newsics.com/ನ್ಯೂಸಿಕ್ಸ್
ನವದೆಹಲಿ : ಆರ್ಥಿಕ ವಹಿವಾಟುಗಳಲ್ಲಿ ಹೆಚ್ಚಿನ ಪಾರದರ್ಶಕತೆ ತರುವ ನಿಟ್ಟಿನಲ್ಲಿ ಕೇಂದ್ರ ಸರ್ಕಾರವು ಮಹತ್ವದ ಹೆಜ್ಜೆ ಇರಿಸಿದೆ. ಹೆಚ್ಚಿನ ಮೌಲ್ಯದ ಆರ್ಥಿಕ ವಹಿವಾಟುಗಳಿಗೆ ಇನ್ಮುಂದೆ ಪ್ಯಾನ್ ಕಾರ್ಡ್ ನೀಡುವುದನ್ನು ಕಡ್ಡಾಯಗೊಳಿಸಲಾಗಿದೆ. ಆದಾಯ ತೆರಿಗೆ ಕಾಯ್ದೆ 2025 ಮತ್ತು ಆದಾಯ ತೆರಿಗೆ ನಿಯಮಾವಳಿ-2026ರ ಅಡಿಯಲ್ಲಿ ಈ ಹೊಸ ಮಾರ್ಗಸೂಚಿಗಳನ್ನು ಪರಿಚಯಿಸಲಾಗಿದೆ.
ಈ ಹಿಂದೆ ಚಿನ್ನದ ಖರೀದಿ ಅಥವಾ ಡಿಮ್ಯಾಟ್ ಖಾತೆ ತೆರೆಯಲು ಪ್ಯಾನ್ ಕಾರ್ಡ್ ಇಲ್ಲದಿದ್ದಲ್ಲಿ ‘ಫಾರ್ಮ್ 60’ ನೀಡುವ ಅವಕಾಶವಿತ್ತು. ಆದರೆ ಈಗ ಅದರ ಬದಲಿಗೆ ‘ಫಾರ್ಮ್ 97’ ಅನ್ನು ಪರಿಚಯಿಸಲಾಗಿದ್ದು, ₹50,000 ಮೀರಿದ ವಹಿವಾಟುಗಳಿಗೆ ಕೇವಲ ಫಾರ್ಮ್ ನೀಡಿದರೆ ಸಾಲದು, ಪ್ಯಾನ್ ಕಾರ್ಡ್ ಕಡ್ಡಾಯವಾಗಿರಬೇಕು.
ಏಪ್ರಿಲ್ 1 ರಿಂದಲೇ ಈ ಹೊಸ ನಿಯಮಗಳು ಜಾರಿಗೆ ಬಂದಿದ್ದು, ಹಳೆಯ ಅರ್ಜಿಗಳ ಬದಲಿಗೆ ಹೊಸ ಅರ್ಜಿ ನಮೂನೆಗಳನ್ನು ಚಾಲ್ತಿಗೆ ತರಲಾಗಿದೆ.
ಕೇಂದ್ರ ಸರ್ಕಾರದ ಮಾರ್ಗಸೂಚಿಯಂತೆ ಈ ಕೆಳಗಿನ ಸಂದರ್ಭಗಳಲ್ಲಿ ಪ್ಯಾನ್ ಕಾರ್ಡ್ ನೀಡುವುದು ಕಡ್ಡಾಯವಾಗಿದೆ:
ಕ್ರೆಡಿಟ್ ಕಾರ್ಡ್: ಹೊಸ ಕ್ರೆಡಿಟ್ ಕಾರ್ಡ್ಗಾಗಿ ಅರ್ಜಿ ಸಲ್ಲಿಸುವಾಗ ಪ್ಯಾನ್ ಕಡ್ಡಾಯ.
ವಾಹನ ಖರೀದಿ: ₹5 ಲಕ್ಷಕ್ಕೂ ಅಧಿಕ ಮೌಲ್ಯದ ಮೋಟಾರ್ ವಾಹನಗಳ ಖರೀದಿಗೆ ಪ್ಯಾನ್ ಅಗತ್ಯ.
ಹೂಡಿಕೆಗಳು: ಮ್ಯೂಚುವಲ್ ಫಂಡ್ಸ್, ಬಾಂಡ್ಗಳು ಅಥವಾ ಡಿಬೆಂಚರ್ಗಳಲ್ಲಿ ₹50,000 ಕ್ಕಿಂತ ಹೆಚ್ಚು ಹೂಡಿಕೆ ಮಾಡಲು ಪ್ಯಾನ್ ಬೇಕೇ ಬೇಕು.
ಡಿಮ್ಯಾಟ್ ಖಾತೆ: ಶೇರು ಮಾರುಕಟ್ಟೆ ವಹಿವಾಟಿಗಾಗಿ ಡಿಮ್ಯಾಟ್ ಖಾತೆ ತೆರೆಯಲು ಇದು ಕಡ್ಡಾಯ.
ಬ್ಯಾಂಕ್ ವಹಿವಾಟು: ₹10 ಲಕ್ಷಕ್ಕೂ ಅಧಿಕ ಮೊತ್ತದ ನಗದು ಠೇವಣಿ ಅಥವಾ ಹಿಂಪಡೆಯುವಿಕೆಗೆ ಪ್ಯಾನ್ ನೀಡಬೇಕು.
ಷೇರುಗಳ ಖರೀದಿ: ₹1 ಲಕ್ಷ ದಾಟುವ ಮಾರಾಟ ಒಪ್ಪಂದಗಳು ಅಥವಾ ಸೆಕ್ಯೂರಿಟಿಗಳ ಖರೀದಿಗೆ ಪ್ಯಾನ್ ಅವಶ್ಯಕ.
ಆಸ್ತಿ ಖರೀದಿ: ಕಾರು, ಬೈಕ್, ಚಿನ್ನ, ಭೂಮಿ ಅಥವಾ ಮನೆ ಖರೀದಿಗೆ ಸಂಬಂಧಿಸಿದ ₹50,000 ಮೇಲ್ಪಟ್ಟ ವಹಿವಾಟುಗಳಿಗೆ ಪ್ಯಾನ್ ಕಡ್ಡಾಯ.
