Subscribe ನ್ಯೂಸಿಕ್ಸ್ ಕನ್ನಡ NewsicsKannada/YouTube
newsics.com
ದಾವಣಗೆರೆ: ಅಡಕೆಗೆ ಈಗ ಬಂಗಾರದ ಬೆಲೆ ಇದೆ. ಆದರೆ ಆ ಅಡಕೆ ಸಿಪ್ಪೆ ಮಾತ್ರ ತಿಪ್ಪೆ ಸೇರುತ್ತಿದೆ. ಅದೇ ಸಿಪ್ಪೆ ಬಳಸಿಕೊಂಡು ಇಲ್ಲಿನ ಕಾಲೇಜೊಂದರ ಸಿಬ್ಬಂದಿ, ವಿದ್ಯಾರ್ಥಿಗಳು ಸಂಶೋಧನೆ ಮಾಡಿ ಅಡಕೆ ಸಿಪ್ಪೆಗೂ ಒಂದೊಳ್ಳೆ ಸ್ಥಾನಮಾನ ನೀಡಿದ್ದಾರೆ.
ನಗರದ ಬಾಪೂಜಿ ತಾಂತ್ರಿಕ ಕಾಲೇಜು ಅಡಕೆ ಸಿಪ್ಪೆ ಮೇಲೆ ಹಲವಾರು ಸಂಶೋಧನೆ ನಡೆಸಿ, ಉತ್ಪನ್ನಗಳನ್ನು ಸಿದ್ಧಪಡಿಸಿ ಸುದ್ದಿಯಲ್ಲಿದೆ. ಬಾಪೂಜಿ ಇನ್ಸ್ಟಿಟ್ಯೂಟ್ ಆಫ್ ಇಂಜಿನಿಯರಿಂಗ್ ಅಂಡ್ ಟೆಕ್ನಾಲಜಿ ವಿಭಾಗ ಹಲವು ವರ್ಷಗಳಿಂದ ಅಡಕೆ ಸಿಪ್ಪೆ ಮೇಲೆ ಮಾಡಿರುವ ಸಂಶೋಧನೆಗಳು ಅಂತಿಮ ಘಟ್ಟಕ್ಕೆ ತಲುಪಿವೆ.
ಅಡಕೆ ಸಿಪ್ಪೆಯ ನಾರು ಬಳಸಿ ಶರ್ಟ್, ಮಹಿಳೆಯರ ಕುರ್ತಾ ತಯಾರಿಸುವ ಪ್ರಯತ್ನ ಯಶಸ್ವಿಯಾಗಿದೆ. ಇದರೊಂದಿಗೆ ಸಿಪ್ಪೆಯಲ್ಲಿ ತಯಾರಿಸಿದ ಕಾಂಪೋಜಿಟ್ಸ್ ಮತ್ತು ಮಹಿಳೆಯರು ಬಳಸುವ ಸ್ಯಾನಿಟರಿ ಪ್ಯಾಡ್ ಸಂಶೋಧನೆ ಅಚ್ಚರಿ ಹುಟ್ಟುಹಾಕಿದೆ.
ಇಷ್ಟೆಲ್ಲ ಉತ್ಪನ್ನಗಳ ಸಂಶೋಧನೆ ಮಾಡಲು ಕಾಲೇಜಿನ ಪ್ರಾಂಶುಪಾಲರಾದ ಹೆಚ್. ಬಿ. ಅರವಿಂದ್ ಬೆನ್ನೆಲುಬಾಗಿದ್ದಾರೆ.
ಬಿಐಇಟಿ ಕಾಲೇಜಿನ ಟೆಕ್ಸ್ ಟೈಲ್ ತಂತ್ರಜ್ಞಾನ ವಿಭಾಗ ಅಡಕೆ ನಾರಿನಲ್ಲಿ ಬಟ್ಟೆ ತಯಾರಿಸಿದೆ. ಅಂಗಿ ತಯಾರಿಸಲು ಹೆಚ್ಚು ವೆಚ್ಚ ಆಗುವುದಿಲ್ಲ. ಅಡಕೆ ನೂಲಿನ ಒಂದು ಮೀಟರ್ ಬಟ್ಟೆ ಕೇವಲ 200 ರೂ. ನಲ್ಲಿ ಸಿದ್ಧವಾಗುತ್ತದೆ.
ಈ ಅಡಕೆ ನಾರಿನಿಂದ ತಯಾರಾಗುವ ಬಟ್ಟೆ ಖಾದಿ ಉತ್ಪನ್ನಗಳಂತೆ ಸ್ವಲ್ಪ ಗಡುಸಾಗಿರುತ್ತದೆ. ಅದನ್ನು ಇನ್ನೂ ಹೆಚ್ಚು ಸಾಫ್ಟ್ ಮಾಡಲು ಹೊರಟರೆ ಉತ್ಪಾದನಾ ವೆಚ್ಚ ದುಪ್ಪಟ್ಟಾಗಬಹುದು.
ಇದೇ ಅಡಕೆ ನಾರಿಗೆ ಸ್ಯಾನಿಟರಿ ಪ್ಯಾಡ್ ರೂಪವನ್ನೂ ಕೊಟ್ಟಿದ್ದಾರೆ. 2017 ರಿಂದ ಸಂಶೋಧನೆ ಆರಂಭ ಮಾಡಿದ್ದು, ಈವರೆಗೆ ಬರೋಬ್ಬರಿ 10 ಸಾವಿರ ಸ್ಯಾನಿಟರಿ ಪ್ಯಾಡ್ ಸಿದ್ಧಪಡಿಸಿದ್ದಾರೆ.
ಅಲ್ಲದೇ, 4 ಸಾವಿರ ಪ್ಯಾಡ್ಗಳನ್ನು ಉಪಯೋಗಕ್ಕಾಗಿ ಸುತ್ತಮುತ್ತಲಿನ ಹಳ್ಳಿಯ ಜನರಿಗೆ ಹಂಚಿದ್ದಾರೆ.
ಅಡಕೆ ಸಿಪ್ಪೆಗೆ ಬೆಲೆ ಇಲ್ಲ, ಅದನ್ನು ಇಟ್ಟುಕೊಂಡು ಒಳ್ಳೆ ಉದ್ದೇಶಕ್ಕೆ ಬಳಕೆ ಮಾಡ್ಬೇಕೆಂದು ಸ್ಯಾನಿಟರಿ ಪ್ಯಾಡ್ ತಯಾರು ಮಾಡಿದ್ದೇವೆ. 6 ಟನ್ ಸಿಪ್ಪೆಗಳು ಉತ್ಪಾದನೆ ಆಗ್ತಿದ್ದು, 3 ಟನ್ ಸಿಪ್ಪೆಯಲ್ಲಿ ಮೊದಲು ನಾವು ಸ್ಯಾನಿಟರಿ ಪ್ಯಾಡ್ ತಯಾರು ಮಾಡಲು ಉತ್ತೇಜನ ಕೊಟ್ಟಿದ್ದೇವೆ ಎನ್ನುತ್ತಾರೆ, ಬಯೋ ಟೆಕ್ನಾಲಜಿ ಪ್ರೊಫೆಸರ್ ಡಾ. ಮಂಜುನಾಥ್ ಎನ್. ಎಸ್.
Singer Maithili Thakur ಮೊದಲ ಯತ್ನದಲ್ಲೇ ಗೆದ್ದು ಬೀಗಿದ ಗಾಯಕಿ ಮೈಥಿಲಿ ಠಾಕೂರ್ ಅತಿ ಕಿರಿಯ ಶಾಸಕಿ!
