newsics.com | ನ್ಯೂಸಿಕ್ಸ್
ನವದೆಹಲಿ: ಒಡಿಶಾದ ಪುರಿಯಲ್ಲಿ ಜಗನ್ನಾಥನ ಭವ್ಯ ರಥಯಾತ್ರೆಯು (Puri Rath Yatra) ಅತ್ಯಂತ ಸಡಗರದಿಂದ ಆರಂಭವಾಗಿದ್ದು, ಲಕ್ಷಾಂತರ ಭಕ್ತರು ಜಗನ್ನಾಥನ ದರ್ಶನ ಪಡೆಯಲು ಜನಸಾಗರ ಹರಿದುಬರುತ್ತಿದೆ. ಇದರ ನಡುವೆ, ಗೂಗಲ್ ಸೇರಿದಂತೆ ಪ್ರಮುಖ ಸರ್ಚ್ ಇಂಜಿನ್ಗಳಲ್ಲಿ “ಪುರಿ ಜಗನ್ನಾಥ ದೇವಾಲಯದ ಮಹಾಪ್ರಸಾದವನ್ನು ಆನ್ಲೈನ್ನಲ್ಲಿ ಬುಕ್ ಮಾಡುವುದು ಹೇಗೆ?” ಎಂಬ ಪ್ರಶ್ನೆ ಭಾರಿ ಟ್ರೆಂಡ್ ಆಗುತ್ತಿದೆ. ಆದರೆ, ಈ ರೀತಿ ಆನ್ಲೈನ್ನಲ್ಲಿ ಪ್ರಸಾದ ಹುಡುಕುವ ಭಕ್ತರಿಗೆ ದೇವಸ್ಥಾನದ ಆಡಳಿತ ಮಂಡಳಿ ಶಾಕಿಂಗ್ ಸುದ್ದಿಯೊಂದನ್ನು ನೀಡಿದೆ.
ಪುರಿ ಜಗನ್ನಾಥ ದೇವಾಲಯದ (Puri Jagannath Temple) ಪವಿತ್ರ ಮಹಾಪ್ರಸಾದಕ್ಕೆ ಯಾವುದೇ ರೀತಿಯ ಆನ್ಲೈನ್ ಬುಕಿಂಗ್ ಅಥವಾ ಹೋಮ್ ಡೆಲಿವರಿ ಸೌಲಭ್ಯ ಲಭ್ಯವಿಲ್ಲ ಎಂದು ಶ್ರೀ ಜಗನ್ನಾಥ ಟೆಂಪಲ್ ಅಡ್ಮಿನಿಸ್ಟ್ರೇಷನ್ (SJTA) ಸ್ಪಷ್ಟಪಡಿಸಿದೆ. ದೇಶ-ವಿದೇಶಗಳಲ್ಲಿ ಭಕ್ತರಿಂದ ಭಾರಿ ಬೇಡಿಕೆಯಿದ್ದರೂ ಸಹ, ಪ್ರಸಾದದ ಪಾವಿತ್ರ್ಯತೆಯನ್ನು ಕಾಪಾಡುವ ಹಿತದೃಷ್ಟಿಯಿಂದ ಇಂತಹ ಎಲ್ಲ ಪ್ರಸ್ತಾಪಗಳನ್ನು ಒಡಿಶಾ ಸರ್ಕಾರ ಹಾಗೂ ದೇವಸ್ಥಾನ ಮಂಡಳಿ ತಿರಸ್ಕರಿಸಿದೆ. ಹೀಗಾಗಿ ಆನ್ಲೈನ್ನಲ್ಲಿ ಪ್ರಸಾದ ವಿತರಿಸುತ್ತೇವೆ ಎಂದು ಕ್ಲೈಮ್ ಮಾಡುವ ಯಾವುದೇ ವೆಬ್ಸೈಟ್ ಅಥವಾ ಸಾಮಾಜಿಕ ಜಾಲತಾಣದ ಪೋಸ್ಟ್ಗಳು ಸಂಪೂರ್ಣ ಅನಧಿಕೃತ ಹಾಗೂ ನಕಲಿ ಎಂದು ಅಧಿಕಾರಿಗಳು ಎಚ್ಚರಿಸಿದ್ದಾರೆ.
ಕೊರಿಯರ್ ಮಾಡಲು ಸಾಧ್ಯವಿಲ್ಲದ್ದಕ್ಕೆ ಅಸಲಿ ಕಾರಣವೇನು?
