newsics.com/ನ್ಯೂಸಿಕ್ಸ್
ವರದಕ್ಷಿಣೆ ಪಡೆಯದೆ ವಿವಾಹವಾಗಲು ಹೊರಟ ವರನಿಗೆ ಸ್ವತಃ ವಧುವೇ ವಂಚಿಸಿ, ಮದುವೆಯ ಮೊದಲ ರಾತ್ರಿಯೇ ಕೋಟ್ಯಂತರ ರೂಪಾಯಿ ಮೌಲ್ಯದ ಚಿನ್ನಾಭರಣ ಹಾಗೂ ನಗದಿನೊಂದಿಗೆ ಪರಾರಿಯಾಗಿರುವ ಘಟನೆ ಬಿಹಾರದ ಪಾಟ್ನಾ ಜಿಲ್ಲೆಯ ಬರಾಹ್ ಉಪವಿಭಾಗದ ‘ಅಲ್ವಲ್ಪುರ್’ ಗ್ರಾಮದಲ್ಲಿ ನಡೆದಿದೆ.
ಅಲ್ವಲ್ಪುರ್ ಗ್ರಾಮದ ನಿವಾಸಿ ರಾಹುಲ್ ಕುಮಾರ್ (೨೬) ಎಂಬ ಸಾಮಾನ್ಯ ಉದ್ಯೋಗಿಗೆ ನೆರೆಯ ‘ರಾಮ್ನಗರ’ ಗ್ರಾಮದ ರಾಣಿ ಕುಮಾರಿ (೨೨) ಎಂಬಾಕೆಯೊಂದಿಗೆ ಮದುವೆ ನಿಶ್ಚಯವಾಗಿತ್ತು.
ರಾಣಿ ನೋಡಲು ಸುಂದರವಾಗಿದ್ದಷ್ಟೇ ಅಲ್ಲದೆ, ಆಕೆಯ ಸೌಮ್ಯ ಮಾತುಗಳಿಗೆ ರಾಹುಲ್ ಕುಟುಂಬ ಸಂಪೂರ್ಣವಾಗಿ ಮಾರುಹೋಗಿತ್ತು. ಪ್ರಗತಿಪರ ಆಲೋಚನೆಯ ರಾಹುಲ್, ನನಗೆ ವರದಕ್ಷಿಣೆ ಬೇಡ, ಹುಡುಗಿ ಮಾತ್ರ ಸಾಕು ಎಂದು ಮದುವೆಗೆ ಒಪ್ಪಿಕೊಂಡಿದ್ದನು. ವರದಕ್ಷಿಣೆ ಇಲ್ಲದೆ ಮದುವೆಗೆ ಒಪ್ಪಿದ ವರನ ಗುಣವನ್ನು ರಾಮ್ನಗರ ಗ್ರಾಮಸ್ಥರೆಲ್ಲರೂ ಕೊಂಡಾಡಿದ್ದರು.
ಕಳೆದ ವಾರ ಇವರಿಬ್ಬರ ವಿವಾಹ ಮಹೋತ್ಸವ ರಾಮ್ನಗರದ ಕಲ್ಯಾಣ ಮಂಟಪದಲ್ಲಿ ಅತ್ಯಂತ ವೈಭವದಿಂದ ನೆರವೇರಿತು. ರಾಹುಲ್ ಪೋಷಕರು ತಮ್ಮ ಒಬ್ಬನೇ ಮಗನ ಮದುವೆಯನ್ನು ಸಂಭ್ರಮದಿಂದ ಆಚರಿಸಿ, ಸೊಸೆಗಾಗಿ ಲಕ್ಷಾಂತರ ರೂಪಾಯಿ ಮೌಲ್ಯದ ಚಿನ್ನದ ಸರ, ಬಳೆ, ಓಲೆ ಮತ್ತು ಬೆಳ್ಳಿಯ ಆಭರಣಗಳನ್ನು ಮಾಡಿಸಿದ್ದರು.
ಮದುವೆಯ ನಂತರದ ಆಚರಣೆಗಳು ಮುಗಿದು, ಮೊದಲ ರಾತ್ರಿಯ ಸಂಭ್ರಮಕ್ಕಾಗಿ ಕೋಣೆಯನ್ನು ಅಲಂಕರಿಸಲಾಗಿತ್ತು. ರಾಹುಲ್ ನೂರಾರು ಕನಸುಗಳೊಂದಿಗೆ ಕೋಣೆಯನ್ನು ಪ್ರವೇಶಿಸಿದ ತಕ್ಷಣ ವಧು ರಾಣಿ ನಾಟಕವಾಡಲು ಶುರುಮಾಡಿದ್ದಾಳೆ. ತಲೆನೋವು ಮತ್ತು ಪ್ರಯಾಣದ ಆಯಾಸದಿಂದ ತುಂಬಾ ಸುಸ್ತಾಗಿದೆ ಎಂದು ಹೇಳಿ ಮಲಗಿಕೊಂಡಿದ್ದಾಳೆ. ರಾಹುಲ್ ಕೂಡ ಆಕೆಯನ್ನು ನಂಬಿ ಕೋಣೆಯ ಒಂದು ಬದಿಯಲ್ಲಿ ನಿದ್ರೆಗೆ ಜಾರಿದ್ದಾನೆ. ರಾಹುಲ್ ಗಾಢ ನಿದ್ರೆಗೆ ಜಾರಿದ್ದನ್ನು ಖಚಿತಪಡಿಸಿಕೊಂಡ ರಾಣಿ, ಮಧ್ಯರಾತ್ರಿ ೨ ಗಂಟೆಯ ಸುಮಾರಿಗೆ ತನ್ನ ಅಸಲಿ ರೂಪ ತೋರಿಸಿದ್ದಾಳೆ.
