newsics.com/ನ್ಯೂಸಿಕ್ಸ್
ಮನೆಯ ಯಜಮಾನ ಅಥವಾ ಪತಿ ಕೆಲಸದ ನಿಮಿತ್ತ ಮನೆಯಿಂದ ಹೊರಗೆ ಹೋದ ತಕ್ಷಣ, ಮನೆಯಲ್ಲಿರುವ ಪತ್ನಿ ಕೆಲವು ಕೆಲಸಗಳನ್ನು ಮಾಡಲೇಬಾರದು ಎಂದು ಜ್ಯೋತಿಷ್ಯ ಶಾಸ್ತ್ರ ಹಾಗೂ ವಾಸ್ತು ನಿಯಮಗಳು ಕಟ್ಟುನಿಟ್ಟಾಗಿ ಎಚ್ಚರಿಸುತ್ತವೆ.
ಈ ನಿಯಮಗಳನ್ನು ನಿರ್ಲಕ್ಷ್ಯ ಮಾಡುವುದರಿಂದ ಮನೆಯಲ್ಲಿ ದಾರಿದ್ರ್ಯ, ಆರ್ಥಿಕ ಸಂಕಷ್ಟ ಹಾಗೂ ಕೌಟುಂಬಿಕ ಕಲಹಗಳು ಎದುರಾಗಬಹುದು.
ಗಂಡ ಕೆಲಸಕ್ಕೆ ಹೋದ ತಕ್ಷಣ ಮಹಿಳೆಯರು ತಮ್ಮ ತಲೆಕೂದಲನ್ನು ಬಿಚ್ಚುವುದು ಅಥವಾ ಬಾಚುವುದನ್ನು ಮಾಡಬಾರದು. ಇದನ್ನು ಶಾಸ್ತ್ರಗಳಲ್ಲಿ ಅತ್ಯಂತ ಅಶುಭ ಎಂದು ಪರಿಗಣಿಸಲಾಗಿದೆ. ಈ ರೀತಿ ಮಾಡುವುದರಿಂದ ಮನೆಯಲ್ಲಿ ಆರ್ಥಿಕ ಬಿಕ್ಕಟ್ಟು ಎದುರಾಗುತ್ತದೆ ಹಾಗೂ ಕೌಟುಂಬಿಕ ವಾತಾವರಣದಲ್ಲಿ ವಿನಾಕಾರಣ ಅಶಾಂತಿ ತಲೆದೋರುತ್ತದೆ.
ತಕ್ಷಣ ಸ್ನಾನ ಮಾಡುವುದು ಬೇಡ
ಕೆಲವು ಮಹಿಳೆಯರಿಗೆ ಗಂಡ ಕೆಲಸಕ್ಕೆ ಹೋದ ಬಳಿಕ ಬಿಡುವು ಸಿಕ್ಕಿತೆಂದು ಸ್ನಾನ ಮಾಡುವ ಅಭ್ಯಾಸವಿರುತ್ತದೆ. ಆದರೆ ಜ್ಯೋತಿಷ್ಯ ಶಾಸ್ತ್ರದ ಪ್ರಕಾರ ಇದು ತಪ್ಪು. ಹಿಂದೂ ಸಂಪ್ರದಾಯದ ನಂಬಿಕೆಯಂತೆ, ಮನೆಯಿಂದ ಶವವನ್ನು ಹೊರತೆಗೆದ ಬಳಿಕವಷ್ಟೇ ಆ ಮನೆಯ ಸದಸ್ಯರು ತಕ್ಷಣ ಸ್ನಾನ ಮಾಡುತ್ತಾರೆ. ಹೀಗಾಗಿ, ಪತಿ ಹೊರಹೋದ ತಕ್ಷಣವೇ ಸ್ನಾನ ಮಾಡುವುದನ್ನು ಶುಭವಲ್ಲವೆಂದು ಹೇಳಲಾಗುತ್ತದೆ.
