newsics.com| ನ್ಯೂಸಿಕ್ಸ್
ಬೆಂಗಳೂರು: ಇಂದಿನ ಆಧುನಿಕ ಹಾಗೂ ವೇಗದ ಜೀವನಶೈಲಿಯಲ್ಲಿ ಅನೇಕರು ಬೆಳಗಿನ ಸಮಯವನ್ನು ಸರಿಯಾಗಿ ನಿರ್ವಹಿಸದೆ ನಿರ್ಲಕ್ಷಿಸುತ್ತಾರೆ. ಆದರೆ ವೈದ್ಯಕೀಯ ತಜ್ಞರ ಪ್ರಕಾರ, ಬೆಳಗ್ಗೆ ನಿದ್ರೆಯಿಂದ ಎದ್ದ ನಂತರದ ಮೊದಲ 60 ರಿಂದ 90 ನಿಮಿಷಗಳು ಅತ್ಯಂತ ನಿರ್ಣಾಯಕವಾಗಿವೆ. ಈ ಸಮಯವು ಇಡೀ ದಿನದ ನಮ್ಮ ದೈಹಿಕ ಮತ್ತು ಮಾನಸಿಕ ಆರೋಗ್ಯದ ಮೇಲೆ ಮಹತ್ತರವಾದ ಪರಿಣಾಮ ಬೀರುತ್ತದೆ.
ಹೈದರಾಬಾದ್ನ ಅಪೋಲೋ ಆಸ್ಪತ್ರೆಯ ಪ್ರಸಿದ್ಧ ನ್ಯೂರಾಲಜಿಸ್ಟ್ ಡಾ. ಸುಧೀರ್ ಕುಮಾರ್ (Dr Sudhir Kumar M) ಅವರು ಹೇಳುವ ಪ್ರಕಾರ, ಮುಂಜಾನೆಯ ಸಮಯದಲ್ಲಿ ನಾವು ಅನುಸರಿಸುವ ಕೆಲವು ಆರೋಗ್ಯಕರ ಅಭ್ಯಾಸಗಳು ನಮ್ಮ ದೇಹದ ಜೈವಿಕ ಗಡಿಯಾರವನ್ನು (Circadian Rhythm) ಸಮತೋಲನದಲ್ಲಿಡುತ್ತವೆ. ಇದರಿಂದ ದಿನವಿಡೀ ದೇಹದಲ್ಲಿ ಶಕ್ತಿ, ಏಕಾಗ್ರತೆ ಹೆಚ್ಚುವುದಲ್ಲದೆ, ರಾತ್ರಿ ಉತ್ತಮ ನಿದ್ರೆ ಬರಲು ಸಹಕಾರಿಯಾಗುತ್ತದೆ.
ದಿನವನ್ನು ಆರೋಗ್ಯಕರವಾಗಿ ಆರಂಭಿಸಲು ವೈದ್ಯರು ನೀಡಿರುವ ಪ್ರಮುಖ ಸಲಹೆಗಳು ಇಲ್ಲಿವೆ.
1. ಸೂರ್ಯನ ಬೆಳಕಿಗೆ ಒಡ್ಡಿಕೊಳ್ಳಿ
ಬೆಳಗ್ಗೆ ಎದ್ದ 30 ರಿಂದ 60 ನಿಮಿಷಗಳ ಒಳಗೆ ಕನಿಷ್ಠ 10 ರಿಂದ 20 ನಿಮಿಷಗಳ ಕಾಲ ನೈಸರ್ಗಿಕ ಸೂರ್ಯನ ಬೆಳಕಿನಲ್ಲಿ ಸಮಯ ಕಳೆಯಬೇಕು. ಇದು ದೇಹದಲ್ಲಿ ‘ಕಾರ್ಟಿಸೋಲ್’ ಹಾರ್ಮೋನ್ನ ಆರೋಗ್ಯಕರ ಬಿಡುಗಡೆಯನ್ನು ಉತ್ತೇಜಿಸಿ, ಇಡೀ ದಿನ ಚೈತನ್ಯದಿಂದ ಇರಲು ಸಹಾಯ ಮಾಡುತ್ತದೆ.
2. ಎದ್ದ ತಕ್ಷಣ ಕಾಫಿ-ಟೀ ಕುಡಿಯಬೇಡಿ
ಅನೇಕರಿಗೆ ಬೆಳಗ್ಗೆ ಕಣ್ಣು ಬಿಡುತ್ತಲೇ ಕಾಫಿ ಅಥವಾ ಚಹಾ ಕುಡಿಯುವ ಅಭ್ಯಾಸವಿರುತ್ತದೆ. ಆದರೆ ಇದನ್ನು ತಪ್ಪಿಸಬೇಕು. ಎದ್ದ ಕನಿಷ್ಠ 60 ರಿಂದ 90 ನಿಮಿಷಗಳ ನಂತರ ಕೆಫೀನ್ ಸೇವನೆ ಮಾಡುವುದರಿಂದ ದೇಹದ ಸಹಜ ಶಕ್ತಿ ಮಟ್ಟವು ಸಮತೋಲನದಲ್ಲಿರುತ್ತದೆ.
