ಆಶಾ ಭೋಸ್ಲೆ ಇದೀಗ ನಮ್ಮನ್ನಗಲಿದ್ದಾರೆ. 92 ವರ್ಷ ವಯಸ್ಸಾಗಿದ್ದ ಅವರು ಮುಂಬೈನ ಆಸ್ಪತ್ರೆಯಲ್ಲಿ ಕೊನೆಯುಸಿರೆಳೆದಿದ್ದಾರೆ. ಆಶಾ ಅವರ ಹಾಡುಗಳೆಂದರೆ ಎಲ್ಲರಿಗೂ ಎಲ್ಲಿಲ್ಲದ ಪ್ರೀತಿ, ಆದರೆ ಅವರ ಖಾಸಗಿ ಬದುಕು ಮತ್ತು ಕುಟುಂಬದ ಕಥೆ ಕೇಳಿದರೆ ಯಾರ ಕಣ್ಣಲ್ಲಾದರೂ ನೀರು ಬರುವುದು ಗ್ಯಾರಂಟಿ.
ಬಹಳ ಚಿಕ್ಕ ವಯಸ್ಸಿನಲ್ಲೇ ಆಶಾ ಅವರು ತಮ್ಮ ಕುಟುಂಬದ ವಿರೋಧದ ನಡುವೆಯೂ ಗಣಪತ್ರಾವ್ ಭೋಸ್ಲೆ ಎಂಬುವವರನ್ನು ಮದುವೆಯಾಗಿದ್ದರು. ಆದರೆ ಆ ಮದುವೆ ಆಶಾ ಅವರಿಗೆ ಸುಖ ಕೊಡಲಿಲ್ಲ. ಮೂರು ಮಕ್ಕಳಾದ ಬಳಿಕ, ಪತಿಯಿಂದ ತೀವ್ರ ಕಿರುಕುಳ ಅನುಭವಿಸಿದ ಆಶಾ, ಗರ್ಭಿಣಿಯಾಗಿದ್ದಾಗಲೇ ಮಕ್ಕಳನ್ನು ಕರೆದುಕೊಂಡು ತವರು ಮನೆಗೆ ವಾಪಸ್ಸಾಗಬೇಕಾಯಿತು. ಇಷ್ಟೆಲ್ಲಾ ಕಷ್ಟಗಳಿದ್ದರೂ ಅವರು ಸಂಗೀತವನ್ನು ಮಾತ್ರ ಯಾವತ್ತೂ ಬಿಡಲಿಲ್ಲ.
ಆರ್.ಡಿ. ಬರ್ಮನ್ ಜೊತೆಗಿನ ಪ್ರೇಮ ಮತ್ತು ವಿರಹ
ಮೊದಲ ಪತಿಯಿಂದ ದೂರವಾದ ಬಹಳ ವರ್ಷಗಳ ನಂತರ, ಖ್ಯಾತ ಸಂಗೀತ ನಿರ್ದೇಶಕ ಆರ್.ಡಿ. ಬರ್ಮನ್ (ಪಂಚಮ್ ದಾ) ಅವರ ಪ್ರೀತಿಗೆ ಆಶಾ ಒಲಿಯುತ್ತಾರೆ. 1980ರಲ್ಲಿ ಇವರಿಬ್ಬರು ಮದುವೆಯಾಗುತ್ತಾರೆ. ಸಂಗೀತ ಲೋಕದ ಈ ಜೋಡಿ ಅಪಾರ ಹಿಟ್ ಹಾಡುಗಳನ್ನು ನೀಡಿತು. ಆದರೆ, ವಿಧಿಯ ಆಟವೇ ಬೇರೆಯಾಗಿತ್ತು. 1994ರಲ್ಲಿ ಆರ್.ಡಿ. ಬರ್ಮನ್ ಅವರು ಹೃದಯಾಘಾತದಿಂದ ನಿಧನರಾದಾಗ, ಆಶಾ ಭೋಸ್ಲೆ ಸಂಪೂರ್ಣವಾಗಿ ಒಂಟಿಯಾಗಿ ಬಿಟ್ಟರು.
