newsics.com | ನ್ಯೂಸಿಕ್ಸ್
ಹಿಂದೂ ಜ್ಯೋತಿಷ್ಯ ಶಾಸ್ತ್ರದಲ್ಲಿ ವ್ಯಕ್ತಿಯ ಜನ್ಮ ದಿನ, ನಕ್ಷತ್ರ, ರಾಶಿಯ ಜೊತೆಗೆ ಅವರು ಹುಟ್ಟಿದ ವಾರದ ದಿನಕ್ಕೂ ವಿಶೇಷ ಮಹತ್ವವಿದೆ. ವಾರದ ಏಳು ದಿನಗಳಿಗೂ ಒಂದೊಂದು ಗ್ರಹ ಅಧಿಪತಿಯಾಗಿದ್ದು, ಆ ಗ್ರಹಗಳ ಪ್ರಭಾವ ವ್ಯಕ್ತಿಯ ಸ್ವಭಾವ, ಆಲೋಚನೆ ಹಾಗೂ ಜೀವನಶೈಲಿಯ ಮೇಲೆ ಪರಿಣಾಮ ಬೀರುತ್ತದೆ ಎಂದು ನಂಬಲಾಗಿದೆ. ಹಾಗಾದರೆ ನೀವು ಹುಟ್ಟಿದ ವಾರದ ದಿನದ ಪ್ರಕಾರ ನಿಮ್ಮ ಗುಣಲಕ್ಷಣಗಳು ಹೇಗಿರುತ್ತವೆ ಎಂಬುದನ್ನು ತಿಳಿಯೋಣ.
ಸೋಮವಾರ
ಸೋಮವಾರ ಹುಟ್ಟಿದವರು ಸಾಮಾನ್ಯವಾಗಿ ಶಾಂತ ಸ್ವಭಾವದವರಾಗಿರುತ್ತಾರೆ. ತಾಳ್ಮೆ, ಸಹನೆ ಹಾಗೂ ಇತರರನ್ನು ಅರ್ಥಮಾಡಿಕೊಳ್ಳುವ ಗುಣ ಇವರಲ್ಲಿರುತ್ತದೆ. ಆಧ್ಯಾತ್ಮಿಕ ಚಟುವಟಿಕೆಗಳು, ದೇವರ ಭಕ್ತಿ ಹಾಗೂ ಕುಟುಂಬದ ಮೇಲಿನ ಕಾಳಜಿ ಇವರ ಪ್ರಮುಖ ಗುಣಗಳಾಗಿವೆ.
ಮಂಗಳವಾರ
ಮಂಗಳವಾರ ಜನಿಸಿದವರು ಧೈರ್ಯಶಾಲಿಗಳು ಮತ್ತು ಆತ್ಮವಿಶ್ವಾಸ ಹೊಂದಿರುತ್ತಾರೆ. ಯಾವುದೇ ಸವಾಲನ್ನು ಎದುರಿಸುವ ಶಕ್ತಿ ಇವರಲ್ಲಿರುತ್ತದೆ. ಕೆಲವೊಮ್ಮೆ ಬೇಗ ಕೋಪಗೊಳ್ಳುವ ಸ್ವಭಾವವೂ ಇರಬಹುದು. ಆದರೆ ನಾಯಕತ್ವದ ಗುಣ ಇವರನ್ನು ಯಶಸ್ಸಿನತ್ತ ಕೊಂಡೊಯ್ಯುತ್ತದೆ.
ಬುಧವಾರ
ಬುಧವಾರ ಜನಿಸಿದವರು ಮೃದುಭಾಷಿಗಳು ಹಾಗೂ ಬುದ್ಧಿವಂತರಾಗಿರುತ್ತಾರೆ. ಉತ್ತಮ ಸಂವಹನ ಕೌಶಲ್ಯ ಹೊಂದಿರುವ ಇವರು ಕಲೆ, ಸಾಹಿತ್ಯ, ವ್ಯಾಪಾರ ಹಾಗೂ ಶಿಕ್ಷಣ ಕ್ಷೇತ್ರಗಳಲ್ಲಿ ಉತ್ತಮ ಸಾಧನೆ ಮಾಡುವ ಸಾಧ್ಯತೆ ಹೆಚ್ಚು.
