newsics.com | ನ್ಯೂಸಿಕ್ಸ್
ದಾಂಪತ್ಯ ಎನ್ನುವುದು ಪರಸ್ಪರ ನಂಬಿಕೆ ಮತ್ತು ಗೌರವದ ಮೇಲೆ ನಿಲ್ಲುವ ಸುಂದರ ಸಂಸಾರ. ಆದರೆ ಇತ್ತೀಚಿನ ದಿನಗಳಲ್ಲಿ ಸ್ಮಾರ್ಟ್ಫೋನ್ಗಳ ಅತಿಯಾದ ಬಳಕೆ ಹಾಗೂ ಸಣ್ಣಪುಟ್ಟ ಸಂಶಯಗಳಿಂದಾಗಿ ದಂಪತಿಗಳ ನಡುವೆ ಬಿರುಕು ಮೂಡುತ್ತಿರುವುದು ಸಾಮಾನ್ಯವಾಗಿದೆ.
ಹೌದು, ಸಂಗಾತಿಯ ನಡವಳಿಕೆಯ ಮೇಲೆ ಅನುಮಾನ ಬಂದರೆ ಸಾಕು, ಅವರು ಇಲ್ಲದ ವೇಳೆ ಮೊಬೈಲ್ ಲಾಕ್ ಓಪನ್ ಮಾಡಿ ವಾಟ್ಸಾಪ್, ಇನ್ಸ್ಟಾಗ್ರಾಮ್ ಅಥವಾ ಕಾಲ್ ಹಿಸ್ಟರಿ ಜಾಲಾಡುವ ಅಭ್ಯಾಸ ಹಲವರಿಗಿದೆ. ಆದರೆ, ಮದುವೆಯಾಗಿದೆ ಎಂದ ಮಾತ್ರಕ್ಕೆ ಪತ್ನಿಯ ಫೋನ್ ಪತಿ ಅಥವಾ ಪತಿಯ ಫೋನ್ ಪತ್ನಿ ರಹಸ್ಯವಾಗಿ ಪರಿಶೀಲಿಸಬಹುದೇ? ಈ ಡಿಜಿಟಲ್ ಜಗತ್ತಿನಲ್ಲಿ ಭಾರತೀಯ ಕಾನೂನು ವೈಯಕ್ತಿಕ ಗೌಪ್ಯತೆಗೆ ಎಷ್ಟು ಪ್ರಾಮುಖ್ಯತೆ ನೀಡುತ್ತದೆ ಎಂಬ ಮಾಹಿತಿ ಇಲ್ಲಿದೆ.
ಹಲವು ದಂಪತಿಗಳಲ್ಲಿ ಒಂದು ತಪ್ಪು ಕಲ್ಪನೆ ಮನೆಮಾಡಿದೆ. ಮದುವೆಯಾದ ಬಳಿಕ ಸಂಗಾತಿಯ ಪ್ರತಿಯೊಂದು ವಸ್ತುವೂ ತಮಗೆ ಸೇರಿದ್ದು, ಅವರ ವೈಯಕ್ತಿಕ ವಿಚಾರಗಳನ್ನೆಲ್ಲಾ ತಿಳಿಯುವ ಹಕ್ಕು ತಮಗಿದೆ ಎಂದು ಭಾವಿಸುತ್ತಾರೆ. ಆದರೆ ಕಾನೂನು ಇದನ್ನು ಒಪ್ಪುವುದಿಲ್ಲ. ವೈವಾಹಿಕ ಬಂಧದಲ್ಲೂ ಪ್ರತಿಯೊಬ್ಬರಿಗೂ ತಮ್ಮದೇ ಆದ ವೈಯಕ್ತಿಕ ಸ್ವಾತಂತ್ರ್ಯ ಹಾಗೂ ಖಾಸಗಿ ಬದುಕು ಇರುತ್ತದೆ. ಸಂಗಾತಿಯ ಒಪ್ಪಿಗೆಯಿಲ್ಲದೆ ಅವರ ಫೋನ್ ಮುಟ್ಟುವುದು ಕೂಡ ತಪ್ಪು ಎಂಬುದು ನೆನಪಿರಲಿ.