ಪತಿಯನ್ನು ಕಳೆದುಕೊಂಡ ನೋವಿನಲ್ಲಿದ್ದ ಆಶಾಗೆ ಮತ್ತೊಂದು ಭೀಕರ ಆಘಾತ ಕಾದಿತ್ತು. ಅವರಿಗೆ ಹೇಮಂತ್, ವರ್ಷಾ ಮತ್ತು ಆನಂದ್ ಎಂಬ ಮೂವರು ಮಕ್ಕಳಿದ್ದರು. ಆದರೆ, 2012ರಲ್ಲಿ ಮಗಳು ವರ್ಷಾ ಭೋಸ್ಲೆ ತಮ್ಮದೇ ಮನೆಯಲ್ಲಿ ಆತ್ಮಹತ್ಯೆಗೆ ಶರಣಾದರು. ಮಗಳ ಸಾವಿನ ಭೀಕರ ನೋವಿನಿಂದ ಆಶಾ ಹೊರಬರುವ ಮುನ್ನವೇ, 2015ರಲ್ಲಿ ಕ್ಯಾನ್ಸರ್ನಿಂದಾಗಿ ಅವರ ಹಿರಿಯ ಮಗ ಹೇಮಂತ್ ಭೋಸ್ಲೆ ಕೂಡ ಸಾವನ್ನಪ್ಪಿದರು.
ತಮ್ಮ ಕಣ್ಣೆದುರೇ ಮಗಳು ಮತ್ತು ಮಗನನ್ನು ಕಳೆದುಕೊಂಡ ಆ ತಾಯಿಯ ಕರುಳು ಎಷ್ಟು ಬೆಂದು ಹೋಗಿರಬೇಡ ಯೋಚಿಸಿ. ಕೇವಲ ಮಗ ಆನಂದ್ ಭೋಸ್ಲೆ ಮಾತ್ರ ಅವರ ಜೊತೆಗಿದ್ದರು. ಇಡೀ ಜಗತ್ತಿಗೆ ತನ್ನ ಹಾಡುಗಳ ಮೂಲಕ ಖುಷಿ ಹಂಚಿದ ಆಶಾ, ತಮ್ಮ ನಿಜ ಜೀವನದಲ್ಲಿ ಮಾತ್ರ ನೋವು, ಸಾವು ಮತ್ತು ಒಂಟಿತನವನ್ನೇ ಅಪ್ಪಿಕೊಂಡು ಬದುಕು ದೂಡುತ್ತಿದ್ದರು.
ಎಷ್ಟೇ ನೋವಿದ್ದರೂ ಕೊನೆಗಾಲದವರೆಗೂ ಸಂಗೀತದ ಮೇಲಿನ ಪ್ರೀತಿಯನ್ನು ಮಾತ್ರ ಅವರು ಎಂದಿಗೂ ಕಳೆದುಕೊಳ್ಳಲಿಲ್ಲ. ಇತ್ತೀಚೆಗೆ ಆಸ್ಪತ್ರೆ ಸೇರಿದಾಗ ಅವರ ಮೊಮ್ಮಗಳು ಝನಾಯ್ ಭೋಸ್ಲೆ ಹಾಗೂ ಮಗ ಆನಂದ್ ಭೋಸ್ಲೆ ಜೊತೆಗಿದ್ದರು. ಇಂದು 92ನೇ ವಯಸ್ಸಿನಲ್ಲಿ ಆಶಾ ಭೋಸ್ಲೆ ಕೊನೆಯುಸಿರೆಳೆದಿದ್ದು, ತಮ್ಮ ಪ್ರೀತಿಯ ಪಂಚಮ್ ದಾ ಹಾಗೂ ಮಕ್ಕಳ ಬಳಿ ಶಾಶ್ವತವಾಗಿ ತೆರಳಿದ್ದಾರೆ.
ಆಶಾ ಅವರ ನಿಧನ ಸುದ್ದಿ ಕೇಳಿ ಇಡೀ ಚಿತ್ರರಂಗ ಹಾಗೂ ಕೋಟ್ಯಂತರ ಅಭಿಮಾನಿಗಳು ಕಣ್ಣೀರಿಡುತ್ತಿದ್ದಾರೆ.
