newsics.com
ನವದೆಹಲಿ: ಚಿನ್ನದಂತೆ ಇನ್ಮುಂದೆ ಬೆಳ್ಳಿಗೂ ಹಾಲ್ಮಾರ್ಕ್ ವ್ಯವಸ್ಥೆ ಪರಿಚಯಿಸಲು ಕೇಂದ್ರ ಸರ್ಕಾರ ಮುಂದಾಗಿದೆ.
ಈ ಪ್ರಕ್ರಿಯೆಯು ಸೆಪ್ಟೆಂಬರ್ 1ರಿಂದಲೇ ಜಾರಿಗೆ ಬರಲಿದೆ. ಗ್ರಾಹಕರು ಖರೀದಿಸಿದ ಬೆಳ್ಳಿಯ ಶುದ್ಧತೆಯನ್ನು ಖಚಿತಪಡಿಸಿಕೊಳ್ಳುವುದು ಈ ನಿರ್ಧಾರದ ಹಿಂದಿನ ಪ್ರಮುಖ ಉದ್ದೇಶವಾಗಿದೆ ಎಂದು ಸರ್ಕಾರ ತಿಳಿಸಿದೆ.
ಆದರೆ, ಈ ಹಾಲ್ಮಾರ್ಕ್ ಸದ್ಯಕ್ಕೆ ಸ್ವಯಂಪ್ರೇರಿತವಾಗಿದೆ. ಇದರರ್ಥ ಗ್ರಾಹಕರು ಬಯಸಿದ್ರೆ ಹಾಲ್ಮಾರ್ಕ್ ಮಾಡಿದ ಬೆಳ್ಳಿ ಅಥವಾ ಹಾಲ್ಮಾರ್ಕ್ ಮಾಡದ ಬೆಳ್ಳಿಯನ್ನು ಖರೀದಿಸಬಹುದು.
ಭವಿಷ್ಯದಲ್ಲಿ ಇದು ಕಡ್ಡಾಯವಾಗುವ ಸಾಧ್ಯತೆಯನ್ನು ತಳ್ಳಿಹಾಕುವಂತಿಲ್ಲ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಚಿನ್ನದ ವಿಷಯದಲ್ಲಿ ಹಾಲ್ಮಾರ್ಕ್ ಕಡ್ಡಾಯವಾಗಿರುವಂತೆಯೇ, ಬೆಳ್ಳಿಗೂ ಅದೇ ವ್ಯವಸ್ಥೆಯನ್ನು ಸರ್ಕಾರ ಜಾರಿಗೆ ತರಬಹುದು ಎಂದು ನಿರೀಕ್ಷಿಸಲಾಗಿದೆ.
ಸರ್ಕಾರದ ಹಾಲ್ಮಾರ್ಕಿಂಗ್ ಘೋಷಣೆ ಬೆಳ್ಳಿ ಆಭರಣಗಳ ಬೆಲೆಯನ್ನು ಹೆಚ್ಚಿಸುತ್ತದೆಯೇ ಎಂಬ ಬಗ್ಗೆ ಅನೇಕರು ಸಂಶಯ ವ್ಯಕ್ತಪಡಿಸಿದ್ದಾರೆ. ಇದು ಬೆಲೆಗಳ ಮೇಲೆ ನೇರ ಪರಿಣಾಮ ಬೀರುವುದಿಲ್ಲ ಎಂದು ತಜ್ಞರು ಹೇಳಿದ್ದಾರೆ.
ಆದರೆ, ಗುಣಮಟ್ಟದ ಬಗ್ಗೆ ಗ್ರಾಹಕರ ವಿಶ್ವಾಸ ಹೆಚ್ಚಾಗಲಿರುವ ಕಾರಣ ಹಾಲ್ಮಾರ್ಕಿಂಗ್ ಮಾಡಿದ ಬೆಳ್ಳಿಯ ಬೇಡಿಕೆ ಹೆಚ್ಚಾಗುವ ಸಾಧ್ಯತೆಯಿದೆ.
ಹಾಲ್ಮಾರ್ಕಿಂಗ್ ಎನ್ನುವುದು ಗ್ರಾಹಕರು ಖರೀದಿಸುತ್ತಿರುವ ಬೆಳ್ಳಿಯ ಶುದ್ಧತೆಯನ್ನ ಸೂಚಿಸುವ ಒಂದು ದೃಢೀಕರಣದ ಗುರುತು. ಇದು ಖರೀದಿಯಲ್ಲಿ ವಂಚನೆಯ ಸಾಧ್ಯತೆಗಳನ್ನು ಕಡಿಮೆ ಮಾಡುತ್ತದೆ ಮತ್ತು ಗ್ರಾಹಕರು ತಮ್ಮ ಹಣಕ್ಕೆ ಸಂಪೂರ್ಣ ಮೌಲ್ಯ ಪಡೆಯುವುದನ್ನು ಖಚಿತಪಡಿಸುತ್ತದೆ.
