newsics.com/ನ್ಯೂಸಿಕ್ಸ್
ಸಂಗೀತ ಕೇಳುವುದು ಕೇವಲ ಹವ್ಯಾಸವಲ್ಲ, ಅದು ಮೆದುಳನ್ನು ಚುರುಕುಗೊಳಿಸುವ ಅಪ್ರತಿಮ ‘ಟಾನಿಕ್’ ಎಂಬ ಅಚ್ಚರಿಯ ವಿಷಯ ಇತ್ತೀಚಿನ ವೈಜ್ಞಾನಿಕ ಸಂಶೋಧನೆಯಿಂದ ಹೊರಬಿದ್ದಿದೆ.
ಪ್ರತಿನಿತ್ಯ ಸಂಗೀತ ಕೇಳುವ ಅಭ್ಯಾಸವು ಮೆದುಳಿನ ಜ್ಞಾಪಕ ಶಕ್ತಿಯನ್ನು ಗಣನೀಯವಾಗಿ ಹೆಚ್ಚಿಸುತ್ತದೆ. ಏಕಾಗ್ರತೆ (Focus) ಕಳೆದುಕೊಳ್ಳುವವರಿಗೆ ಸಂಗೀತವು ರಾಮಬಾಣವಾಗಿದ್ದು, ಓದುವಾಗ ಅಥವಾ ಕಚೇರಿ ಕೆಲಸದ ನಡುವೆ ಮೃದುವಾದ ಇಂಪಾದ ಗೀತೆಗಳನ್ನು ಆಲಿಸುವುದರಿಂದ ಮೆದುಳು ‘ಸೂಪರ್ ಫಾಸ್ಟ್’ ಆಗಿ ಕೆಲಸ ಮಾಡಲು ಆರಂಭಿಸುತ್ತದೆ ಎಂದು ವಿಜ್ಞಾನಿಗಳು ದೃಢಪಡಿಸಿದ್ದಾರೆ.
ಒತ್ತಡದಿಂದ ಮುಕ್ತಿ:
ನಾವು ಇಷ್ಟಪಡುವ ಹಾಡುಗಳನ್ನು ಕೇಳಿದಾಗ ಮೆದುಳಿನಲ್ಲಿ ‘ಡೋಪಮೈನ್’ ಎಂಬ ಹಾರ್ಮೋನ್ ಬಿಡುಗಡೆಯಾಗುತ್ತದೆ. ಇದು ದೇಹದಲ್ಲಿ ಆತಂಕ ಮೂಡಿಸುವ ‘ಕಾರ್ಟಿಸೋಲ್’ ಮಟ್ಟವನ್ನು ತಗ್ಗಿಸಿ, ಕ್ಷಣಾರ್ಧದಲ್ಲಿ ಮನಸ್ಸನ್ನು ಹಗುರಗೊಳಿಸುತ್ತದೆ.
ಹೃದಯಕ್ಕೂ ಹಿತ:
ಶಾಂತ ಸಂಗೀತವು ರಕ್ತದೊತ್ತಡವನ್ನು (BP) ನಿಯಂತ್ರಣದಲ್ಲಿಡಲು ನೆರವಾಗುತ್ತದೆ. ಇದರಿಂದ ಹೃದಯದ ಬಡಿತ ಸ್ಥಿರಗೊಂಡು, ಹೃದಯ ಸಂಬಂಧಿ ಕಾಯಿಲೆಗಳ ಅಪಾಯ ಕಡಿಮೆಯಾಗುತ್ತದೆ.
ನಿದ್ರಾಹೀನತೆಗೆ ಗುಡ್ಬೈ:
ಸರಿಯಾಗಿ ನಿದ್ರೆ ಬಾರದವರು ಮಲಗುವ ಮುನ್ನ ಮೆಲೋಡಿ ಹಾಡುಗಳನ್ನು ಕೇಳಿದರೆ, ದೇಹದ ಸ್ನಾಯುಗಳು ಸಡಿಲಗೊಂಡು ಗಾಢವಾದ ಹಾಗೂ ಗುಣಮಟ್ಟದ ನಿದ್ರೆ ನಿಮ್ಮದಾಗುತ್ತದೆ.
ಕ್ಷಣದಲ್ಲಿ ಬದಲಾಗುತ್ತೆ ಮೂಡ್:
ಎಷ್ಟೇ ಬೇಸರ ಅಥವಾ ಹತಾಶೆ ಇದ್ದರೂ, ನೆಚ್ಚಿನ ಗೀತೆಗಳು ನಕಾರಾತ್ಮಕ ಆಲೋಚನೆಗಳನ್ನು ಓಡಿಸಿ ಸಕಾರಾತ್ಮಕ ಶಕ್ತಿಯನ್ನು ತುಂಬುತ್ತವೆ.
ಮಾನಸಿಕ ಆರೋಗ್ಯ ತಜ್ಞರ ಪ್ರಕಾರ, “ದಿನಕ್ಕೆ ಕನಿಷ್ಠ 15 ರಿಂದ 20 ನಿಮಿಷಗಳ ಕಾಲ ಮೊಬೈಲ್ ಅಥವಾ ಇತರೆ ಗೊಂದಲಗಳಿಂದ ದೂರವಿದ್ದು ಸಂಗೀತಕ್ಕೆ ಕಿವಿಕೊಟ್ಟರೆ, ದೈಹಿಕ ಮತ್ತು ಮಾನಸಿಕ ಸದೃಢತೆ ಸಾಧ್ಯ ಎಂದಿದ್ದಾರೆ.
