newsics.com | ನ್ಯೂಸಿಕ್ಸ್
ಬೆಂಗಳೂರು: ಭಾರತದ ಅತಿ ದೊಡ್ಡ ರಿಯಾಲಿಟಿ ಶೋ ‘ಬಿಗ್ ಬಾಸ್’ ವೀಕ್ಷಕರಿಗೆ ಜಿಯೋಸ್ಟಾರ್ ಸಂಸ್ಥೆ ಬಿಗ್ ಅಪ್ಡೇಟ್ ಒಂದನ್ನು ನೀಡಿದೆ. ಈ ಬಾರಿ ಪ್ರಾದೇಶಿಕ ಭಾಷೆಗಳ ವೀಕ್ಷಕರು ತಮ್ಮ ನೆಚ್ಚಿನ ಶೋಗಳಿಗಾಗಿ ತಿಂಗಳುಗಟ್ಟಲೆ ಕಾಯಬೇಕಾಗಿಲ್ಲ. ಮುಂಬರುವ ಹಬ್ಬದ ಸೀಸನ್ ಅನ್ನು ಗುರಿಯಾಗಿಸಿಕೊಂಡು ಜಿಯೋಸ್ಟಾರ್ ಮಹತ್ತರ ಹೆಜ್ಜೆಯಿಟ್ಟಿದ್ದು, ಕನ್ನಡ ಸೇರಿದಂತೆ ದೇಶದ ಒಟ್ಟು 6 ಪ್ರಮುಖ ಭಾಷೆಗಳ ಬಿಗ್ ಬಾಸ್ ಆವೃತ್ತಿಗಳನ್ನು ಒಟ್ಟಿಗೆ ಕಣಕ್ಕಿಳಿಸುತ್ತಿದೆ.
ಬರುವ ಸೆಪ್ಟೆಂಬರ್ ತಿಂಗಳಿನಿಂದ ಕನ್ನಡ, ಹಿಂದಿ, ತಮಿಳು, ತೆಲುಗು, ಮಲಯಾಳಂ ಹಾಗೂ ಬಾಂಗ್ಲಾ ಭಾಷೆಗಳ ಬಿಗ್ ಬಾಸ್ ಶೋಗಳು ಒಟ್ಟಿಗೆ ಲೈವ್ ಬರಲಿವೆ. ಜಿಯೋಸ್ಟಾರ್ ಟೆಲಿವಿಷನ್ ನೆಟ್ವರ್ಕ್ ಮತ್ತು ‘ಜಿಯೋಹಾಟ್ಸ್ಟಾರ್’ ಒಟಿಟಿ ವೇದಿಕೆಯಲ್ಲಿ ಪ್ರೇಕ್ಷಕರು ಏಕಕಾಲದಲ್ಲಿ ಈ ಎಲ್ಲ ಆವೃತ್ತಿಗಳನ್ನು ಕಣ್ಣುಂಬಿಕೊಳ್ಳಬಹುದು.
ಕನ್ನಡದ ಬಿಗ್ ಬಾಸ್ ಮನೆಯನ್ನು ಎಂದಿನಂತೆ ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಅವರೇ ಯಶಸ್ವಿಯಾಗಿ ಮುನ್ನಡೆಸಲಿದ್ದಾರೆ. ಉಳಿದ ಆವೃತ್ತಿಗಳಲ್ಲಿ ಸ್ಟಾರ್ ನಟರಾದ ಸಲ್ಮಾನ್ ಖಾನ್ (ಹಿಂದಿ), ವಿಜಯ್ ಸೇತುಪತಿ (ತಮಿಳು), ನಾಗಾರ್ಜುನ (ತೆಲುಗು) ಮತ್ತು ಮೋಹನ್ ಲಾಲ್ (ಮಲಯಾಳಂ) ನಿರೂಪಕರಾಗಿ ಮುಂದುವರಿಯಲಿದ್ದಾರೆ. ಇನ್ನು ಕ್ರಿಕೆಟ್ ಅಂಗಳದ ದಾದಾ, ಮಾಜಿ ನಾಯಕ ಸೌರವ್ ಗಂಗೂಲಿ ಅವರು ಈ ಬಾರಿ ಬಾಂಗ್ಲಾ ಆವೃತ್ತಿಯ ಸಾರಥ್ಯ ವಹಿಸಿಕೊಳ್ಳುತ್ತಿರುವುದು ವಿಶೇಷ ಕುತೂಹಲ ಮೂಡಿಸಿದೆ.
