newsics.com | ನ್ಯೂಸಿಕ್ಸ್
ಸತ್ಯವೇ ನಮ್ಮ ಬದುಕಿನ ಬುನಾದಿ, ಯಾರೂ ಸುಳ್ಳು ಹೇಳಬಾರದು ಎಂದು ಹಿರಿಯರು ಹೇಳುವುದನ್ನು ನಾವು ಕೇಳಿರುತ್ತೇವೆ. ಅದರಲ್ಲೂ ವಿಶೇಷವಾಗಿ ಲೈಫ್ ಪಾರ್ಟ್ನರ್ ಬಳಿ ಯಾವುದೇ ಸುಳ್ಳನ್ನು ಹೇಳದೆ ಅತ್ಯಂತ ಪ್ರಾಮಾಣಿಕವಾಗಿರಬೇಕು, ಆಗಲೇ ಸಂಬಂಧ ಶಾಶ್ವತವಾಗಿರುತ್ತದೆ ಎಂಬುದು ಎಲ್ಲರ ನಂಬಿಕೆ. ಆದರೆ, ಎಲ್ಲ ಸಂದರ್ಭಗಳಲ್ಲೂ ಕಹಿ ಸತ್ಯವನ್ನು ಮುಖಕ್ಕೆ ಹೊಡೆದಂತೆ ಹೇಳುವುದು ದಾಂಪತ್ಯವನ್ನು ಮುನಿಸಿಗೆ ತಳ್ಳಬಹುದು. ಹೌದು, ಸಂಬಂಧಗಳ ತಜ್ಞರ ಪ್ರಕಾರ ಕೆಲವೊಮ್ಮೆ ಆಡುವ ಸಣ್ಣಪುಟ್ಟ ‘ಸಿಹಿ ಸುಳ್ಳುಗಳು’ ಸಂಗಾತಿಗಳ ನಡುವಿನ ಪ್ರೀತಿಯನ್ನು ಮತ್ತಷ್ಟು ಬಲಪಡಿಸುತ್ತವಂತೆ.
ಸಂಬಂಧದಲ್ಲಿ ಬಿರುಕು ಮೂಡಿಸದ, ಬದಲಿಗೆ ಪ್ರೀತಿಯನ್ನು ಹೆಚ್ಚಿಸುವ ಆ 5 ಮಧುರ ಸುಳ್ಳುಗಳು ಯಾವುವು ಎಂಬ ವಿವರ ಇಲ್ಲಿದೆ ನೋಡಿ.
1. ಉಡುಗೊರೆ ಇಷ್ಟವಾಗದಿದ್ದರೂ ಶ್ಲಾಘಿಸಿ
ನಿಮ್ಮ ಸಂಗಾತಿ ನಿಮಗಾಗಿ ಯಾವುದಾದರೂ ಗಿಫ್ಟ್ ತಂದಾಗ, ಅದು ನಿಮ್ಮ ಆಯ್ಕೆಗೆ ತಕ್ಕಂತೆ ಇಲ್ಲದಿದ್ದರೂ ‘ತುಂಬಾ ಚೆನ್ನಾಗಿದೆ’ ಎಂದು ಪ್ರಶಂಸಿಸಿ. ಆ ಉಡುಗೊರೆಯ ಹಿಂದಿರುವ ಅವರ ಶ್ರಮ ಮತ್ತು ಪ್ರೀತಿಯನ್ನು ಗೌರವಿಸಲು ಈ ಸಣ್ಣ ಸುಳ್ಳು ಸಹಕಾರಿಯಾಗಿದೆ. ಇದು ಅವರ ಮುಖದಲ್ಲಿ ದೊಡ್ಡ ಮುಗುಳ್ನಗೆ ತರುತ್ತದೆ.