3. ಮೊದಲು ನೀರು ಕುಡಿಯಿರಿ
ರಾತ್ರಿಯ ನಿದ್ರೆಯ ಅವಧಿಯಲ್ಲಿ ದೇಹದಲ್ಲಿ ನೀರಿನಂಶ ಕಡಿಮೆಯಾಗಿರುತ್ತದೆ. ಆದ್ದರಿಂದ ಬೆಳಗ್ಗೆ ಎದ್ದ ತಕ್ಷಣ ಸುಮಾರು 500 ಮಿ.ಲೀ. ನೀರು ಕುಡಿಯುವುದರಿಂದ ದೇಹವು ಮರುಹೊಂದಾಣಿಕೆ ಪಡೆದು (Rehydrate), ದಿನದ ಆರಂಭದಲ್ಲೇ ಚುರುಕುಗೊಳ್ಳುತ್ತದೆ.
4. ವ್ಯಾಯಾಮ ಅತ್ಯಗತ್ಯ
ಬೆಳಗ್ಗೆ ಎದ್ದ ತಕ್ಷಣ ಭಾರಿ ಕಸರತ್ತು ಮಾಡಬೇಕಾಗಿಲ್ಲ. ಕೇವಲ ಲಘು ಸ್ಟ್ರೆಚಿಂಗ್ ಅಥವಾ ಸಣ್ಣ ವಾಕಿಂಗ್ ಮಾಡಿದರೆ ಸಾಕು. ಇದು ಮೆದುಳಿಗೆ ‘ದಿನ ಆರಂಭವಾಗಿದೆ’ ಎಂಬ ಸ್ಪಷ್ಟ ಸಂದೇಶವನ್ನು ರವಾನಿಸಿ, ಏಕಾಗ್ರತೆ ಮತ್ತು ಕಾರ್ಯಕ್ಷಮತೆಯನ್ನು ಹೆಚ್ಚಿಸುತ್ತದೆ.
5. ಮೊಬೈಲ್ ಬಳಕೆಗೆ ಬ್ರೇಕ್ ಹಾಕಿ
ಎದ್ದ ತಕ್ಷಣ ಸಾಮಾಜಿಕ ಜಾಲತಾಣಗಳನ್ನು ಜಾಲಾಡುವುದು ಅಥವಾ ಇಮೇಲ್ಗಳನ್ನು ನೋಡುವುದರಿಂದ ಮಾನಸಿಕ ಒತ್ತಡ ಹೆಚ್ಚಾಗುತ್ತದೆ. ಆದ್ದರಿಂದ ದಿನದ ಮೊದಲ ಒಂದು ಗಂಟೆ ಕಾಲ ಮೊಬೈಲ್ ಫೋನ್ನಿಂದ ದೂರವಿರುವುದು ಮಾನಸಿಕ ಶಾಂತಿಗೆ ಒಳ್ಳೆಯದು.
6. ಅಲಾರಂ ಸ್ನೂಜ್ ಮಾಡಬೇಡಿ
ಬೆಳಗ್ಗೆ ಅಲಾರಂ ಬಾರಿಸಿದಾಗ ಮತ್ತೆ ಮತ್ತೆ ‘ಸ್ನೂಜ್’ ಬಟನ್ ಒತ್ತುವ ಅಭ್ಯಾಸ ನಿಮಗಿದ್ದರೆ ಇಂದೇ ಬಿಟ್ಟುಬಿಡಿ. ಈ ರೀತಿ ಮಾಡುವುದರಿಂದ ಮೆದುಳು ಗೊಂದಲಕ್ಕೊಳಗಾಗಿ, ದಿನವಿಡೀ ದಣಿವು ಮತ್ತು ಮಂಕುತನ ಆವರಿಸಿಕೊಳ್ಳುವಂತೆ ಮಾಡುತ್ತದೆ.
7. ಪೌಷ್ಟಿಕಯುಕ್ತ ಉಪಹಾರ ಸೇವಿಸಿ
ಬೆಳಗಿನ ಉಪಹಾರದಲ್ಲಿ ಸಕ್ಕರೆ ಅಂಶ ಹೆಚ್ಚಿರುವ ಆಹಾರಗಳನ್ನು ಸೇವಿಸುವ ಬದಲು, ಪ್ರೋಟೀನ್ ಮತ್ತು ಆರೋಗ್ಯಕರ ಕೊಬ್ಬಿನಂಶವಿರುವ ಸಮತೋಲಿತ ಆಹಾರವನ್ನು ಆಯ್ಕೆ ಮಾಡಿಕೊಳ್ಳಿ. ಇದು ನಿಮ್ಮ ದೇಹಕ್ಕೆ ದಿನವಿಡೀ ಅಗತ್ಯವಿರುವ ಸ್ಥಿರವಾದ ಶಕ್ತಿಯನ್ನು ಒದಗಿಸುತ್ತದೆ.
ಈ ಸರಳ ಅಭ್ಯಾಸಗಳನ್ನು ಪ್ರತಿದಿನ ನಿಯಮಿತವಾಗಿ ಪಾಲಿಸುವುದರಿಂದ ಉತ್ತಮ ಆರೋಗ್ಯ, ಸ್ಥಿರವಾದ ಮನಸ್ಥಿತಿ ಮತ್ತು ರಾತ್ರಿಯ ಸುಖಕರ ನಿದ್ರೆಯನ್ನು ನಿಮ್ಮದಾಗಿಸಿಕೊಳ್ಳಬಹುದು.
