newsics.com| ನ್ಯೂಸಿಕ್ಸ್
ಇರಾನ್ ದೇಶದ ಮಾಜಿ ಪರಮೋಚ್ಚ ನಾಯಕ ಆಯತೊಲ್ಲಾ ಅಲಿ ಖಮೇನಿ ಅವರ ಪಾರ್ಥಿವ ಶರೀರಕ್ಕೆ ಅಂತಿಮ ನಮನ ಸಲ್ಲಿಸಲು ರಾಜಧಾನಿ ಟೆಹ್ರಾನ್ನಲ್ಲಿ ಶುಕ್ರವಾರ ಮತ್ತು ಶನಿವಾರದಂದು ಭಾರಿ ಜನಸ್ತೋಮ ಜಮಾಯಿಸಿದೆ.
ಇಸ್ಲಾಮಿಕ್ ಗಣರಾಜ್ಯದ ರಾಷ್ಟ್ರಧ್ವಜದಿಂದ ಹೊದಿಸಲ್ಪಟ್ಟಿದ್ದ ಖಮೇನಿ ಅವರ ಶವಪೆಟ್ಟಿಗೆಯ ಮೇಲೆ ಅವರ ಸಾಂಪ್ರದಾಯಿಕ ಕಪ್ಪು ಪಾಗಾವನ್ನು ಇರಿಸಲಾಗಿತ್ತು.
ಅತ್ಯಂತ ಕರುಣಾಜನಕ ಸಂಗತಿಯೆಂದರೆ, ಫೆಬ್ರವರಿ 28 ರಂದು ಅಮೆರಿಕ ಮತ್ತು ಇಸ್ರೇಲ್ ಜಂಟಿಯಾಗಿ ಇರಾನ್ ವಿರುದ್ಧ ಯುದ್ಧ ಸಾರಿದಾಗ ನಡೆದ ವೈಮಾನಿಕ ದಾಳಿಯಲ್ಲಿ ಖಮೇನಿ ಅವರೊಂದಿಗೆ ಮೃತಪಟ್ಟಿದ್ದ ಅವರ ಕುಟುಂಬಸ್ಥರ ಶವಪೆಟ್ಟಿಗೆಗಳನ್ನೂ ಅವರ ಪಕ್ಕದಲ್ಲೇ ಇಡಲಾಗಿತ್ತು. ಇದರಲ್ಲಿ ಅವರ 14 ತಿಂಗಳ ಪುಟ್ಟ ಮೊಮ್ಮಗಳು ಜಹ್ರಾ ಮೊಹಮ್ಮದಿ ಗೊಲ್ಪಾಯೆಗಾನಿ ಅವರ ಚಿಕ್ಕ ಶವಪೆಟ್ಟಿಗೆಯೂ ಸೇರಿತ್ತು. ಪುಟ್ಟ ಮಗುವಿನ ಶವಪೆಟ್ಟಿಗೆಗೆ ರಾಷ್ಟ್ರಧ್ವಜವನ್ನು ಹೊದಿಸಿ, ಪಕ್ಕದಲ್ಲೇ ಆಕೆಯ ಸುಂದರ ಭಾವಚಿತ್ರವನ್ನು ಇರಿಸಲಾಗಿದ್ದು, ಇದನ್ನು ಕಂಡು ಇಡೀ ದೇಶವೇ ಕಣ್ಣೀರು ಸುರಿಸಿದೆ.