2. ಪ್ರೋತ್ಸಾಹದಾಯಕ ಮಾತುಗಳು ಮುಖ್ಯ
ಕೆಲಸದ ಒತ್ತಡ ಮತ್ತು ದೈನಂದಿನ ಜವಾಬ್ದಾರಿಗಳ ನಡುವೆ ಸಂಗಾತಿಗೆ ನಿಮಗಾಗಿ ಹೆಚ್ಚು ಸಮಯ ನೀಡಲು ಸಾಧ್ಯವಾಗದೇ ಇರಬಹುದು. ಇಂತಹ ಸಂದರ್ಭದಲ್ಲಿ ಚುಚ್ಚು ಮಾತುಗಳನ್ನಾಡಿ ಜಗಳ ಆಡುವ ಬದಲು, “ನನಗಾಗಿ ನೀನು ಎಷ್ಟು ಸಮಯ ಕೊಡ್ತೀಯಾ, ನನ್ನನ್ನು ಎಷ್ಟು ಪ್ರೀತಿಸ್ತೀಯಾ ನೋಡು” ಎಂಬ ಪಾಸಿಟಿವ್ ಮಾತುಗಳನ್ನಾಡಿ. ಇದು ಅವರ ಮೇಲಿನ ಒತ್ತಡವನ್ನು ಕಡಿಮೆ ಮಾಡಿ, ಪ್ರೀತಿಯನ್ನು ದ್ವಿಗುಣಗೊಳಿಸುತ್ತದೆ.
3. ಅಡುಗೆಯ ರುಚಿಗಿಂತ ಭಾವನೆಗೆ ಬೆಲೆ ಕೊಡಿ
ನಿಮ್ಮ ಸಂಗಾತಿ ನಿಮಗಾಗಿ ಕಷ್ಟಪಟ್ಟು ಪ್ರೀತಿಯಿಂದ ಅಡುಗೆ ಮಾಡಿದಾಗ, ಒಂದು ವೇಳೆ ಅದರ ರುಚಿ ಸ್ವಲ್ಪ ಕೈಕೊಟ್ಟಿದ್ದರೂ ‘ಅಡುಗೆ ಸೂಪರ್ ಆಗಿದೆ’ ಎಂದು ಹೊಗಳಿ. ಅವರು ಪಟ್ಟ ಶ್ರಮಕ್ಕೆ ಸಿಗುವ ಈ ಸಕಾರಾತ್ಮಕ ಪ್ರತಿಕ್ರಿಯೆ ಅವರನ್ನು ಇನ್ನಷ್ಟು ಸಂತೋಷಪಡಿಸುತ್ತದೆ.
4. ಹೊಸ ಲುಕ್ಗಳನ್ನು ಬೆಂಬಲಿಸಿ
ಸಂಗಾತಿಯು ಹೊಸ ಹೇರ್ ಸ್ಟೈಲ್, ಹೊಸ ಉಡುಗೆ ಅಥವಾ ಯಾವುದಾದರೂ ಹೊಸ ಲುಕ್ ಪ್ರಯತ್ನಿಸಿದಾಗ ಅದನ್ನು ಅಪಹಾಸ್ಯ ಮಾಡಬೇಡಿ. ನಿಮಗದು ಅಷ್ಟಾಗಿ ಇಷ್ಟವಾಗದಿದ್ದರೂ ‘ತುಂಬಾ ಚೆನ್ನಾಗಿ ಕಾಣಿಸುತ್ತಿದ್ದೀರಾ’ ಎಂದು ಪ್ರೋತ್ಸಾಹಿಸಿ. ಇದು ಅವರಲ್ಲಿ ಆತ್ಮವಿಶ್ವಾಸವನ್ನು ಹೆಚ್ಚಿಸುತ್ತದೆ.
5. ‘ನಿನ್ನನ್ನು ಮಿಸ್ ಮಾಡಿಕೊಳ್ಳುತ್ತಿದ್ದೇನೆ’ ಎಂದು ಹೇಳಿ
ದಿನದ ಪ್ರತಿ ಕ್ಷಣವೂ ಸಂಗಾತಿಯನ್ನು ನೆನೆಯುತ್ತಾ ಮಿಸ್ ಮಾಡಿಕೊಳ್ಳುವುದು ಪ್ರಾಯೋಗಿಕವಾಗಿ ಅಸಾಧ್ಯ. ಆದರೂ, ದಿನದಲ್ಲಿ ಒಮ್ಮೆಯಾದರೂ ‘ಐ ಮಿಸ್ ಯೂ’ ಎಂದು ಹೇಳಿ. ಈ ಒಂದು ಸಣ್ಣ ಪ್ರೀತಿಯ ಮಾತು ಸಂಬಂಧದಲ್ಲಿ ಅವರ ಉಪಸ್ಥಿತಿ ನಿಮಗೆ ಎಷ್ಟು ಮುಖ್ಯ ಎಂಬುದನ್ನು ನೆನಪಿಸುತ್ತದೆ.
