newsics.com
ಚಿತ್ರದುರ್ಗ: ಅಮೆರಿಕದ ಕೆಲಿ ಕ್ರಿಸ್ಟಿನ್ ನೀಲ್ ಎಂಬ ಯುವತಿ ಚಿತ್ರದುರ್ಗದ ಯುವಕನ್ನು ಮದುವೆಯಾಗಿದ್ದಾರೆ. ಸೊಸೆಯಾಗುವ ಮೂಲಕ ಭಾರತದ ದೇಶದ ಸಂಸ್ಕೃತಿಯ ಭಾಗವಾಗಿರುವುದಕ್ಕೆ ಸಂತಸ ವ್ಯಕ್ತಪಡಿಸಿದ್ದಾರೆ.
ಚಿತ್ರದುರ್ಗ ನಗರದ ಕಾಮನಬಾವಿ ಬಡಾವಣೆಯ ನಿವಾಸಿ ಕೆಎಸ್ಎಫ್ಸಿ ನಿವೃತ್ತ ಡೆಪ್ಯುಟಿ ಮ್ಯಾನೇಜರ್ ಪಿ.ಡಿ.ಯಲ್ಲಪ್ಪ ಹಾಗೂ ಪಾರ್ವತಮ್ಮ ಅವರ ಪುತ್ರ ಡಾ.ವೈ.ಡಿ.ಅಭಿಲಾಷ್ ಅಮೆರಿಕ ಯುವತಿಯನ್ನು ವರಿಸಿರುವ ಯುವಕ.
ಅಭಿಲಾಷ್ ಕಳೆದ ಎರಡು ವರ್ಷಗಳಿಂದ ಅಮೆರಿಕದ ಬ್ಯಾಂಕ್ ಆಫ್ ನ್ಯೂಯಾರ್ಕ್ನಲ್ಲಿ ಕ್ವಾಂಟಿಟೇಟಿವ್ ರಿಸರ್ಚರ್ ಆಗಿ ಕೆಲಸ ಮಾಡುತ್ತಿದ್ದಾರೆ. ಚಿತ್ರದುರ್ಗದಲ್ಲಿ ಪ್ರಾಥಮಿಕ, ಪ್ರೌಢ, ಪದವಿ ಪೂರ್ವ ಶಿಕ್ಷಣ ಮುಗಿಸಿದ ನಂತರ ಬೆಂಗಳೂರಿನ ಬಿಎಂಎಸ್ ಕಾಲೇಜಿನಲ್ಲಿ ಇಂಜಿನಿಯರಿಂಗ್ ಪದವಿ ಪಡೆದರು.
ಶಿಕ್ಷಣ ಮುಗಿದ ಕೆಲ ದಿನಗಳ ಕಾಲ ಬೆಂಗಳೂರಿನ ವಿವಿಧ ಕಂಪನಿಗಳಲ್ಲಿ ಕೆಲಸ ಮಾಡಿದ ಅಭಿಲಾಷ್, ಬಳಿಕ ಉನ್ನತ ಶಿಕ್ಷಣಕ್ಕಾಗಿ ಅಮೆರಿಕಾಗೆ ತೆರಳಿದರು. ಭೌತಶಾಸ್ತ್ರ ವಿಷಯದಲ್ಲಿ ಪಿಹೆಚ್ಡಿ ಪದವಿ ಪಡೆದರು. ಅಮೆರಿಕದಲ್ಲಿ ವ್ಯಾಸಂಗ ಮಾಡುತ್ತಿರುವ ಸಂದರ್ಭದಲ್ಲಿ ಪಕ್ಕದ ಕಾಲೇಜಿನಲ್ಲಿ ಶಿಕ್ಷಣ ಪಡೆಯುತ್ತಿದ್ದ ಕೆಲಿ ಕ್ರಿಸ್ಟಿನ್ ನೀಲ್ ಎಂಬ ಯುವತಿ ಪರಿಚಯವಾಯಿತು. 2019ರಲ್ಲಿ ಯುವಕನ ಕಡೆಯಿಂದ ಪ್ರೇಮ ನಿವೇದನೆಯಾಯಿತು. ಯುವತಿಯ ಸಮ್ಮತಿಯೂ ದೊರೆಯಿತು.
ಈ ಕುರಿತು ಚಿತ್ರದುರ್ಗದಲ್ಲಿನ ಪೋಷಕರಿಗೆ ಅಭಿಲಾಷ್ ವಿಷಯ ತಿಳಿಸಿದರು. ಇವರ ಪ್ರೀತಿಗೆ ಹೆತ್ತವರ ಅನುಮತಿಯೂ ದೊರೆಯಿತು. ಇದರಿಂದಾಗಿ ಈ ಯುವ ಪ್ರೇಮಿಗಳು ಅಮೆರಿಕದಿಂದ ಹಾರಿ ಚಿತ್ರದುರ್ಗಕ್ಕೂ ಬಂದರು. ಹೀಗೆ 2023ರ ಫೆಬ್ರವರಿಯಲ್ಲಿ ಅಭಿಲಾಷ್ ಜತೆ ಇಲ್ಲಿಗೆ ಬಂದ ಯುವತಿ ಶಿವರಾತ್ರಿ ಹಬ್ಬದ ಆಚರಣೆಯಲ್ಲಿ ಭಾಗವಹಿಸಿದ್ದರು. ಇಲ್ಲಿನ ಧಾರ್ಮಿಕ ಪದ್ಧತಿ, ಹಬ್ಬ ಆಚರಣೆಯ ವಿಧಿ ವಿಧಾನಗಳನ್ನು ಕಂಡು ಪುಳಕಿತಳಾದಳು. ಇದು ಇವರಿಬ್ಬರ ಮದುವೆಗೆ ನಾಂದಿಯಾಯಿತು.
ಡಿ.15ರಂದು ಇಲ್ಲಿನ ಜಿ.ಜಿ.ಸಮುದಾಯ ಭವನದಲ್ಲಿ ಮದುವೆ ಕಾರ್ಯ ನಡೆಯಿತು. ಯುವತಿಯ ತಂದೆ ಕೆನೆತ್ ನೀಲ್, ತಾಯಿ ಡೋರೆನ್ ಸ್ಟ್ಯಾಂಡರ್, ಸಂಬಂಧಿಕರು, ಸ್ನೇಹಿತರು ಸೇರಿದಂತೆ 15 ಜನ ದೂರದ ಅಮೇರಿಕಾದಿಂದ ಮದುವೆಗೆ ಆಗಮಿಸಿದ್ದರು. ಡಿ.19ರಂದು ಅಮೆರಿಕಾಗೆ ಪ್ರಯಾಣ ಬೆಳೆಸಿದರು.
ಯುವತಿ ಕೆಲಿ ಕ್ರೆಸ್ಟಿನ್ ಈಗ ಕನ್ನಡ ಕಲಿಯುತ್ತಿದ್ದಾರೆ. ಇಲ್ಲಿನ ಉಡುಗೆ, ತೊಡುಗೆ, ಆಚಾರ, ವಿಚಾರ, ಸಂಪ್ರದಾಯ ಮೈಗೂಡಿಸಿಕೊಳ್ಳುತ್ತಿದ್ದಾರೆ.
CT Ravi case ತಕ್ಷಣ ಸಿ.ಟಿ. ರವಿ ಬಿಡುಗಡೆಗೆ ಹೈಕೋರ್ಟ್ ಆದೇಶ, ದಾವಣಗೆರೆಯಲ್ಲಿ ಬಿಡುಗಡೆ ಮಾಡಿದ ಪೊಲೀಸರು
