newsics.com | ನ್ಯೂಸಿಕ್ಸ್
ನವದೆಹಲಿ: ಪೇಪರ್ ಸೋರಿಕೆ ಹಗರಣದಿಂದ ಕಂಗಾಲಾಗಿದ್ದ ಲಕ್ಷಾಂತರ ವಿದ್ಯಾರ್ಥಿಗಳು ಹಾಗೂ ಅವರ ಪೋಷಕರ ಆತಂಕಕ್ಕೆ ಸ್ಪಂದಿಸಿ ಪ್ರಧಾನಿ ನರೇಂದ್ರ ಮೋದಿ ಅವರು ಗುರುವಾರ ರಾತ್ರಿ ಇನ್ಸ್ಟಾಗ್ರಾಮ್ನಲ್ಲಿ ಹಂಚಿಕೊಂಡಿದ್ದ ಒಂದು ಸೆಲ್ಫಿ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಧೂಳೆಬ್ಬಿಸಿದೆ.
ಪ್ರಧಾನಿಯವರ ಈ ಭಾವನಾತ್ಮಕ ಸ್ಪಂದನೆಗೆ ದೇಶಾದ್ಯಂತ ವ್ಯಾಪಕ ಬೆಂಬಲ ವ್ಯಕ್ತವಾಗಿದ್ದು, ಒಂದೇ ರಾತ್ರಿಯಲ್ಲಿ ಅವರ ಇನ್ಸ್ಟಾಗ್ರಾಮ್ ಖಾತೆಗೆ ಬರೋಬ್ಬರಿ 10 ಲಕ್ಷ (1 ಮಿಲಿಯನ್) ಹೊಸ ಫಾಲೋವರ್ಸ್ಗಳು ಸೇರ್ಪಡೆಯಾಗಿದ್ದಾರೆ. ಇದರೊಂದಿಗೆ ಅವರ ಒಟ್ಟು ಫಾಲೋವರ್ಸ್ ಸಂಖ್ಯೆ 10.2 ಕೋಟಿಗೆ (102 ಮಿಲಿಯನ್) ಏರಿಕೆಯಾಗಿದೆ.
ದಾಖಲೆ ಬರೆದ ‘ಒಂದೇ ಒಂದು’ ವಿಡಿಯೋ!
”ಪ್ರಶ್ನೆಪತ್ರಿಕೆ ಸೋರಿಕೆ ತಡೆಗೆ ನಾಳಿನ ಕ್ಯಾಬಿನೆಟ್ ಸಭೆಯಲ್ಲಿ ಇನ್ನಷ್ಟು ಕಠಿಣ ಕ್ರಮಗಳನ್ನು ಕೈಗೊಳ್ಳಲಾಗುವುದು” ಎಂಬ ಶೀರ್ಷಿಕೆಯೊಂದಿಗೆ ಪ್ರಧಾನಿ ಮೋದಿ ಹಂಚಿಕೊಂಡಿದ್ದ ಈ ಸೆಲ್ಫಿ ವಿಡಿಯೋ ಇಂಟರ್ನೆಟ್ನಲ್ಲಿ ಹೊಸ ದಾಖಲೆಗಳನ್ನೇ ಬರೆದಿದೆ.
- ವ್ಯೂಸ್: 27.1 ಕೋಟಿಗೂ ಹೆಚ್ಚು
- ಲೈಕ್ಸ್: 1.5 ಕೋಟಿಗೂ ಅಧಿಕ
- ಕಾಮೆಂಟ್ಸ್: 13 ಲಕ್ಷಕ್ಕೂ ಹೆಚ್ಚು
ವಿಡಿಯೋದಲ್ಲೇನಿತ್ತು? ವಿದ್ಯಾರ್ಥಿಗಳಿಗೆ ಪ್ರಧಾನಿ ನೀಡಿದ ಅಭಯವೇನು?
ವಿಡಿಯೋ ಸಂದೇಶದಲ್ಲಿ ಅತ್ಯಂತ ಕಳಕಳಿಯಿಂದ ಮಾತನಾಡಿದ ಪ್ರಧಾನಿ ಮೋದಿ, ಪರೀಕ್ಷೆಗಳ ಪಾರದರ್ಶಕತೆ ಕಾಯ್ದುಕೊಳ್ಳಲು ಸರ್ಕಾರ ಬದ್ಧವಾಗಿದೆ ಎಂದು ಭರವಸೆ ನೀಡಿದರು.
