಳು.
ಈ ಹೊಸ ಪೀಳಿಗೆಯು ಮುಂದಿನ ದಿನಗಳಲ್ಲಿ ವಿಶ್ವದಾದ್ಯಂತ ಆರ್ಥಿಕತೆ, ಸಂಸ್ಕೃತಿ ಮತ್ತು ಸಾಮಾಜಿಕ ವ್ಯವಸ್ಥೆಯಲ್ಲಿ ದೊಡ್ಡ ಬದಲಾವಣೆಗಳನ್ನು ತರಲಿದೆ.
ಸಾಮಾಜಿಕ ಬದಲಾವಣೆ, ಹವಾಮಾನ ಬದಲಾವಣೆ, ವಿಶ್ವ ಜನಸಂಖ್ಯೆಯ ಬದಲಾವಣೆ, ವೇಗವಾಗಿ ನಗರೀಕರಣದಂತಹ ಸಮಸ್ಯೆಗಳನ್ನು ಜನರೇಷನ್ ಬೀಟಾ ಎದುರಿಸಬೇಕಾಗುತ್ತದೆ ಎಂದು ವಿಶ್ಲೇಷಿಸಲಾಗಿದೆ.
HAPPY NEW YEAR 2025 ಹೊಸ ವರ್ಷದ ಶುಭಾಶಯಗಳು… ಹೊಸ ವರ್ಷದ ಮೊದಲ ದಿನ ಹೀಗಿರಿ… ಇದನ್ನೆಲ್ಲ ಮಾಡಲೇಬೇಡಿ…