ಗುರುವಾರ
ಗುರುವಾರ ಹುಟ್ಟಿದವರಿಗೆ ಧಾರ್ಮಿಕ ಕಾರ್ಯಗಳು, ಸಮಾಜ ಸೇವೆ ಹಾಗೂ ಜ್ಞಾನಾರ್ಜನೆಯ ಕಡೆ ಹೆಚ್ಚು ಆಸಕ್ತಿ ಇರುತ್ತದೆ. ಗುರು ಗ್ರಹದ ಅನುಕೂಲ ಇದ್ದರೆ ಗೌರವ, ಯಶಸ್ಸು ಹಾಗೂ ಉತ್ತಮ ಸ್ಥಾನಮಾನ ದೊರೆಯಬಹುದು. ಪ್ರತಿಕೂಲ ಸ್ಥಿತಿಯಲ್ಲಿ ತಪ್ಪು ನಿರ್ಧಾರಗಳನ್ನು ತೆಗೆದುಕೊಳ್ಳುವ ಸಾಧ್ಯತೆಯೂ ಇರುತ್ತದೆ.
ಶುಕ್ರವಾರ
ಶುಕ್ರವಾರ ಜನಿಸಿದವರು ಪ್ರಾಮಾಣಿಕರು, ಪ್ರೀತಿಯ ಸ್ವಭಾವದವರು ಹಾಗೂ ಸೌಂದರ್ಯಪ್ರಿಯರು. ಸಂಗೀತ, ಚಿತ್ರಕಲೆ, ನೃತ್ಯ ಸೇರಿದಂತೆ ಕಲೆ-ಕರಕುಶಲ ಕ್ಷೇತ್ರಗಳಲ್ಲಿ ಹೆಚ್ಚಿನ ಆಸಕ್ತಿ ಹೊಂದಿರುತ್ತಾರೆ. ಸಂಬಂಧಗಳನ್ನು ಗೌರವಿಸುವ ಗುಣ ಇವರ ವಿಶೇಷತೆ.
ಶನಿವಾರ
ಶನಿವಾರ ಹುಟ್ಟಿದವರು ನ್ಯಾಯಪ್ರಿಯರು ಮತ್ತು ಶಿಸ್ತುಬದ್ಧ ಜೀವನ ನಡೆಸುವವರು. ಕರ್ತವ್ಯ ಪಾಲನೆಯಲ್ಲಿ ಅತ್ಯಂತ ನಿಷ್ಠೆ ತೋರುತ್ತಾರೆ. ಕೊಟ್ಟ ಮಾತನ್ನು ಉಳಿಸಿಕೊಳ್ಳುವ ಗುಣ ಇವರಿಗೆ ಉತ್ತಮ ಗೌರವ ತಂದುಕೊಡುತ್ತದೆ.
ರವಿವಾರ
ರವಿವಾರ ಜನಿಸಿದವರು ಉದಾರ ಮನೋಭಾವ ಹೊಂದಿದ್ದು, ಆತ್ಮಸ್ಥೈರ್ಯ ಹಾಗೂ ನಾಯಕತ್ವ ಗುಣ ಹೆಚ್ಚಾಗಿರುತ್ತದೆ. ಸಮಾಜದಲ್ಲಿ ಉತ್ತಮ ಹೆಸರು ಗಳಿಸಲು ಶ್ರಮಿಸುತ್ತಾರೆ. ಆತ್ಮವಿಶ್ವಾಸದಿಂದ ಯಾವುದೇ ಕೆಲಸವನ್ನು ಯಶಸ್ವಿಯಾಗಿ ಪೂರ್ಣಗೊಳಿಸುವ ಸಾಮರ್ಥ್ಯ ಇವರಲ್ಲಿರುತ್ತದೆ.
