newsics.com
ಮಾನವನ ಜೀವನದಲ್ಲಿ ಇಂದು ತನ್ನ ಹಲವು ಅಗತ್ಯ ಸಾಧನಗಳಲ್ಲಿ ಮೊಬೈಲ್ ಕೂಡ ಒಂದಾಗಿದೆ. ಆದ್ರೆ ಅತಿಯಾದ ಬಳಕೆ ಇಂದು ಹಲವರ ಜೀವಕ್ಕೆ ಅಪಾಯ ತರುತ್ತಿದೆ. ಯಾರ ಕೈ ನೋಡಿದ್ರೆ ಮೊಬೈಲ್ ಇದ್ದೇ ಇರುತ್ತದೆ. ಇದರಿಂದ ಜನರಿಗೆ ಎಷ್ಟು ಅಗತ್ಯವಿದೆಯೋ ಅಷ್ಟೇ ಸಮಸ್ಯೆ ಕೂಡ ಇದೆ, ಇದೆಲ್ಲಾ ಗೊತ್ತಿದ್ರೂ ಜನರು ಈಗಲೂ ಆ ತಪ್ಪುಗಳನ್ನೇ ಮಾಡುತ್ತಿದ್ದಾರೆ. ಇಲ್ಲೊಂದು ಇದೇ ರೀತಿ ಘಟನೆ ನಡೆದಿದೆ. ಕೇವಲ ಮೊಬೈಲ್ ಚಾರ್ಜರ್ನಿಂದ ಒಂದೂವರೆ ವರ್ಷ ಮಗುವಿನ ಪ್ರಾಣಪಕ್ಷಿಯೇ ಹಾರಿಹೋಗಿದೆ.
ಹೌದು, ತೆಲಂಗಾಣದಲ್ಲಿ ಈ ದುರ್ಘಟನೆ ನಡೆದಿದ್ದು, ಒಂದೂವರೆ ವರ್ಷದ ಬಾಲಕಿ ಕರೆಂಟ್ಗೆ ಕನೆಕ್ಟ್ ಆಗಿದ್ದ ಮೊಬೈಲ್ ಚಾರ್ಜರ್ ಕೇಬಲ್ ಅನ್ನು ಬಾಯೊಳಗೆ ಹಾಕಿದ್ದಾಳೆ.
ತೆಲಂಗಾಣದ ನಿರ್ಮಲ್ ಜಿಲ್ಲೆಯ ಕಡಂ ಮಂಡಲದ ಕೋಟ ಮಡ್ಡಿಪಡಗ ಗ್ರಾಮದಲ್ಲಿ ಈ ದುರಂತ ನಡೆದಿದೆ. ಒಂದೂವರೆ ವರ್ಷದ ಬಾಲಕಿ ದುರ್ಗಮ್ ಆರಾಧ್ಯ ಎಂಬವಳು ಸಾವನ್ನಪ್ಪಿರುವ ಮಗು. ಮನೆಯಲ್ಲಿ ಸ್ವಿಚ್ ಬೋರ್ಡ್ಗೆ ಮೊಬೈಲ್ ಚಾರ್ಜರ್ ಅನ್ನು ಸಿಕ್ಕಿಸಿ ಹಾಗೇ ಬಿಟ್ಟಿದ್ದರು. ಇದನ್ನು ನೋಡಿ ಮಗು ಬಾಯಿಗೆ ಹಾಕಿಕೊಂಡಿದ್ದಾಳೆ. ಇದರಿಂದ ತಕ್ಷಣ ಮಗುವಿಗೆ ಶಾಕ್ ಹೊಡೆದು ಪ್ರಜ್ಞೆ ತಪ್ಪಿ ಬಿದ್ದಿದ್ದಾಳೆ. ಇದನ್ನು ನೋಡಿ ಪೋಷಕರು ಆ ಕ್ಷಣವೇ ಮಗುವನ್ನು ಖಾನಾಪುರ ಸರ್ಕಾರಿ ಆಸ್ಪತ್ರೆಗೆ ರವಾನಿಸಲಾಗಿದೆ. ಆದರೆ ಮಗು ಅದಾಗಲೇ ಮೃತಪಟ್ಟಿರುವುದಾಗಿ ವೈದ್ಯರು ಖಚಿತಪಡಿಸಿದ್ದಾರೆ.
