newsics.com/ನ್ಯೂಸಿಕ್ಸ್
ಒಬ್ಬ ಮನುಷ್ಯ ತನ್ನ ಜೀವಿತಾವಧಿಯಲ್ಲಿ ಎಷ್ಟು ಬಾರಿ ಪ್ರೀತಿಯಲ್ಲಿ ಬೀಳುತ್ತಾನೆ? ಇದು ನಮ್ಮೆಲ್ಲರನ್ನೂ ಕಾಡುವ ಒಂದು ರೋಚಕ ಪ್ರಶ್ನೆ. ಪ್ರೀತಿ ಅನ್ನೋದು ಒಂದು ಸುಂದರ ಅನುಭವ, ಆದರೆ ಸಿನಿಮಾ ಮತ್ತು ಕಾದಂಬರಿಗಳಲ್ಲಿ ನೋಡುವಂತೆ ಅದು ಪದೇ ಪದೇ ಸಂಭವಿಸುತ್ತದೆಯೇ? ಅಥವಾ ನಮ್ಮ ಬದುಕಿನಲ್ಲಿ ಅದಕ್ಕೆ ಒಂದು ಮಿತಿ ಇದೆಯೇ? ಇಂದಿನ ಓಟದ ಬದುಕಿನಲ್ಲಿ ನಾವು ಪ್ರೀತಿಯ ಬಗ್ಗೆ ಸಾಕಷ್ಟು ಮಾತನಾಡುತ್ತೇವೆ.
ಆದರೆ ವಾಸ್ತವದಲ್ಲಿ ಅಪ್ಪಟವಾದ ಪ್ರೀತಿ ಎನ್ನುವುದು ಮನುಷ್ಯನಿಗೆ ಎಷ್ಟು ಸಾರಿ ಆಗಬಹುದು ಎಂದು ಅಮೆರಿಕದ ಕಿನ್ಸಿ ಇನ್ಸ್ಟಿಟ್ಯೂಟ್ ಸಂಶೋಧಕರು ನಡೆಸಿದ ಅಧ್ಯಯನದಲ್ಲಿ, ಜೀವನದಲ್ಲಿ ಒಬ್ಬ ವ್ಯಕ್ತಿಗೆ ಎಷ್ಟು ಬಾರಿ ನಿಜವಾದ ಮತ್ತು ಆಳವಾದ ಪ್ರೀತಿ ಆಗುತ್ತದೆ ಎಂಬುದನ್ನು ತಿಳಿಯಲು ಪ್ರಯತ್ನಿಸಿದ್ದಾರೆ. ಈ ಅಧ್ಯಯನದ ಫಲಿತಾಂಶಗಳು ಇಂಟರ್ಪರ್ಸೋನಾ ಜರ್ನಲ್ನಲ್ಲಿ ಪ್ರಕಟಗೊಂಡಿವೆ.
ಕಿನ್ಸೆ ಇನ್ಸ್ಟಿಟ್ಯೂಟ್ನ ವಿಜ್ಞಾನಿ ಡಾ. ಅಮಂಡಾ ಗೆಸೆಲ್ಮನ್ ನೇತೃತ್ವದಲ್ಲಿ ನಡೆದ ಈ ಸಮೀಕ್ಷೆಯಲ್ಲಿ ಸುಮಾರು 10,036 ಜನ ಭಾಗವಹಿಸಿದ್ದರು. 18 ರಿಂದ 99 ವರ್ಷದವರೆಗಿನ ಜನರಿಗೆ “ನಿಮ್ಮ ಜೀವನದಲ್ಲಿ ಈವರೆಗೆ ಎಷ್ಟು ಬಾರಿ ನೀವು ಪ್ರಾಮಾಣಿಕವಾಗಿ ಪ್ರೀತಿಸಿದ್ದೀರಿ?” ಎಂಬ ಸರಳ ಪ್ರಶ್ನೆಯನ್ನು ಕೇಳಲಾಗಿತ್ತು. ಇದರ ಫಲಿತಾಂಶದ ಪ್ರಕಾರ, ಒಬ್ಬ ಮನುಷ್ಯ ಸರಾಸರಿ ಎರಡು ಬಾರಿ ಮಾತ್ರ ತನ್ನ ಜೀವನದಲ್ಲಿ ಗಾಢವಾದ ಪ್ರೀತಿಯಲ್ಲಿ ಬೀಳುತ್ತಾನೆ. ವರದಿಯನ್ನು ಇನ್ನು ಆಳವಾಗಿ ಗಮನಿಸಿದರೆ, ಶೇ. 30 ರಷ್ಟು ಜನ ಎರಡು ಬಾರಿ ಪ್ರೀತಿಸಿದ್ದರೆ, ಶೇ. 28 ರಷ್ಟು ಜನ ಒಂದೇ ಒಂದು ಬಾರಿ ಪ್ರೀತಿಸಿದ್ದಾರೆ. ಅಚ್ಚರಿಯ ವಿಷಯವೆಂದರೆ, ಸಮೀಕ್ಷೆಯಲ್ಲಿ ಪಾಲ್ಗೊಂಡ ಶೇ. 14 ರಷ್ಟು ಜನ ತಮಗೆ ಇದುವರೆಗೆ ಪ್ರೀತಿಯೇ ಆಗಿಲ್ಲ ಎಂದು ಹೇಳಿಕೊಂಡಿದ್ದಾರೆ.
