newsics.com| ನ್ಯೂಸಿಕ್ಸ್
ಪಶ್ಚಿಮ ಬಂಗಾಳದ ಕೊನ್ನಗರದ ಕುಟುಂಬವೊಂದು ತಮ್ಮ 13 ವರ್ಷದ ‘ಮಿಠೂ’ ಗಿಳಿಯ ಜೀವ ಉಳಿಸಲು ಹೋರಾಡುತ್ತಿದೆ. ಗಿಳಿಯ ಹೊಟ್ಟೆಯಲ್ಲಿ ದೊಡ್ಡ ಮೊಟ್ಟೆಯೊಂದು ಸಿಲುಕಿಕೊಂಡಿದ್ದು, ಕೊಲ್ಕತ್ತಾದಲ್ಲಿ ಚಿಕಿತ್ಸೆ ಲಭ್ಯವಿಲ್ಲದ ಕಾರಣ, ತುರ್ತು ಶಸ್ತ್ರಚಿಕಿತ್ಸೆಗಾಗಿ ಕುಟುಂಬವು ಅದನ್ನು ದೆಹಲಿಗೆ ಕರೆದೊಯ್ದಿದ್ದಾರೆ.
ಪಂಜರದಲ್ಲಿ ಒಂಟಿಯಾಗಿ ಸಾಕಲಾಗುವ ಬಹುತೇಕ ಗಿಳಿಗಳಂತೆ, ಮಿಠೂ ಕೂಡ ಈ ಹಿಂದೆ ಹಲವು ಬಾರಿ ಫಲಿತಗೊಳ್ಳದ ಮೊಟ್ಟೆಗಳನ್ನು ಇಟ್ಟಿತ್ತು. ಆದರೆ, ಈ ಬಾರಿ ದೇಹದಲ್ಲಿ ಅತಿಯಾದ ಕ್ಯಾಲ್ಸಿಯಂ ಶೇಖರಣೆಯಾದ ಕಾರಣ ಮೊಟ್ಟೆಯ ಗಾತ್ರವು ಸಾಮಾನ್ಯಕ್ಕಿಂತ ತುಂಬಾ ದೊಡ್ಡದಾಗಿದೆ. ಇದರಿಂದಾಗಿ ಅದು ನೈಸರ್ಗಿಕವಾಗಿ ಹೊರಬರಲಾಗದೆ ಒಳಗೇ ಸಿಲುಕಿಕೊಂಡಿದೆ. ಕಳೆದ ಎರಡು ವರ್ಷಗಳಿಂದ ಈ ಗಿಳಿಯನ್ನು ಮಗುವಿನಂತೆ ಸಾಕಿ ಸಲಹುತ್ತಿರುವ ರೈಲ್ವೆಯ ನಿವೃತ್ತ ಉದ್ಯೋಗಿ ಶ್ಯಾಮಲಾಲ್ ಕರ್ ಅವರ ಕುಟುಂಬ ಈಗ ಕಣ್ಣೀರಲ್ಲಿ ಕೈ ತೊಳೆಯುತ್ತಿದೆ.
ಗಿಳಿಯೊಂದಿಗೆ ಅಪಾರ ಒಡನಾಟ ಹೊಂದಿರುವ ಶ್ಯಾಮಲಾಲ್ ಕರ್ ಅವರ ಮೊಮ್ಮಗಳು ಟಿಯಾ, ತನ್ನ ಮುದ್ದಿನ ಹಕ್ಕಿ ಮಿಠೂ ಮತ್ತೆ ತನ್ನ ಬಳಿ ಬರುತ್ತದೋ ಇಲ್ಲವೋ ಎಂಬ ಕಳವಳದಲ್ಲಿದ್ದಾಳೆ.
ರೋಗಲಕ್ಷಣ ಪತ್ತೆಹಚ್ಚಿದ ಪುಟಾಣಿ ಟಿಯಾ:
ಮಿಠೂ ಇದ್ದಕ್ಕಿದ್ದಂತೆ ಮೌನವಾಗಿರುವುದನ್ನು ಮತ್ತು ಆಹಾರ-ನೀರು ಸೇವಿಸುವುದನ್ನು ಸಂಪೂರ್ಣವಾಗಿ ನಿಲ್ಲಿಸಿರುವುದನ್ನು ಟಿಯಾ ಮೊದಲು ಗಮನಿಸಿದ್ದಾಳೆ. ತಕ್ಷಣ ಆಕೆಯ ತಾತ ಶ್ಯಾಮಲಾಲ್ ಅವರು ಕೊಲ್ಕತ್ತಾದ ಖಾಸಗಿ ಕೇಂದ್ರವಾದ ‘ಅನಿಮಲ್ ಹೆಲ್ತ್ ಪ್ಯಾಥಾಲಜಿ ಲ್ಯಾಬ್’ನಲ್ಲಿ ಡಿಜಿಟಲ್ ರೇಡಿಯೋಗ್ರಫಿ ಪರೀಕ್ಷೆ ಮಾಡಿಸಿದ್ದಾರೆ. ಈ ವೇಳೆ ಗಿಳಿಯ ಪೆಲ್ವಿಕ್ ಭಾಗದಲ್ಲಿ ಕ್ಯಾಲ್ಸಿಯಂಯುಕ್ತ ದೊಡ್ಡ ಮೊಟ್ಟೆ ಸಿಲುಕಿರುವುದು ಪತ್ತೆಯಾಗಿದೆ. ವೈದ್ಯರು ಲೂಬ್ರಿಕೆಂಟ್ ಬಳಸಿ ಮೊಟ್ಟೆಯನ್ನು ಹೊರತೆಗೆಯಲು ಹಲವು ಪ್ರಯತ್ನಗಳನ್ನು ನಡೆಸಿದರೂ ಯಾವುದೇ ಪ್ರಯೋಜನವಾಗಲಿಲ್ಲ. ಕೊನೆಗೆ ಜಟಿಲವಾದ ಸರ್ಜರಿಯೇ ಏಕೈಕ ಮಾರ್ಗವಾಗಿದ್ದು, ಇದಕ್ಕೆ ದೆಹಲಿಗೆ ಕರೆದೊಯ್ಯುವಂತೆ ವೈದ್ಯರು ಕುಟುಂಬಕ್ಕೆ ಸೂಚಿಸಿದ್ದಾರೆ.
