https://youtube.com/shorts/T_aMW9fkptU?si=5dNoX3esn0X-svY6
newsics.com
ನವದೆಹಲಿ: ಭಾರತದಾದ್ಯಂತ ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಸಂಚರಿಸುವ ವಾಹನ ಸವಾರರಿಗೆ ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯವು ಮಹತ್ವದ ಸೂಚನೆಯನ್ನು ನೀಡಿದೆ. ಏಪ್ರಿಲ್.10ರಿಂದ ಜಾರಿಗೆ ಬರುವಂತೆ ಟೋಲ್ ಪ್ಲಾಜಾಗಳಲ್ಲಿ ನಗದು (Cash) ಪಾವತಿಯನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ.
1. ನಗದು ಪಾವತಿ ಇರುವುದಿಲ್ಲ: ಏಪ್ರಿಲ್ 10 ರಿಂದ ಯಾವುದೇ ಟೋಲ್ ಕೇಂದ್ರಗಳಲ್ಲಿ ನಗದು ರೂಪದಲ್ಲಿ ಹಣ ಸ್ವೀಕರಿಸಲಾಗುವುದಿಲ್ಲ. ಟೋಲ್ ಕ್ಯೂಗಳನ್ನು ಕಡಿಮೆ ಮಾಡಲು ಮತ್ತು ಸುಗಮ ಸಂಚಾರಕ್ಕಾಗಿ ಈ ಕ್ರಮ ಕೈಗೊಳ್ಳಲಾಗಿದೆ.
2. ಫಾಸ್ಟ್ಯಾಗ್ (FASTag) ಅಥವಾ UPI ಕಡ್ಡಾಯ: ವಾಹನಗಳಲ್ಲಿ ಫಾಸ್ಟ್ಯಾಗ್ ಇರುವುದು ಕಡ್ಡಾಯ. ಒಂದು ವೇಳೆ ಫಾಸ್ಟ್ಯಾಗ್ ಇಲ್ಲದಿದ್ದರೆ, ಸವಾರರು ಕೇವಲ UPI ಮೂಲಕ ಮಾತ್ರ ಹಣ ಪಾವತಿಸಬೇಕಾಗುತ್ತದೆ. ಆದರೆ, ಫಾಸ್ಟ್ಯಾಗ್ ಇಲ್ಲದೆ ಯುಪಿಐ ಮೂಲಕ ಪಾವತಿಸುವವರು ಸಾಮಾನ್ಯ ಟೋಲ್ ದರಕ್ಕಿಂತ 1.25 ಪಟ್ಟು ಹೆಚ್ಚು ಹಣವನ್ನು ಪಾವತಿಸಬೇಕಾಗುತ್ತದೆ.
3. ಐಡಿ ಕಾರ್ಡ್ ಪ್ರದರ್ಶಿಸಿ ರಿಯಾಯಿತಿ ಪಡೆಯುವಂತಿಲ್ಲ: ಇದುವರೆಗೆ ಹಲವರು ತಮ್ಮ ಗುರುತಿನ ಚೀಟಿ (ID Card) ತೋರಿಸಿ ಟೋಲ್ ವಿನಾಯಿತಿ ಪಡೆಯುತ್ತಿದ್ದರು. ಆದರೆ ಹೊಸ ನಿಯಮದ ಪ್ರಕಾರ, ಈ ‘ಟ್ರಿಕ್’ ಇನ್ನು ಮುಂದೆ ನಡೆಯುವುದಿಲ್ಲ. ವಿನಾಯಿತಿ ಪಡೆಯಲು ಅರ್ಹರಿರುವವರು ಕಡ್ಡಾಯವಾಗಿ ‘ಎಕ್ಸೆಂಪ್ಟೆಡ್ ಫಾಸ್ಟ್ಯಾಗ್’ (Exempted FASTag) ಹೊಂದಿರಲೇಬೇಕು. ವ್ಯಕ್ತಿಗಿಂತ ಹೆಚ್ಚಾಗಿ ಆಯಾ ಅಧಿಕೃತ ವಾಹನಕ್ಕೆ ಮಾತ್ರ ಈ ವಿನಾಯಿತಿ ಅನ್ವಯಿಸುತ್ತದೆ.
4. ದಂಡದ ನಿಯಮಗಳು: ಒಂದು ವೇಳೆ ವಾಹನ ಸವಾರರು ಡಿಜಿಟಲ್ ರೂಪದಲ್ಲಿ ಪಾವತಿಸಲು ವಿಫಲವಾದರೆ ಅಥವಾ ಹಣ ಪಾವತಿಸದೆ ತೆರಳಿದರೆ, ಅವರಿಗೆ ಇ-ನೋಟಿಸ್ (e-notice) ನೀಡಲಾಗುತ್ತದೆ. 72 ಗಂಟೆಗಳ ಒಳಗೆ ಬಾಕಿ ಹಣ ಪಾವತಿಸಿದರೆ ದಂಡ ಇರುವುದಿಲ್ಲ. ಆದರೆ 72 ಗಂಟೆಗಳ ನಂತರ ಪಾವತಿಸಿದರೆ ದುಪ್ಪಟ್ಟು ದಂಡ ತೆರಬೇಕಾಗುತ್ತದೆ. 15 ದಿನಗಳ ನಂತರವೂ ಹಣ ಪಾವತಿಸದಿದ್ದರೆ ಅಂತಹ ವಾಹನಗಳ ಮೇಲೆ ‘ವಾಹನ’ (VAHAN) ಪೋರ್ಟಲ್ನಲ್ಲಿ ನಿರ್ಬಂಧಗಳನ್ನು ಹೇರಲಾಗುತ್ತದೆ.
5. ವಾರ್ಷಿಕ ಪಾಸ್ ಸೌಲಭ್ಯ: ಖಾಸಗಿ ವಾಹನ ಸವಾರರಿಗಾಗಿ 3,075 ರೂಪಾಯಿಗಳ ವಾರ್ಷಿಕ ಪಾಸ್ ಸೌಲಭ್ಯವನ್ನು ನೀಡಲಾಗಿದೆ. ಈ ಪಾಸ್ ಮೂಲಕ ವರ್ಷಕ್ಕೆ 200 ಬಾರಿ ಟೋಲ್ ಪ್ಲಾಜಾಗಳನ್ನು ದಾಟಬಹುದಾಗಿದೆ.
ಒಟ್ಟಾರೆಯಾಗಿ, ಟೋಲ್ ಪ್ಲಾಜಾಗಳಲ್ಲಿ ಆಗುವ ಗಲಾಟೆಗಳನ್ನು ತಡೆಗಟ್ಟಲು ಮತ್ತು ಡಿಜಿಟಲ್ ಇಂಡಿಯಾ ಅಭಿಯಾನಕ್ಕೆ ವೇಗ ನೀಡಲು ಸರ್ಕಾರ ಈ ಕಟ್ಟುನಿಟ್ಟಿನ ಕ್ರಮಗಳನ್ನು ಕೈಗೊಂಡಿದೆ.
https://www.newsics.com/2026/04/05/do-you-know-what-is-raghav-chadhas-total-assets/