ಅಧ್ಯಯನದ ಫಲಿತಾಂಶದ ಪ್ರಕಾರ, ಒಬ್ಬ ವ್ಯಕ್ತಿ ತನ್ನ ಜೀವನದಲ್ಲಿ ಸರಾಸರಿ 2.05 ಬಾರಿ ನಿಜವಾದ ಪ್ರೀತಿಯನ್ನು ಅನುಭವಿಸುತ್ತಾನೆ ಎಂದು ತಿಳಿದುಬಂದಿದೆ. ಅಂದರೆ ಹೆಚ್ಚಿನ ಜನರಿಗೆ ಜೀವನದಲ್ಲಿ ಎರಡು ಬಾರಿ ಆಳವಾದ ಪ್ರೀತಿ ಆಗುವ ಸಾಧ್ಯತೆ ಇದೆ.
ಎಷ್ಟು ಜನರಿಗೆ ಎಷ್ಟು ಬಾರಿ ಪ್ರೀತಿ?
ಅಧ್ಯಯನದಲ್ಲಿ ಭಾಗವಹಿಸಿದವರ ಉತ್ತರಗಳ ಪ್ರಕಾರ:
14% ಜನರಿಗೆ ಜೀವನದಲ್ಲಿ ಎಂದಿಗೂ ಆಳವಾದ ಪ್ರೀತಿ ಆಗಿಲ್ಲ.
28% ಜನರಿಗೆ ಒಮ್ಮೆ ಮಾತ್ರ ಪ್ರೀತಿ ಆಗಿದೆ.
30% ಜನರಿಗೆ ಎರಡು ಬಾರಿ ಪ್ರೀತಿ ಆಗಿದೆ.
17% ಜನರಿಗೆ ಮೂರು ಬಾರಿ ಪ್ರೀತಿ ಆಗಿದೆ.
11% ಜನರಿಗೆ ನಾಲ್ಕು ಅಥವಾ ಅದಕ್ಕಿಂತ ಹೆಚ್ಚು ಬಾರಿ ಪ್ರೀತಿ ಆಗಿದೆ.
ಈ ಅಂಕಿಅಂಶಗಳು ಹೆಚ್ಚಿನ ಜನರು ಜೀವನದಲ್ಲಿ ಒಂದು ಅಥವಾ ಎರಡು ಮಹತ್ವದ ಪ್ರೇಮಕಥೆಗಳನ್ನು ಅನುಭವಿಸುತ್ತಾರೆ ಎಂಬುದನ್ನು ಸೂಚಿಸುತ್ತವೆ.
ಈ ಅಧ್ಯಯನ ಹೊರಹಾಕಿದ ಮತ್ತೊಂದು ಸ್ವಾರಸ್ಯಕರ ಸತ್ಯವೆಂದರೆ, ವಯಸ್ಸಾಗುತ್ತಿದ್ದಂತೆ ಪ್ರೀತಿ ಹುಟ್ಟುವ ಅವಕಾಶಗಳೇನೂ ಕಡಿಮೆಯಾಗುವುದಿಲ್ಲ. ಅಚ್ಚರಿಯ ವಿಷಯವೆಂದರೆ, ಯುವಕರಿಗಿಂತ ಹಿರಿಯ ವಯಸ್ಸಿನವರೇ ತಮ್ಮ ಜೀವನದಲ್ಲಿ ಹೆಚ್ಚು ಬಾರಿ ಪ್ರೀತಿಯ ಅನುಭವ ಪಡೆದಿದ್ದಾಗಿ ಹೇಳಿಕೊಂಡಿದ್ದಾರೆ. ಅಂದರೆ, ನೀವು 20 ಅಥವಾ 30ರ ವಯೋಮಾನ ದಾಟಿದ ಮೇಲೆಯೂ ನಿಮ್ಮ ಹೃದಯದಲ್ಲಿ ಮತ್ತೆ ಹೊಸ ಪ್ರೇಮದ ಗಂಟೆ ಬಾರಿಸುವ ಸಾಧ್ಯತೆ ದಟ್ಟವಾಗಿರುತ್ತದೆ.