ಬೆಳ್ಳಿಯ ಶುದ್ಧತೆ ನಿರ್ಧರಿಸುವ ಮಾನದಂಡಗಳು:
ಭಾರತೀಯ ಮಾನದಂಡಗಳ ಬ್ಯೂರೋ (BIS) ಬೆಳ್ಳಿಗೆ ಆರು ವಿಭಿನ್ನ ಶುದ್ಧತೆಯ ಮಾನದಂಡಗಳನ್ನು ನಿಗದಿಪಡಿಸಿದೆ. ಈ ಮಾನದಂಡಗಳ ಆಧಾರದ ಮೇಲೆ, ಬೆಳ್ಳಿ ಆಭರಣ ಅಥವಾ ವಸ್ತುಗಳ ಶುದ್ಧತೆಯನ್ನು ಗುರುತಿಸಬಹುದು.
800 ಸ್ಟಾಂಪ್:
ಇದು ಶೇಕಡಾ 80 ರಷ್ಟು ಬೆಳ್ಳಿಯನ್ನು ಹೊಂದಿರುತ್ತದೆ, ಮತ್ತು ಉಳಿದ ಶೇಕಡಾ 20 ರಷ್ಟು ಇತರ ಲೋಹಗಳಾಗಿವೆ (ಉದಾಹರಣೆಗೆ ತಾಮ್ರ).
835 ಸ್ಟಾಂಪ್:
ಇದು ಶೇಕಡಾ 83.5 ರಷ್ಟು ಶುದ್ಧತೆಯೊಂದಿಗೆ ಬೆಳ್ಳಿಯನ್ನು ಸೂಚಿಸುತ್ತದೆ.
900 ಸ್ಟಾಂಪ್:
ಇದರಲ್ಲಿ ಶೇ.90ರಷ್ಟು ಬೆಳ್ಳಿ ಇರುತ್ತದೆ. ಇದನ್ನು ಸಾಮಾನ್ಯವಾಗಿ ನಾಣ್ಯಗಳು ಮತ್ತು ಕೆಲವು ವಿಶೇಷ ಆಭರಣಗಳಲ್ಲಿ ಬಳಸಲಾಗುತ್ತದೆ.
925 ಸ್ಟಾಂಪ್:
ಇದನ್ನು ಸ್ಟರ್ಲಿಂಗ್ ಬೆಳ್ಳಿ ಎಂದು ಕರೆಯಲಾಗುತ್ತದೆ. ಇದು ಶೇಕಡಾ 92.5 ರಷ್ಟು ಶುದ್ಧತೆಯನ್ನು ಹೊಂದಿದೆ ಮತ್ತು ಇದು ಅತ್ಯಂತ ಜನಪ್ರಿಯ ಮಾನದಂಡವಾಗಿದೆ.
970 ಸ್ಟಾಂಪ್:
ಇದು ಶೇಕಡಾ 97 ರಷ್ಟು ಶುದ್ಧ ಬೆಳ್ಳಿಯಾಗಿದ್ದು, ವಿಶೇಷ ಪಾತ್ರೆಗಳು ಮತ್ತು ಡಿಸೈನರ್ ಆಭರಣಗಳಿಗೆ ಬಳಸಲಾಗುತ್ತದೆ.
990 ಸ್ಟಾಂಪ್:
ಇದನ್ನು ಉತ್ತಮ ಬೆಳ್ಳಿ ಎಂದು ಕರೆಯಲಾಗುತ್ತದೆ. ಇದು ಶೇಕಡಾ 99 ರಷ್ಟು ಬೆಳ್ಳಿಯ ಶುದ್ಧತೆಯನ್ನು ಹೊಂದಿರುತ್ತದೆ. ಇದು ತುಂಬಾ ಮೃದುವಾಗಿರುವುದರಿಂದ, ಇದನ್ನು ಹೆಚ್ಚಾಗಿ ಬಾರ್ಗಳು ಮತ್ತು ನಾಣ್ಯಗಳನ್ನ ತಯಾರಿಸಲು ಬಳಸಲಾಗುತ್ತದೆ.
ಈ ಹೊಸ ಮಾನದಂಡಗಳೊಂದಿಗೆ, ಗ್ರಾಹಕರು ಈಗ ಬೆಳ್ಳಿಯ ಗುಣಮಟ್ಟವನ್ನು ಸುಲಭವಾಗಿ ಗುರುತಿಸಲು ಸಾಧ್ಯವಾಗುತ್ತದೆ. ಇದು ಅವರಿಗೆ ಸುರಕ್ಷಿತ ಮತ್ತು ವಿಶ್ವಾಸಾರ್ಹ ಖರೀದಿಗಳನ್ನು ಮಾಡಲು ಅನುವು ಮಾಡಿಕೊಡಲಿದೆ.
AIIMS KIT ಮಹಿಳೆಯರೇ, ನೂರೇ ರೂಪಾಯಿಯಲ್ಲಿ ಈ ಕ್ಯಾನ್ಸರ್ ಪತ್ತೆ ಹಚ್ಚಿ, ಎರಡೇ ಗಂಟೆಯಲ್ಲಿ ರಿಪೋರ್ಟ್! ಏನಿದು ಕಿಟ್?