ಕಪಾಟಿನ ಕೀಲಿಯನ್ನು ತೆಗೆದು, ಮದುವೆಗೆ ತಂದಿದ್ದ ಚಿನ್ನಾಭರಣಗಳು, ಬೆಳ್ಳಿ ವಸ್ತುಗಳು ಮತ್ತು ಒಟ್ಟು ೮೦,೦೦೦ ರೂಪಾಯಿ ನಗದನ್ನು ಬ್ಯಾಗ್ಗೆ ತುಂಬಿಸಿಕೊಂಡಿದ್ದಾಳೆ. ತಾನು ಧರಿಸಿದ್ದ ಒಡವೆಗಳನ್ನೂ ಬಿಡದಂತೆ ಪ್ಯಾಕ್ ಮಾಡಿಕೊಂಡು, ಯಾರಿಗೂ ಅನುಮಾನ ಬಾರದಂತೆ ಮನೆಯ ಹಿಂಬಾಗಿಲಿನಿಂದ ಕತ್ತಲಲ್ಲಿ ಮಾಯವಾಗಿದ್ದಾಳೆ. ಆಕೆಯನ್ನು ಕರೆದೊಯ್ಯಲು ಗ್ರಾಮದ ಹೊರಗೆ ಬೈಕ್ನಲ್ಲಿ ಯಾರೋ ಕಾಯುತ್ತಿದ್ದರು ಎಂದು ಹೇಳಲಾಗಿದೆ.
ಬೆಳಗ್ಗೆ ಸೂರ್ಯ ಮೂಡಿದರೂ ರಾಹುಲ್ ಕೋಣೆಯಿಂದ ಹೊರಬಂದಿರಲಿಲ್ಲ. ಕೊನೆಗೆ ತಾಯಿ ಬಂದು ಕದ ತಟ್ಟಿದಾಗ ರಾಹುಲ್ ಕಣ್ಣು ಬಿಟ್ಟಿದ್ದಾನೆ. ಸುತ್ತಲೂ ನೋಡಿದಾಗ ಪತ್ನಿ ಕಾಣಿಸದಿದ್ದಾಗ ಶೌಚಾಲಯಕ್ಕೆ ಹೋಗಿರಬಹುದು ಎಂದು ಭಾವಿಸಿದ್ದಾರೆ. ಆದರೆ ಎಷ್ಟು ಸಮಯ ಕಳೆದರೂ ಆಕೆ ಬಾರದಿದ್ದಾಗ ಅನುಮಾನಗೊಂಡು ಕಪಾಟನ್ನು ಪರಿಶೀಲಿಸಿದಾಗ ರಾಹುಲ್ ಕುಟುಂಬಕ್ಕೆ ಆಕಾಶವೇ ತಲೆಮೇಲೆ ಬಿದ್ದಂತಾಗಿದೆ. ಕಪಾಟಿನ ಬೀಗ ಮುರಿದು ಒಳಗಿದ್ದ ಒಡವೆ, ನಗದು ಕಳುವಾಗಿತ್ತು. ರಾಣಿಯ ಫೋನ್ಗೆ ಕರೆ ಮಾಡಿದರೆ ಅದು ‘ಸ್ವಿಚ್ ಆಫ್’ ಆಗಿತ್ತು. ತಮಗೆ ಭಾರಿ ವಂಚನೆಯಾಗಿರುವುದು ಆಗಲೇ ರಾಹುಲ್ ಕುಟುಂಬಕ್ಕೆ ಅರಿವಾಗಿದೆ.
ನಂಬಿ ಮೋಸಹೋದ ರಾಹುಲ್ ತಕ್ಷಣ ಅಲ್ವಲ್ಪುರ ಪೊಲೀಸ್ ಠಾಣೆಗೆ ತೆರಳಿ ವಧು ರಾಣಿ ಕುಮಾರಿ ವಿರುದ್ಧ ವಂಚನೆ ಮತ್ತು ಕಳ್ಳತನದ ದೂರು ದಾಖಲಿಸಿದ್ದಾರೆ. ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ರಾಮ್ನಗರದಲ್ಲಿರುವ ವಧುವಿನ ಮನೆಗೆ ತೆರಳಿ ವಿಚಾರಣೆ ನಡೆಸಿದ್ದಾರೆ. ಆದರೆ ಆಕೆಯ ಪೋಷಕರು, “ನಮಗೂ ಇದಕ್ಕೂ ಯಾವುದೇ ಸಂಬಂಧವಿಲ್ಲ, ಅವಳು ಎಲ್ಲಿಗೆ ಹೋಗಿದ್ದಾಳೆಂಬುದು ನಮಗೂ ಗೊತ್ತಿಲ್ಲ” ಎಂದು ಕೈತೊಳೆದುಕೊಂಡಿದ್ದಾರೆ. ಪೊಲೀಸರು ಇದು ಯೋಜಿತ ‘ಲೂಟೇರಿ ವಧು’ (ವಧು ದರೋಡೆಕೋರರ) ಗ್ಯಾಂಗ್ನ ಕೆಲಸ ಇರಬಹುದು ಎಂದು ಶಂಕಿಸಿದ್ದು, ರಾಣಿಯ ಮೊಬೈಲ್ ಲೊಕೇಶನ್ ಮತ್ತು ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿ ತನಿಖೆಯನ್ನು ತೀವ್ರಗೊಳಿಸಿದ್ದಾರೆ.
ಅಕ್ರಮ ಸಂಬಂಧಕ್ಕೆ ಅಡ್ಡಿಯಾದ ಗಂಡನನ್ನು ಕೊಂದು, ಜೆಸಿಬಿಯಿಂದ ಶವ ಹೂತ ಪತ್ನಿ ಪ್ರಿಯಕರ
