newsics.com
ಮಂಗಳೂರು: ಅಲೆ ಬುಡಿಯೆರ್ಗೇ ಉದ್ಘಾರದೊಂದಿಗೆ “ಪದವು ಕಾನಡ್ಕ ಫ್ರಾನ್ಸಿಸ್ ಪ್ಲೇವಿ ಡಿ’ಸೋಜೆರ್ನ ಎರ್ಲು’ ಎಂಬ ಕೂಗು ಕೇಳುವಾಗ ಕಂಬಳ ಅಭಿಮಾನಿಗಳ ಕಿವಿ ನೆಟ್ಟಗಾಗುತ್ತದೆ. ಯಾಕೆಂದರೆ ಅಲ್ಲಿ “ದೂಜ’ ಇದ್ದಾನ ಎಂಬ ಕುತೂಹಲ.
ಆದರೆ ಒಂದೆರಡು ವರ್ಷದಿಂದ ಅವರಿಗೆ ನಿರಾಸೆಯೇ ಆಗಿದೆ. ಅಂದಹಾಗೆ, ಈಗ ದೂಜ ಆರೋಗ್ಯವಾಗಿದ್ದರೂ ಕಂಬಳ ಕರೆಯ ಓಟಕ್ಕೆ ಮಾತ್ರ ಮುಕ್ತಾಯ ಹಾಡಿದ್ದಾನೆ. ಕಂಬಳ ಓಟದಲ್ಲಿ 69 ಮೆಡೆಲ್ ಪಡೆದು ದಾಖಲೆ ಮಾಡಿದ ಕೋಣ ದೂಜ 2 ವರ್ಷದಿಂದ ಆರೋಗ್ಯ ಸಮಸ್ಯೆಯಿಂದ ಬಳಲುತ್ತಿದೆ.
ಮಂಗಳೂರಿನ ಶಕ್ತಿನಗರದ ಪದವು ಕಾನಡ್ಕ ದೂಜ ಎಂಬ ಕೋಣವು ಕಂಬಳದಲ್ಲಿ ಕೇವಲ 8 ವರ್ಷಗಳಲ್ಲಿ 6 ಬಾರಿ ಚಾಂಪಿಯನ್ ಪ್ರಶಸ್ತಿಗೆ ಪಾತ್ರವಾಗಿದೆ. ದೂಜನ ಓಟವನ್ನು ಕಂಡು ಕಂಬಳ ಲೋಕವೇ “ಭೇಷ್’ ಅನ್ನುವಂತಿತ್ತು. ನಿರೀಕ್ಷೆಗೂ ಮೀರಿದ ಓಟದ ಸಾಧಕ ದೂಜ ಅನಾರೋಗ್ಯದಿಂದ ಒಂದೆರಡು ವರ್ಷಗಳಿಂದ ಓಟಕ್ಕೆ ಬಂದಿಲ್ಲ. ಸದ್ಯದ ಪ್ರಕಾರ ಮುಂದೆ ಕಂಬಳ ಕರೆಗೆ ಬರುವುದೂ ಕಷ್ಟ.
ಆರೋಗ್ಯವಿದ್ದರೆ ಕೋಣಗಳು ಸರಾಸರಿ 20ವರ್ಷ ಪ್ರಾಯದವರೆಗೆ ಕಂಬಳದಲ್ಲಿ ಓಡುತ್ತವೆ. ಆದರೆ ದೂಜನಿಗೆ ಎರಡು ವರ್ಷಗಳ ಹಿಂದೆ ಆರೋಗ್ಯ ಕೈಕೊಟ್ಟಿತ್ತು. ಎದ್ದು ನಿಲ್ಲಲಾರದಷ್ಟು ಸಹ ಅಶಕ್ತನಾದ. ಬಳಿಕ ನಡೆದ ಚಿಕಿತ್ಸೆಯಿಂದ ಆರೋಗ್ಯವಂತನಾದರೂ ಓಡಲು ಸಾಧ್ಯವಾಗುತ್ತಿಲ್ಲ. ಆದ್ದರಿಂದ ಇನ್ಮುಂದೆ ಆತ ಕಂಬಳ ಕರೆಗೆ ಇಳಿಯುವುದು ಸ್ವಲ್ಪ ಕಷ್ಟವೇ ಆಗಿದೆ.
ಶಕ್ತಿನಗರ ಪದವು – ಕಾನಡ್ಕದ ಯಜಮಾನರು ದೂಜ ಕೋಣವನ್ನು ಅಳದಂಗಡಿ ರವಿಯವರಿಂದ ಖರೀದಿಸಿದ್ದರು. ಪದವು ಕಾನಡ್ಕಕ್ಕೆ ಬರುವಾಗ 2 ವರ್ಷದ ಮರಿ ಕೋಣವಾಗಿದ್ದ ದೂಜನಿಗೆ ಇದೀಗ 16ರ ಪ್ರಾಯ. ಪದವು – ಕಾನಡ್ಕಕ್ಕೆ ಬಂದ ಬಳಿಕವೇ ದೂಜ ಕಂಬಳಕ್ಕೆ ತಯಾರಾಗಿದ್ದು. ಪದವು ಕಾನಡ್ಕ ಫ್ರಾನ್ಸಿಸ್ ಫ್ಲೇವಿ ಡಿಸೋಜರ ಹೆಸರಿನಲ್ಲಿ ದೂಜನನ್ನು ಕಂಬಳ ಕರೆಯಲ್ಲಿ ಓಡಿಸಲಾಗುತ್ತಿತ್ತು. ತಂದೆ ಫ್ರಾನ್ಸಿಸ್ ಅವರ ನಿಧನದ ಬಳಿಕ ಮೂವರು ಮಕ್ಕಳಾದ ಡೋಲ್ಫಿ ಡಿಸೋಜ, ಡೆರಿಕ್ ಡಿಸೋಜ ಹಾಗೂ ನಾಬರ್ಟ್ ಡಿಸೋಜರು ತಾಯಿ ಫ್ಲೇವಿ ಡಿಸೋಜರ ಹೆಸರಿನಲ್ಲಿ ಕೋಣಗಳನ್ನು ಓಡಿಸುತ್ತಿದ್ದಾರೆ