ಖಮೇನಿ ಅವರ ಪಾರ್ಥಿವ ಶರೀರವು ಶುಕ್ರವಾರವಷ್ಟೇ ಟೆಹ್ರಾನ್ ತಲುಪಿದ್ದು, ಇರಾನ್ ಮತ್ತು ನೆರೆಯ ಇರಾಕ್ನ ವಿವಿಧ ನಗರಗಳಲ್ಲಿ ಆರು ದಿನಗಳ ಕಾಲ ಸಾರ್ವಜನಿಕ ಅಂತಿಮ ದರ್ಶನ ಹಾಗೂ ಮೆರವಣಿಗೆಯನ್ನು ಆಯೋಜಿಸಲಾಗಿದೆ. ಶುಕ್ರವಾರ ಸಂಜೆಯಿಂದಲೇ ಟೆಹ್ರಾನ್ನ ‘ಗ್ರಾಂಡ್ ಮೊಸಲ್ಲಾ’ ಧಾರ್ಮಿಕ ಸಂಕೀರ್ಣದ ಹೊರಗೆ ಲಕ್ಷಾಂತರ ಬೆಂಬಲಿಗರು ಕಾಯುತ್ತಿದ್ದರು. ಇಂದು ಮುಂಜಾನೆ ಸಾರ್ವಜನಿಕರಿಗಾಗಿ ಈ ಸಂಕೀರ್ಣದ ಬಾಗಿಲುಗಳನ್ನು ತೆರೆಯುತ್ತಿದ್ದಂತೆ ಇಡೀ ವಿಶಾಲ ಮೈದಾನವು ಶೋಕಾಕುಲರಿಂದ ತುಂಬಿಹೋಯಿತು.
ಅಂತರರಾಷ್ಟ್ರೀಯ ಸುದ್ದಿ ಸಂಸ್ಥೆ ಎಎಫ್ಪಿ ವರದಿಯ ಪ್ರಕಾರ, ಜಮಾಯಿಸಿದ್ದ ಜನರು ಇರಾನ್ ಸಂಸ್ಕೃತಿಯಲ್ಲಿ ‘ಪ್ರತಿಕಾರ’ದ ಸಂಕೇತವಾಗಿರುವ ಕೆಂಪು ಬ್ಯಾನರ್ಗಳನ್ನು ಹಿಡಿದು ಆಕ್ರೋಶ ಹೊರಹಾಕುತ್ತಿದ್ದರು. ಅಲ್ಲದೆ “ಅಮೆರಿಕಕ್ಕೆ ದಿಕ್ಕಾರ” ಮತ್ತು “ಪ್ರತಿಕಾರ, ಪ್ರತಿಕಾರವೇ ನಮ್ಮ ಧ್ಯೇಯ” ಎಂದು ಮುಗಿಲು ಮುಟ್ಟುವಂತೆ ಘೋಷಣೆಗಳನ್ನು ಕೂಗುತ್ತಿದ್ದರು.
ನಿಗದಿತ ವೇಳಾಪಟ್ಟಿಯ ಪ್ರಕಾರ, ಆಯತೊಲ್ಲಾ ಅಲಿ ಖಮೇನಿ ಅವರ ಶವಪೆಟ್ಟಿಗೆಯನ್ನು ಸೋಮವಾರದವರೆಗೆ ಟೆಹ್ರಾನ್ನಲ್ಲೇ ಸಾರ್ವಜನಿಕ ದರ್ಶನಕ್ಕೆ ಇಡಲಾಗುವುದು ಮತ್ತು ಅಂದು ನಗರದ ಪ್ರಮುಖ ರಸ್ತೆಗಳಲ್ಲಿ ಬೃಹತ್ ಮೆರವಣಿಗೆ ಸಾಗಲಿದೆ. ತದನಂತರ ಮಂಗಳವಾರ ಇರಾನ್ನ ಪ್ರಸಿದ್ಧ ಧಾರ್ಮಿಕ ಕೇಂದ್ರವಾದ ‘ಕೋಮ್’ ನಗರಕ್ಕೆ ಪಾರ್ಥಿವ ಶರೀರವನ್ನು ಕೊಂಡೊಯ್ಯಲಾಗುವುದು. ಬುಧವಾರ ನೆರೆಯ ಇರಾಕ್ ದೇಶದ ಪವಿತ್ರ ನಗರಗಳಲ್ಲಿ ಮೆರವಣಿಗೆ ನಡೆಸಿದ ನಂತರ, ಅಂತಿಮವಾಗಿ ಗುರುವಾರದಂದು ಈಶಾನ್ಯ ಇರಾನ್ನಲ್ಲಿರುವ ಖಮೇನಿ ಅವರ ಸ್ವಂತ ನಗರವಾದ ‘ಮಶ್ಹಾದ್’ನಲ್ಲಿ ಅವರ ಭೌತಿಕ ಶರೀರದ ದಫನ ಕಾರ್ಯ ನೆರವೇರಲಿದೆ.