ವೀಕ್ಷಣೆಯಲ್ಲಿ ದಕ್ಷಿಣ ಭಾರತವೇ ನಂಬರ್ ಒನ್
ಈ ಬಿಗ್ ಲಾಂಚ್ ಅಂಗವಾಗಿ ಜಿಯೋಸ್ಟಾರ್ ಸಂಸ್ಥೆಯು ‘ಇಂಡಿಯಾಸ್ ಬಿಗ್ ರಿಯಾಲಿಟಿ’ ಹೆಸರಿನ ವಿಶೇಷ ಪುಸ್ತಕವನ್ನು ಹೊರತಂದಿದ್ದು, ಶೋನ ಯಶಸ್ಸಿನ ಗ್ರಾಫ್ ಅನ್ನು ಅನಾವರಣಗೊಳಿಸಿದೆ.
- ವೀಕ್ಷಕರ ದಾಖಲೆ: ಕಳೆದ 2025ರ ಸೀಸನ್ ಒಂದರಲ್ಲೇ ಬಿಗ್ ಬಾಸ್ ಬರೋಬ್ಬರಿ 50 ಕೋಟಿಗೂ ಅಧಿಕ ಜನರನ್ನು ತಲುಪಿದೆ. ಇದರಲ್ಲಿ ದಕ್ಷಿಣ ಭಾರತದ ಕೊಡುಗೆಯೇ ಸಿಂಹಪಾಲು (30 ಕೋಟಿಗೂ ಹೆಚ್ಚು ವೀಕ್ಷಕರು). ಇಲ್ಲಿನ ಪ್ರತಿ 10 ಟಿವಿ ವೀಕ್ಷಕರಲ್ಲಿ 8 ಜನ ಬಿಗ್ ಬಾಸ್ ವೀಕ್ಷಿಸುತ್ತಿದ್ದು, ಇದು ದಕ್ಷಿಣದ ಇತರ ರಿಯಾಲಿಟಿ ಶೋಗಳ ಒಟ್ಟು ವೀಕ್ಷಣೆಗಿಂತ 3.5 ಪಟ್ಟು ಜಾಸ್ತಿಯಾಗಿದೆ.
- ಲೈವ್ ಫೀಡ್ ಕ್ರೇಜ್: ಶೇಕಡಾ 60 ರಷ್ಟು ಒಟಿಟಿ ವೀಕ್ಷಕರು ದಿನದ 24 ಗಂಟೆಯೂ ಮನೆಯ ಒಳಗಿನ ವಿದ್ಯಮಾನಗಳನ್ನು ನೇರವಾಗಿ (Live Feed) ನೋಡುತ್ತಿದ್ದಾರೆ.
- ಸೋಶಿಯಲ್ ಮೀಡಿಯಾ ಟ್ರೆಂಡ್: 2025ರಲ್ಲಿ ಈ ಶೋ 1.7 ಬಿಲಿಯನ್ ವೀಕ್ಷಣೆ ಪಡೆದುಕೊಂಡಿದ್ದು, 3 ಕೋಟಿಗೂ ಅಧಿಕ ಮೀಮ್ಸ್ಗಳು ಸೃಷ್ಟಿಯಾಗಿವೆ.
ವರದಿಯ ಪ್ರಕಾರ, 2025ರ ಸೀಸನ್ನಲ್ಲಿ ವಿಭಿನ್ನ ಕ್ಷೇತ್ರಗಳ 625ಕ್ಕೂ ಹೆಚ್ಚು ಬ್ರ್ಯಾಂಡ್ಗಳು ಬಿಗ್ ಬಾಸ್ ಜೊತೆ ಕೈಜೋಡಿಸಿದ್ದವು. ಇದರಲ್ಲಿ 49 ಹೊಸ ಉದ್ಯಮಗಳೂ ಸೇರಿದ್ದವು. ಶೋನಲ್ಲಿ ಜಾಹೀರಾತು ನೀಡಿದ ಕಂಪನಿಗಳ ಮಾರುಕಟ್ಟೆ ಮೌಲ್ಯ ಹಾಗೂ ಮಾರಾಟದ ಪ್ರಮಾಣದಲ್ಲಿ ಗಣನೀಯ ಪ್ರಗತಿಯಾಗಿದೆ ಎಂದು ಜಿಯೋಸ್ಟಾರ್ ತಿಳಿಸಿದೆ.
