https://youtube.com/shorts/s_4DpSB4DuI?si=4AZmgba8KEPzCEfP
Subscribe ನ್ಯೂಸಿಕ್ಸ್ ಕನ್ನಡ
newsics.com
ಪುರಿ: 12 ವರ್ಷದ ಬಾಲಕಿಯೊಬ್ಬಳು ತಲೆಹೇನುಗಳ ತೀವ್ರ ಸಮಸ್ಯೆಯಿಂದಾಗಿ ಚಿಕಿತ್ಸೆ ಫಲಿಸದೆ ಮೃತಪಟ್ಟಿರುವ ಘಟನೆ ಒಡಿಶಾದ ಪುರಿ ಜಿಲ್ಲೆಯ ಬಲಂಗಾ ಪೊಲೀಸ್ ಠಾಣಾ ವ್ಯಾಪ್ತಿಯ ಚಂಪಾಗಡ ಸಾಹಿ ಗ್ರಾಮದಲ್ಲಿ ನಡೆದಿದೆ.
ಮೃತ ಬಾಲಕಿಯನ್ನು ಲಿಂಗರಾಜ್ ಸಾಹೂ ಎಂಬುವವರ ಪುತ್ರಿ ಲಕ್ಷ್ಮಿ ಪ್ರಿಯಾ ಸಾಹೂ (12) ಎಂದು ಗುರುತಿಸಲಾಗಿದೆ. ಈಕೆ ಆರನೇ ತರಗತಿಯಲ್ಲಿ ವ್ಯಾಸಂಗ ಮಾಡುತ್ತಿದ್ದಳು. ಕುಟುಂಬದವರ ಪ್ರಕಾರ, ಲಕ್ಷ್ಮಿ ಪ್ರಿಯಾ ಕಳೆದ ಹಲವು ತಿಂಗಳುಗಳಿಂದ ತಲೆಹೇನುಗಳ ಸಮಸ್ಯೆಯಿಂದ ತೀವ್ರವಾಗಿ ಬಳಲುತ್ತಿದ್ದಳು. ಆರಂಭದಲ್ಲಿ ಇದನ್ನು ಸಾಮಾನ್ಯ ಸಮಸ್ಯೆ ಎಂದು ಭಾವಿಸಿ ನಿರ್ಲಕ್ಷಿಸಲಾಗಿತ್ತು. ಆದರೆ ದಿನ ಕಳೆದಂತೆ ಹೇನುಗಳ ಸಂಖ್ಯೆ ಹೆಚ್ಚಾಗಿ, ಅವು ಆಕೆಯ ತಲೆಬುರುಡೆಯ ಚರ್ಮಕ್ಕೆ ತೀವ್ರ ಹಾನಿ ಉಂಟುಮಾಡಿದ್ದವು.
ಹೇನುಗಳಿಂದ ಮುಕ್ತಿ ಪಡೆಯಲು ತಲೆ ಮುಂಡನೆ ಮಾಡಿಸಿಕೊಳ್ಳುವಂತೆ ಆಕೆಯ ತಾಯಿ ಹಲವು ಬಾರಿ ಸಲಹೆ ನೀಡಿದ್ದರು. ಆದರೆ ಬಾಲಕಿ ಇದಕ್ಕೆ ಒಪ್ಪಿರಲಿಲ್ಲ. ಕಾಲಕ್ರಮೇಣ ತಲೆಯಲ್ಲಿ ಆಳವಾದ ಗಾಯಗಳಾಗಿ ಸೋಂಕು (Infection) ಹರಡಿತು. ಸೋಂಕಿನಿಂದಾಗಿ ಆಕೆಯ ತಲೆಯಿಂದ ದುರ್ನಾತ ಬರಲು ಪ್ರಾರಂಭವಾಯಿತು. ಇದರಿಂದ ಮುಜುಗರಕ್ಕೊಳಗಾದ ಬಾಲಕಿ ಮನೆಯಿಂದ ಹೊರಬರುವುದನ್ನೇ ನಿಲ್ಲಿಸಿದ್ದಳು.
ಮೂರು ದಿನಗಳ ಹಿಂದೆ ಲಕ್ಷ್ಮಿಯ ಆರೋಗ್ಯ ತೀವ್ರವಾಗಿ ಹದಗೆಟ್ಟಿತ್ತು. ಆಕೆಗೆ ವಾಂತಿಯಾಗಲು ಶುರುವಾಗಿ, ವಾಂತಿಯಲ್ಲಿ ರಕ್ತವೂ ಬರಲಾರಂಭಿಸಿತು. ಗಾಬರಿಗೊಂಡ ಪೋಷಕರು ಕೂಡಲೇ ಆಕೆಯನ್ನು ಪುರಿ ಜಿಲ್ಲಾ ಕೇಂದ್ರ ಆಸ್ಪತ್ರೆಗೆ ದಾಖಲಿಸಿದರು. ವೈದ್ಯರು ತಕ್ಷಣ ಚಿಕಿತ್ಸೆ ಆರಂಭಿಸಿದರಾದರೂ, ಸೋಂಕು ಈಗಾಗಲೇ ದೇಹದಾದ್ಯಂತ ವ್ಯಾಪಿಸಿತ್ತು. ವೈದ್ಯರ ಎಲ್ಲಾ ಪ್ರಯತ್ನಗಳ ಹೊರತಾಗಿಯೂ ಚಿಕಿತ್ಸೆ ಪಡೆಯುತ್ತಿದ್ದಾಗಲೇ ಬಾಲಕಿ ಕೊನೆಯುಸಿರೆಳೆದಿದ್ದಾಳೆ.
