newsics.com | ನ್ಯೂಸಿಕ್ಸ್
ನವದೆಹಲಿ: ಸತತ ಎರಡು ದಿನಗಳಿಂದ ಸುರಿಯುತ್ತಿರುವ ಮುಂಗಾರು ಮಳೆಯಿಂದಾಗಿ ದೆಹಲಿಯ ಗಾಳಿಯ ಗುಣಮಟ್ಟದಲ್ಲಿ ಸುಧಾರಣೆ ಕಂಡುಬಂದಿದ್ದು, ಕಳೆದ 3 ವರ್ಷಗಳಲ್ಲೇ ಮೊದಲ ಬಾರಿಗೆ ವಾಯು ಗುಣಮಟ್ಟ ಸೂಚ್ಯಂಕ (AQI) ‘ಉತ್ತಮ’ (Good) ಮಟ್ಟಕ್ಕೆ ತಲುಪಿದೆ.
ಕೇಂದ್ರ ಮಾಲಿನ್ಯ ನಿಯಂತ್ರಣ ಮಂಡಳಿ (CPCB) ಪ್ರಕಟಿಸಿರುವ ತಾಜಾ ವರದಿಯ ಪ್ರಕಾರ, ದೆಹಲಿಯ ಒಟ್ಟಾರೆ AQI ಕೇವಲ 48 ಕ್ಕೆ ಕುಸಿದಿದೆ. ನಿಯಮಗಳ ಪ್ರಕಾರ 0 ಇಂದ 50ರ ನಡುವೆ ಇರುವ ವಾಯು ಸೂಚ್ಯಂಕವನ್ನು ಅತ್ಯಂತ ಸುರಕ್ಷಿತ ಅಥವಾ ‘ಉತ್ತಮ’ ಎಂದು ಪರಿಗಣಿಸಲಾಗುತ್ತದೆ. ಮುನ್ನಾ ದಿನ 59 ರಷ್ಟಿದ್ದ ಸೂಚ್ಯಂಕ, ನಿರಂತರ ಮಳೆಯಿಂದಾಗಿ ಮತ್ತಷ್ಟು ಕೆಳಕ್ಕೆ ಇಳಿದು ದೆಹಲಿ ಜನರಿಗೆ ಸ್ವಚ್ಛ ಗಾಳಿಯ ಅನುಭವ ನೀಡುತ್ತಿದೆ.
ನಿರಂತರ ಮಳೆಯು ವಾತಾವರಣದಲ್ಲಿದ್ದ ಹಾನಿಕಾರಕ PM2.5 ಮತ್ತು PM10 ಧೂಳಿನ ಕಣಗಳನ್ನು ಸಂಪೂರ್ಣವಾಗಿ ಭೂಮಿಗೆ ಸೇರಿಸಿದೆ.
ಅಪರೂಪದ ದಾಖಲೆ: 2015 ರಲ್ಲಿ AQI ವ್ಯವಸ್ಥೆ ಜಾರಿಗೆ ಬಂದ ಬಳಿಕ, ದೆಹಲಿಯಲ್ಲಿ ‘ಉತ್ತಮ’ ಗಾಳಿ ದಾಖಲಾಗಿರುವುದು ಕೇವಲ 15 ದಿನಗಳು ಮಾತ್ರ.
ಹಿಂದಿನ ದಾಖಲೆಗಳು: ಇದಕ್ಕೂ ಮುನ್ನ 2023ರ ಸೆಪ್ಟೆಂಬರ್ 10 ರಂದು ಜಿ-20 ಶೃಂಗಸಭೆಯ ನಿರ್ಬಂಧ ಹಾಗೂ ಮಳೆಯ ವೇಳೆ ಮತ್ತು 2020 ರ ಕೋವಿಡ್ ಲಾಕ್ಡೌನ್ ಸಮಯದಲ್ಲಿ ಮಾತ್ರ ಇಂತಹ ಶುದ್ಧ ಗಾಳಿ ಇತ್ತು.
ತಜ್ಞರ ಎಚ್ಚರಿಕೆ: ಮುಂಗಾರು ಮಳೆಯಿಂದಾಗಿ ಮಾಲಿನ್ಯ ಸದ್ಯಕ್ಕೆ ಕಡಿಮೆಯಾಗಿದೆಯೇ ಹೊರತು ಇದು ಶಾಶ್ವತ ಪರಿಹಾರವಲ್ಲ. ವಾಹನಗಳು, ಕೈಗಾರಿಕೆಗಳು ಮತ್ತು ಕಸ ಸುಡುವುದನ್ನು ತಡೆದಾಗ ಮಾತ್ರ ದೆಹಲಿಗೆ ಮುಕ್ತಿ ಸಿಗಲಿದೆ ಎಂದು ಸೆಂಟರ್ ಫಾರ್ ಸೈನ್ಸ್ ಆ್ಯಂಡ್ ಎನ್ವಿರಾನ್ಮೆಂಟ್ನ ನಿರ್ದೇಶಕಿ ಅನುಮಿತಾ ರಾಯ್ಚೌಧುರಿ ತಿಳಿಸಿದ್ದಾರೆ.