ಭಾರತೀಯ ಸಂವಿಧಾನವು ದೇಶದ ಪ್ರತಿಯೊಬ್ಬ ನಾಗರಿಕನಿಗೂ ಗೌಪ್ಯತೆಯ ಮೂಲಭೂತ ಹಕ್ಕನ್ನು (Right to Privacy) ನೀಡಿದೆ. ಸಂವಿಧಾನದ ವಿಧಿ 21ರ (Article 21) ಅಡಿಯಲ್ಲಿ ಬರುವ ಈ ಹಕ್ಕು, ಮದುವೆಯಾದ ತಕ್ಷಣವೇ ಕೊನೆಗೊಳ್ಳುವುದಿಲ್ಲ. ಗಂಡನಾಗಲಿ ಅಥವಾ ಹೆಂಡತಿಯಾಗಲಿ, ಸಂಗಾತಿಯ ಅನುಮತಿ ಇಲ್ಲದೆ ಅವರ ಡಿಜಿಟಲ್ ದಾಖಲೆಗಳನ್ನು ಪರಿಶೀಲಿಸಲು ಕಾನೂನಿನಲ್ಲಿ ಅವಕಾಶವಿಲ್ಲ. ಅವರ ವಾಟ್ಸಾಪ್ ಮೆಸೇಜ್ಗಳು, ಇಮೇಲ್ಗಳು ಅಥವಾ ಗ್ಯಾಲರಿಯಲ್ಲಿರುವ ಫೋಟೋಗಳನ್ನು ಕದ್ದು ನೋಡುವುದು ನೇರವಾಗಿ ಮೂಲಭೂತ ಹಕ್ಕಿನ ಉಲ್ಲಂಘನೆಯಾಗುತ್ತದೆ.
ಇನ್ನು, ಸಾಮಾಜಿಕ ಜಾಲತಾಣಗಳಾದ ಫೇಸ್ಬುಕ್, ಇನ್ಸ್ಟಾಗ್ರಾಮ್ ಖಾತೆಗಳ ಮೇಲೆ ಕಣ್ಣಿಡಲು ಸಂಗಾತಿಯನ್ನು ಪೀಡಿಸುವುದು ಇತ್ತೀಚಿನ ದಿನಗಳಲ್ಲಿ ಹೆಚ್ಚಾಗಿದೆ. ಆದರೆ, ಯಾವುದೇ ವ್ಯಕ್ತಿಯು ತನ್ನ ಸೋಶಿಯಲ್ ಮೀಡಿಯಾ ಖಾತೆಯ ಪಾಸ್ವರ್ಡ್ ಅನ್ನು ಹಂಚಿಕೊಳ್ಳುವಂತೆ ಸಂಗಾತಿಯನ್ನು ಒತ್ತಾಯಿಸುವುದು, ಬ್ಲ್ಯಾಕ್ಮೇಲ್ ಮಾಡುವುದು ಅಥವಾ ಬಲವಂತಪಡಿಸುವುದು ಕಾನೂನುಬಾಹಿರ ಚಟುವಟಿಕೆಯಾಗಿದೆ.
ದಾಂಪತ್ಯದಲ್ಲಿ ಸಂಶಯದ ಬಲೆ ಹೆಣೆಯುವ ಮುನ್ನ ಕಾನೂನಿನ ಈ ನಿಯಮಗಳನ್ನು ಅರಿತುಕೊಳ್ಳುವುದು ಒಳಿತು. ಮೊಬೈಲ್ ಪ್ರೈವೆಸಿಗೆ ಗೌರವ ನೀಡುವುದು ಸಂವಿಧಾನದ ಆಶಯ ಮಾತ್ರವಲ್ಲ, ಸಂಸಾರದ ನೆಮ್ಮದಿಗೂ ದಾರಿಯಾಗಿದೆ.
