Subscribe ನ್ಯೂಸಿಕ್ಸ್ ಕನ್ನಡ
newsics.com
ಚಂದ್ರಮೌಳೇಶ್ವರ ಜಾತ್ರೆಗೆ ಬಂದಿರುವ ಒಂಟಿ ಎತ್ತೊಂದು 17 ಲಕ್ಷ ರೂ.ಗೆ ಮಾರಾಟವಾಗುವ ಮೂಲಕ ಹಿಂದಿನ ದಾಖಲೆಗಳನ್ನು ಸರಿಗಟ್ಟಿತು. ಭಾರಿ ಬೆಲೆಗೆ ಮಾರಾಟವಾದ ಎತ್ತು ಅರ್ಜುನನನ್ನು ನೋಡಲು ಸಾರ್ವಜನಿಕರು ಮುಗಿಬಿದ್ದರು.
ಪ್ರತಿ ವರ್ಷ ರಾಸುಗಳ ಬೆಲೆ ಚಿನ್ನದ ಬೆಲೆಯಂತೆ ಗಗನಕ್ಕೇರುತ್ತಿದೆ. ಬೂಕನಬೆಟ್ಟದ ಜಾತ್ರೆಯಲ್ಲಿ ಹಳ್ಳಿಕಾರ್ ಜೋಡಿ 12 ಲಕ್ಷಕ್ಕೆ ಮಾರಾಟವಾಗಿದ್ದು ವಿಶೇಷ. ಆದರೆ ಜಾತ್ರೆಯಲ್ಲಿ ಅದಕ್ಕಿಂತ ಹೆಚ್ಚಿನ ದರಕ್ಕೆ ಎತ್ತುಗಳು ಮಾರಾಟವಾಗಿವೆ. ಈ ಬಾರಿ ಜಾತ್ರೆಯಲ್ಲಿ 50 ಸಾವಿರ ರೂ.ಗಳಿಂದ ಹಿಡಿದು 18 ಲಕ್ಷ ರೂ.ವರೆಗಿನ ಮೌಲ್ಯದ ರಾಸುಗಳೂ ಭಾಗಿಯಾಗಿವೆ.
ವಿಶೇಷವೆಂದರೆ, ಹಿರಿಸಾವೆಯ ಸಂದೀಪ್ ಎಂಬ ಯುವ ರೈತನ ಅರ್ಜುನ ಎಂಬ ಒಂಟಿ ಹಳ್ಳಿಕಾರ್ ಎತ್ತು 17 ಲಕ್ಷಕ್ಕೆ ಮಾರಾಟವಾಗುವ ಮೂಲಕ ಹಿಂದಿನ ದಾಖಲೆ ಮುರಿದಿದೆ. ಅಲ್ಲದೇ ದುಬಾರಿ ಹಳ್ಳಿಕಾರ್ ಜೋಡಿ ಹೋರಿಗಳಿಗೆ ಬೆಚ್ಚನೆಯ ಹುಲ್ಲಿನ ಹಾಸಿಗೆ, ಮತ್ತು ನೆರಳಿಗೆ ಮಂಟಪಗಳನ್ನು ನಿರ್ಮಾಣ ಮಾಡಿದ್ದು, ಮದುವೆ ದಿಬ್ಬಣದಂತೆ ಕಂಗೊಳಿಸುತ್ತಿದೆ.
ಪ್ರತಿ ವರ್ಷ ಶಿವರಾತ್ರಿಯ ಸಂದರ್ಭದಲ್ಲಿ ಚಂದ್ರಮೌಳೇಶ್ವರ ಜಾತ್ರೆ ನಡೆಯುತ್ತದೆ. ಹಾಸನ, ಚಿಕ್ಕಮಗಳೂರು, ಮಂಡ್ಯ, ತುಮಕೂರು, ಮೈಸೂರು ಭಾಗದ ರಾಸುಗಳು ಆಗಮಿಸಿವೆ. ರೈತರು ರಾಸುಗಳನ್ನು ಮಾರಾಟ ಹಾಗೂ ಖರೀದಿಸಬಹುದು. ಒಂದೇ ವೇದಿಕೆಯಲ್ಲಿ, ಹೆಚ್.ಎಫ್, ಜರ್ಸಿ, ಹಾಲ್ ಬ್ಲಾಕ್, ಹಳ್ಳಿಕಾರ್, ಅಮೃತಮಹಲ್, ಕ್ರಾಸ್ ಬೀಡ್, ಸಿಂದಿಗಿಡ್ಡಹಸು, ಗಿಡ್ಡಹಸು, ನಾಡಿಕ್ರಾಸ್ ತಳಿ, ಮುಂತಾದ ವಿವಿಧ ತಳಿಯ ಹಸುಗಳ ಭಾಗಿಯಾಗಿವೆ.
