newsics.com | ನ್ಯೂಸಿಕ್ಸ್
ಮುಂಬೈ: ಭಾರತದ ದ್ವಿಚಕ್ರ ವಾಹನ ತಯಾರಿಕಾ ಸಂಸ್ಥೆಯಾದ ‘ಟಿವಿಎಸ್ ಮೋಟಾರ್ಸ್’, ದೇಶಿ ಆಟೋಮೊಬೈಲ್ ಇತಿಹಾಸ ಸೃಷ್ಟಿಸಿದೆ. ಜೂನ್ 2026 ರ ಜಾಗತಿಕ ಮಾರಾಟದ ಇತ್ತೀಚಿನ ವರದಿಗಳ ಪ್ರಕಾರ, ಇದುವರೆಗೆ ದೇಶದ ಮಾರುಕಟ್ಟೆಯನ್ನು ಆಳುತ್ತಿದ್ದ ಹೀರೋ ಮೋಟೋಕಾರ್ಪ್ ಹಾಗೂ ಹೋಂಡಾ ಸಂಸ್ಥೆಗಳನ್ನು ಹಿಂದಿಕ್ಕಿರುವ ಟಿವಿಎಸ್, ಭಾರತದ ಅತ್ಯಂತ ದೊಡ್ಡ ಟೂ-ವ್ಹೀಲರ್ ಕಂಪನಿಯಾಗಿ ಜಾಗತಿಕ ಮಟ್ಟದಲ್ಲಿ ಹೊರಹೊಮ್ಮಿದೆ.
ಕಳೆದ ಜೂನ್ ತಿಂಗಳ ಅವಧಿಯಲ್ಲಿ ಟಿವಿಎಸ್ ಸಂಸ್ಥೆಯು ಬರೋಬ್ಬರಿ 5,65,417 ಬೈಕ್ ಹಾಗೂ ಸ್ಕೂಟರ್ಗಳನ್ನು ಮಾರಾಟ ಮಾಡುವ ಮೂಲಕ ವಾರ್ಷಿಕವಾಗಿ ಶೇ. 47 ರಷ್ಟು ಪ್ರಗತಿ ಕಂಡಿದೆ. ಇದೇ ತಿಂಗಳಲ್ಲಿ ಹೀರೋ ಮೋಟೋಕಾರ್ಪ್ 5,41,159 ವಾಹನಗಳನ್ನು ಹಾಗೂ ಹೋಂಡಾ ಕಂಪನಿಯು 5,28,281 ಯುನಿಟ್ಗಳನ್ನು ಮಾರಾಟ ಮಾಡಿದ್ದು, ಇವೆರಡನ್ನೂ ಮೀರಿಸಿ ಟಿವಿಎಸ್ ಮೊದಲ ಸ್ಥಾನವನ್ನು ಮುಟ್ಟಿದೆ. ವಿಶೇಷವೆಂದರೆ, ಈ ಲೆಕ್ಕಾಚಾರದಲ್ಲಿ ಮೊಪೆಡ್ಗಳ ಮಾರಾಟವನ್ನು ಪರಿಗಣಿಸಿಲ್ಲ. ಕೇವಲ ಪ್ರಮುಖ ಮೋಟಾರ್ಸೈಕಲ್ ಹಾಗೂ ಸ್ಕೂಟರ್ಗಳ ಮಾರಾಟದ ಬಲದಿಂದಲೇ ಟಿವಿಎಸ್ ಈ ಐತಿಹಾಸಿಕ ಮೈಲಿಗಲ್ಲು ತಲುಪಿದೆ.
ದೇಶದ ಒಳಗಿನ ವ್ಯಾಪಾರಕ್ಕಿಂತಲೂ ಹೆಚ್ಚಾಗಿ ವಿದೇಶಿ ಮಾರುಕಟ್ಟೆಯಲ್ಲಿ ಟಿವಿಎಸ್ ಸೃಷ್ಟಿಸಿರುವ ಭದ್ರ ಬುನಾದಿಯೇ ಈ ಮಹತ್ವದ ಬದಲಾವಣೆಗೆ ಕಾರಣ. ಜೂನ್ ತಿಂಗಳೊಂದರಲ್ಲೇ ಸಂಸ್ಥೆಯು 1,72,355 ದ್ವಿಚಕ್ರ ವಾಹನಗಳನ್ನು ರಫ್ತು ಮಾಡಿದೆ. ಗಮನಿಸಬೇಕಾದ ಅಂಶವೆಂದರೆ, ಈ ರಫ್ತಿನ ಪ್ರಮಾಣವು ಹೀರೋ (38,269 ಯುನಿಟ್) ಮತ್ತು ಹೋಂಡಾ (59,325 ಯುನಿಟ್) ಎರಡೂ ಕಂಪನಿಗಳ ಒಟ್ಟು ರಫ್ತಿಗಿಂತಲೂ (97,594 ಯುನಿಟ್) ಹಿರಿದಾಗಿದೆ. ಆದಾಗ್ಯೂ, ಕೇವಲ ರಫ್ತು ವ್ಯವಹಾರವನ್ನಷ್ಟೇ ಗಮನಿಸಿದರೆ ಬಜಾಜ್ ಆಟೋ ಸಂಸ್ಥೆಯು 2,22,439 ವಾಹನಗಳನ್ನು ವಿದೇಶಕ್ಕೆ ಕಳುಹಿಸಿ ಮೊದಲ ಸ್ಥಾನ ಕಾಯ್ದುಕೊಂಡಿದೆ.