ಮನೆ ಗುಡಿಸುವುದು ಹಾಗೂ ಸ್ವಚ್ಛಗೊಳಿಸುವುದು
ಕೆಲವು ಮಹಿಳೆಯರು ಗಂಡ ಹೊರಗೆ ಹೋದ ತಕ್ಷಣ ಪೊರಕೆ ಹಿಡಿದು ಮನೆ ಗುಡಿಸಲು ಮತ್ತು ಸ್ವಚ್ಛಗೊಳಿಸಲು ಮುಂದಾಗುತ್ತಾರೆ. ಆದರೆ, ಕುಟುಂಬದ ಯಾವುದೇ ಸದಸ್ಯ ಮನೆಯಿಂದ ಹೊರಹೋದ ತಕ್ಷಣ ಹೀಗೆ ಮನೆ ಸ್ವಚ್ಛಗೊಳಿಸುವುದರಿಂದ ಸಾಕ್ಷಾತ್ ಲಕ್ಷ್ಮಿ ದೇವಿಗೆ ಕೋಪ ಬರುತ್ತದೆ ಎಂಬ ಬಲವಾದ ನಂಬಿಕೆಯಿದೆ. ಸುವರ್ಣನ್ಯೂಸ್ನ ವರದಿಯ ಪ್ರಕಾರ, ಇದರಿಂದ ಪತಿಯ ವೃತ್ತಿಜೀವನದಲ್ಲಿ ಹಾಗೂ ಪ್ರಗತಿಯಲ್ಲಿ ವಿನಾಕಾರಣ ಅಡೆತಡೆಗಳು ಎದುರಾಗಬಹುದು.
ಮನೆ ಮುಂದೆ ನೀರು ಹಾಕುವುದು
ಗಂಡ ಮನೆಯಿಂದ ಹೊರಹೋದ ತಕ್ಷಣ, ಮನೆಯ ಹೊರಾಂಗಣವನ್ನು ತೊಳೆಯುವುದು ಅಥವಾ ಮುಖ್ಯ ದ್ವಾರದ ಅಂಗಳಕ್ಕೆ ನೀರು ಹಾಕುವುದು ಮಾಡಬಾರದು. ಹೀಗೆ ಮಾಡುವುದರಿಂದ ಮನೆಯಲ್ಲಿರುವ ಸಂಪತ್ತು ಹಾಗೂ ಲಕ್ಷ್ಮಿ ಕರಗಿಹೋಗುತ್ತದೆ, ಇದರಿಂದ ಆರ್ಥಿಕ ನಷ್ಟ ಉಂಟಾಗುತ್ತದೆ. ಜೊತೆಗೆ ಇದು ವೈವಾಹಿಕ ಜೀವನದ ಮೇಲೂ ನಕಾರಾತ್ಮಕ ಪ್ರಭಾವ ಬೀರಲಿದೆ.
ಮೇಕಪ್ ಹಾಗೂ ಆಭರಣ ತೆಗೆಯುವ ಮುನ್ನ ಇರಲಿ ಎಚ್ಚರ
ಪತಿ ಹೊರಗೆ ಹೋದ ತಕ್ಷಣವೇ ಕನ್ನಡಿಯ ಮುಂದೆ ನಿಂತು ಅಲಂಕಾರವನ್ನು ಅಳಿಸುವುದು, ಹೊಸ ಮೇಕಪ್ ಮಾಡಿಕೊಳ್ಳುವುದು ಅಥವಾ ಧರಿಸಿರುವ ಆಭರಣಗಳನ್ನು ತೆಗೆಯುವುದು ವಿವಾಹಿತ ಮಹಿಳೆಯರಿಗೆ ಅಶುಭವೆಂದು ಹೇಳಲಾಗುತ್ತದೆ. ಅವರು ಮನೆಯಿಂದ ಹೋಗಿ ಸ್ವಲ್ಪ ಸಮಯ ಕಳೆದ ಬಳಿಕವಷ್ಟೇ ಆಭರಣಗಳನ್ನು ತೆಗೆಯುವುದು ಸೂಕ್ತ.
ಖಾಲಿ ಪಾತ್ರೆಗಳ ದರ್ಶನ ಬೇಡ
ಪತಿ ಮನೆಯಿಂದ ಹೊರಡುವಾಗ ಮನೆಯಲ್ಲಿನ ನೀರಿನ ಬಕೆಟ್ ಅಥವಾ ಪಾತ್ರೆಗಳನ್ನು ಸಂಪೂರ್ಣವಾಗಿ ಖಾಲಿಯಾಗಿ ಬಿಡಬಾರದು. ಒಂದು ವೇಳೆ ನೀರಿನ ಪಾತ್ರೆಗಳು ಖಾಲಿಯಾಗಿದ್ದರೆ, ಅವುಗಳನ್ನು ತಲೆಕೆಳಗಾಗಿ ಇಡಬೇಕು. ಏಕೆಂದರೆ, ಮನೆಯಿಂದ ಶುಭ ಕಾರ್ಯಕ್ಕೆ ಅಥವಾ ಕೆಲಸಕ್ಕೆ ಹೊರಡುವಾಗ ಖಾಲಿ ಪಾತ್ರೆಯನ್ನು ನೋಡುವುದು ಅಪಶಕುನವೆಂದು ಪರಿಗಣಿಸಲಾಗುತ್ತದೆ.