ಇಲ್ಲಿ ಯಾವುದೇ ಗ್ಯಾಸ್ ಸಿಲಿಂಡರ್ ಅಥವಾ ಆಧುನಿಕ ಇಂಧನ ಬಳಸುವುದಿಲ್ಲ. ವಿಶ್ವದ ಅತಿ ದೊಡ್ಡ ಅಡುಗೆಮನೆಯಲ್ಲಿ ಕೇವಲ ಕಟ್ಟಿಗೆ ಒಲೆ ಹಾಗೂ ಮಣ್ಣಿನ ಮಡಕೆಗಳನ್ನು ಬಳಸಿ ಮಾತ್ರ ಇದನ್ನು ಸಿದ್ಧಪಡಿಸಲಾಗುತ್ತದೆ. ಈ ಪ್ರಸಾದಕ್ಕೆ ಯಾವುದೇ ಕೃತಕ ಸಂರಕ್ಷಕಗಳನ್ನು (Preservatives) ಬಳಸುವುದಿಲ್ಲ. ಹೀಗಾಗಿ ಇದು ಬಹಳ ಬೇಗನೆ ಹಾಳಾಗುವ ಸಾಧ್ಯತೆ ಇರುತ್ತದೆ. ದೂರದ ಊರುಗಳಿಗೆ ಸಾಗಣೆ ಮಾಡುವುದು ತಾಂತ್ರಿಕವಾಗಿ ಅಸಾಧ್ಯ. ಪ್ರಸಾದವು ದೇವಸ್ಥಾನದ ಆವರಣದಿಂದ ಹೊರಹೋದರೆ, ಅದನ್ನು ತಲುಪಿಸುವಾಗ ಧಾರ್ಮಿಕ ಶುದ್ಧತೆಯನ್ನು ಕಾಯ್ದುಕೊಳ್ಳಲಾಗುತ್ತದೆಯೇ ಎಂಬ ಗ್ಯಾರಂಟಿ ಇರುವುದಿಲ್ಲ. ಈ ಕಾರಣದಿಂದಲೇ ಖಾಸಗಿ ಫುಡ್ ಡೆಲಿವರಿ ಆಪ್ಗಳಿಗೆ ಮಂಡಳಿ ಅನುಮತಿ ನೀಡಿಲ್ಲ.
ಪ್ರಸಾದ ಸಿಗುವುದು ಎಲ್ಲಿ?
ಜಗನ್ನಾಥ, ಬಲಭದ್ರ ಮತ್ತು ದೇವತೆ ಸುಭದ್ರೆಗೆ ನೈವೇದ್ಯ ಅರ್ಪಿಸಿದ ಬಳಿಕ ಸಿದ್ಧವಾಗುವ ಈ ಮಹಾಪ್ರಸಾದವನ್ನು ಪಡೆಯಲು ಭಕ್ತರು ಖುದ್ದಾಗಿ ಪುರಿ ದೇವಾಲಯಕ್ಕೆ ಭೇಟಿ ನೀಡಬೇಕಾಗುತ್ತದೆ. ದೇವಸ್ಥಾನದ ಆವರಣದ ಒಳಗಿರುವ ‘ಆನಂದ ಬಜಾರ್’ ಎಂಬ ನಿಗದಿತ ಕೌಂಟರ್ನಲ್ಲಿ ಮಾತ್ರ ಪ್ರತಿದಿನ ತಾಜಾ ಮಹಾಪ್ರಸಾದ ವಿತರಣೆ ಮಾಡಲಾಗುತ್ತದೆ. ರಥಯಾತ್ರೆಯ ಅವಧಿಯಲ್ಲಿ ಇಲ್ಲಿ ಭಕ್ತರ ಸಂಖ್ಯೆ ದುಪ್ಪಟ್ಟಾಗಿರುತ್ತದೆ.
ಭಕ್ತರೇ ವಂಚಕರಿಂದ ದೂರವಿರಿ
ರಥಯಾತ್ರೆಯ ಸಂದರ್ಭವನ್ನು ಬಂಡವಾಳ ಮಾಡಿಕೊಳ್ಳಲು ಸೈಬರ್ ವಂಚಕರು ಹೊಂಚು ಹಾಕುತ್ತಿದ್ದಾರೆ. ದೇವರ ಹೆಸರು ಬಳಸಿ ನಕಲಿ ಲಿಂಕ್ಗಳ ಮೂಲಕ ಹಣ ಲೂಟಿ ಮಾಡುವ ಜಾಲ ಸಕ್ರಿಯವಾಗಿದೆ. ಈ ಹಿಂದೆ ಇಂತಹ ನಕಲಿ ವೆಬ್ಸೈಟ್ಗಳ ವಿರುದ್ಧ ದೇವಸ್ಥಾನದ ಆಡಳಿತ ಮಂಡಳಿ ಕಾನೂನು ಕ್ರಮ ಜರುಗಿಸಿದ್ದು, ಭಕ್ತರು ಯಾವುದೇ ಆನ್ಲೈನ್ ಲಿಂಕ್ಗಳ ಮೇಲೆ ಕ್ಲಿಕ್ ಮಾಡಿ ಹಣ ಕಳೆದುಕೊಳ್ಳಬಾರದು ಎಂದು ವಿನಂತಿಸಲಾಗಿದೆ.
Bigg Boss ಕಿರುತೆರೆಯಲ್ಲಿ ಹೊಸ ಇತಿಹಾಸ; ಸೆಪ್ಟೆಂಬರ್ನಿಂದ ಕನ್ನಡ ಸೇರಿ 6 ಭಾಷೆಗಳ ‘ಬಿಗ್ ಬಾಸ್’ ಒಟ್ಟಿಗೆ ಆರಂಭ