ಸದ್ಯ ಜಾಗತಿಕ ಮಟ್ಟದಲ್ಲಿ ಮೂರನೇ ಅತಿ ದೊಡ್ಡ ದ್ವಿಚಕ್ರ ವಾಹನ ಉತ್ಪಾದಕ ಸಂಸ್ಥೆಯಾಗಿ ಟಿವಿಎಸ್ ಬೆಳೆದು ನಿಂತಿದೆ. ಕಂಪನಿಯ ವಾರ್ಷಿಕ ವರದಿಗಳ ಪ್ರಕಾರ, ಏಷ್ಯಾ, ಆಫ್ರಿಕಾ ಮತ್ತು ಲ್ಯಾಟಿನ್ ಅಮೆರಿಕ ಖಂಡಗಳ ಒಟ್ಟು 90ಕ್ಕೂ ಹೆಚ್ಚು ದೇಶಗಳಲ್ಲಿ ಟಿವಿಎಸ್ ಬ್ರ್ಯಾಂಡ್ ವಿಸ್ತರಿಸಿದೆ. ಪ್ರಸಕ್ತ ಸಾಲಿನ ಕಂಪನಿಯ ಒಟ್ಟು ಆದಾಯದಲ್ಲಿ ಶೇಕಡಾ 25 ರಷ್ಟು ಹಣ ಕೇವಲ ಅಂತಾರಾಷ್ಟ್ರೀಯ ಮಾರುಕಟ್ಟೆಯಿಂದಲೇ ಹರಿದುಬರುತ್ತಿದೆ.
ಭಾರತದ ಆಂತರಿಕ ಮಾರಾಟವನ್ನು ಮಾತ್ರ ಲೆಕ್ಕ ಹಾಕಿದಾಗ ಹೀರೋ ಮೋಟೋಕಾರ್ಪ್ 5,02,890 ವಾಹನಗಳ ಮಾರಾಟದೊಂದಿಗೆ ಇಂದಿಗೂ ಮೊದಲ ಸ್ಥಾನದಲ್ಲಿದೆ. ದ್ವಿತೀಯ ಸ್ಥಾನದಲ್ಲಿರುವ ಹೋಂಡಾ 4,68,956 ವಾಹನಗಳನ್ನು ದೇಶದೊಳಗೆ ಮಾರಾಟ ಮಾಡಿದೆ. ಟಿವಿಎಸ್ ಕಂಪನಿಯು 4,11,014 ವಾಹನಗಳೊಂದಿಗೆ ಭಾರತದಲ್ಲಿ ಮೂರನೇ ಸ್ಥಾನದಲ್ಲಿದ್ದರೂ, ಶೇ. 46 ರಷ್ಟು ಭಾರಿ ಪ್ರಗತಿ ಸಾಧಿಸಿದೆ. ದೇಶದ ಗಡಿಯೊಳಗೆ ಮೂರನೇ ಸ್ಥಾನದಲ್ಲಿದ್ದರೂ, ವಿದೇಶಿ ಮಾರುಕಟ್ಟೆಯ ರಫ್ತು ಬಲದಿಂದಾಗಿ ಒಟ್ಟಾರೆ ‘ಜಾಗತಿಕ ಮಾರಾಟ’ದಲ್ಲಿ ಟಿವಿಎಸ್ ಪ್ರಥಮ ಬಾರಿಗೆ ನಂ.1 ಕಿರೀಟ ಮುಡಿಗೇರಿಸಿಕೊಂಡಿದೆ.
Road Mishap ಭೀಕರ ಅಪಘಾತ: ಲಾರಿಗೆ ಡಿಕ್ಕಿ ಹೊಡೆದ ಬಸ್, ಚಾಲಕ ಸೇರಿ ಇಬ್ಬರು ಸ್ಥಳದಲ್ಲೇ ಸಾ*ವು