ಪ್ರಶ್ನೆಪತ್ರಿಕೆ ಸೋರಿಕೆ ಎಂಬುದು ಕೇವಲ ಒಂದು ಸಮಸ್ಯೆಯಲ್ಲ; ಇದು ರಾತ್ರಿ-ಹಗಲೆನ್ನದೆ ಶ್ರಮಿಸಿದ ಲಕ್ಷಾಂತರ ವಿದ್ಯಾರ್ಥಿಗಳು ಮತ್ತು ಅವರ ಕುಟುಂಬಕ್ಕೆ ತಂದೊಡ್ಡಿರುವ ತೀವ್ರ ಮಾನಸಿಕ ವೇದನೆ ಎಂಬುದು ನನಗೂ ತಿಳಿದಿದೆ. ವಿದ್ಯಾರ್ಥಿಗಳ ಒಂದು ವರ್ಷದ ಶ್ರಮ ವ್ಯರ್ಥವಾಗಲು ನಾವು ಬಿಡುವುದಿಲ್ಲ. ಕಳೆದ ಎರಡುವರೆ ತಿಂಗಳಿನಿಂದ ಸರ್ಕಾರ ತಪ್ಪಿತಸ್ಥರ ವಿರುದ್ಧ ಕಠಿಣ ಕ್ರಮ ಜರುಗಿಸಿದ್ದು, ಹಲವರನ್ನು ಜೈಲಿಗಟ್ಟಿದೆ. ಅತ್ಯಂತ ಕಡಿಮೆ ಅವಧಿಯಲ್ಲಿ 22 ಲಕ್ಷ ವಿದ್ಯಾರ್ಥಿಗಳು ಮರುಪರೀಕ್ಷೆ ಬರೆಯಲು ಅಗತ್ಯವಿರುವ ಎಲ್ಲಾ ವ್ಯವಸ್ಥೆಗಳನ್ನು ಸರ್ಕಾರ ಮಾಡಿದೆ ಎಂದು ಪ್ರಧಾನಿ ಮೋದಿ ತಿಳಿಸಿದರು.
ಕ್ಯಾಬಿನೆಟ್ ಕ್ರಾಂತಿಕಾರಿ ನಿರ್ಧಾರ: 10 ವರ್ಷ ಜೈಲು, ₹10 ಕೋಟಿ ದಂಡ!
ಪ್ರಧಾನಿ ಮೋದಿ ಅವರು ವಿಡಿಯೋದಲ್ಲಿ ನೀಡಿದ ಭರವಸೆಯ ಬೆನ್ನಲ್ಲೇ ನಡೆದ ಕೇಂದ್ರ ಸಚಿವ ಸಂಪುಟ (ಕ್ಯಾಬಿನೆಟ್) ಸಭೆಯಲ್ಲಿ ಪ್ರಶ್ನೆಪತ್ರಿಕೆ ಸೋರಿಕೆ ತಡೆ ಕಾಯ್ದೆಗೆ ಅತ್ಯಂತ ಕಠಿಣ ತಿದ್ದುಪಡಿಗಳನ್ನು ತರಲು ಅನುಮೋದನೆ ನೀಡಲಾಗಿದೆ.
ವಿದ್ಯಾರ್ಥಿಗಳ ಭವಿಷ್ಯದ ಜೊತೆ ಚೆಲ್ಲಾಟವಾಡುವ ದಂಧೆಕೋರರು ಹಾಗೂ ಅಕ್ರಮ ಎಸಗುವವರ ವಿರುದ್ಧ ಇನ್ಮುಂದೆ ಜಾರಿಯಾಗಲಿರುವ ಹೊಸ ಕಾನೂನು ನಿಯಮಗಳು ಇಲ್ಲಿವೆ:
- ಗರಿಷ್ಠ ಶಿಕ್ಷೆ: ಪೇಪರ್ ಸೋರಿಕೆ ಅಪರಾಧ ಎಸಗಿದವರಿಗೆ ಗರಿಷ್ಠ 10 ವರ್ಷಗಳವರೆಗೆ ಜೈಲು ಶಿಕ್ಷೆ.
- ಭಾರೀ ದಂಡ: ಅಕ್ರಮದಲ್ಲಿ ಭಾಗಿಯಾದವರಿಗೆ ಬರೋಬ್ಬರಿ ₹10 ಕೋಟಿ ರೂಪಾಯಿಗಳವರೆಗೆ ದಂಡ.
- ಕನಿಷ್ಠ ಜೈಲು ಶಿಕ್ಷೆ ಹೆಚ್ಚಳ: ಈ ಹಿಂದೆ ಇದ್ದ 3 ವರ್ಷಗಳ ಕನಿಷ್ಠ ಜೈಲು ಶಿಕ್ಷೆಯ ಅವಧಿಯನ್ನು ಈಗ 5 ವರ್ಷಗಳಿಗೆ ಹೆಚ್ಚಿಸಲು ಸಂಪುಟ ಸಭೆ ಹಸಿರು ನಿಶಾನೆ ತೋರಿದೆ.
https://x.com/DDNewslive/status/2080654557391278273?ref_src=twsrc%5Etfw%7Ctwcamp%5Etweetembed%7Ctwterm%5E2080654557391278273%7Ctwgr%5E0dca1ba8e0157bdc761f85112566bcf336b82b58%7Ctwcon%5Es1_c10&ref_url=http%3A%2F%2Fapi-news.dailyhunt.in%2F
Tragedy ನನ್ನ ಸಾವಿಗೆ ಮೋದಿ ಕಾರಣ: SIR ಫಾರ್ಮ್ನಲ್ಲೇ ಡೆತ್ನೋಟ್ ಬರೆದಿಟ್ಟು ಜೀವ ಕಳೆದುಕೊಂಡ ಪೇಂಟರ್!
