newsics.com / ನ್ಯೂಸಿಕ್ಸ್
ನವದೆಹಲಿ: ದೇಶಾದ್ಯಂತ ಸಾರ್ವಜನಿಕರ ಆರೋಗ್ಯ ಮತ್ತು ಸುರಕ್ಷತೆಯ ಹಿತದೃಷ್ಟಿಯಿಂದ 16 ಸ್ಥಿರ ಡೋಸ್ ಸಂಯೋಜನೆಯ (FDC) ಔಷಧಗಳ ಉತ್ಪಾದನೆ, ಮಾರಾಟ, ವಿತರಣೆ ಮತ್ತು ಪೂರೈಕೆಯನ್ನು ಕೇಂದ್ರ ಆರೋಗ್ಯ ಸಚಿವಾಲಯವು ತಕ್ಷಣದಿಂದ ಜಾರಿಗೆ ಬರುವಂತೆ ನಿಷೇಧಿಸಿದೆ.
ವೈಜ್ಞಾನಿಕ ಪರಿಶೀಲನೆಯ ನಂತರ ಈ ನಿರ್ಧಾರವನ್ನು ತೆಗೆದುಕೊಳ್ಳಲಾಗಿದ್ದು, ಈ ನಿರ್ದಿಷ್ಟ ಔಷಧ ಸಂಯೋಜನೆಗಳು ಯಾವುದೇ ಸೂಕ್ತ ಚಿಕಿತ್ಸಕ ಮೌಲ್ಯವನ್ನು ಹೊಂದಿಲ್ಲ ಮತ್ತು ರೋಗಿಗಳಿಗೆ ಸಂಭವನೀಯ ಆರೋಗ್ಯ ಅಪಾಯಗಳನ್ನು ಉಂಟುಮಾಡಬಹುದು ಎಂದು ಸಚಿವಾಲಯ ತಿಳಿಸಿದೆ. ಎರಡು ಅಥವಾ ಅದಕ್ಕಿಂತ ಹೆಚ್ಚು ಸಕ್ರಿಯ ಔಷಧೀಯ ಪದಾರ್ಥಗಳನ್ನು (APIs) ನಿರ್ದಿಷ್ಟ ಅನುಪಾತದಲ್ಲಿ ಸೇರಿಸಿ ಈ ಎಫ್ಡಿಸಿ ಔಷಧಿಗಳನ್ನು ತಯಾರಿಸಲಾಗುತ್ತಿತ್ತು. ಸುಪ್ರೀಂ ಕೋರ್ಟ್ ನೀಡಿದ ನಿರ್ದೇಶನಗಳಿಗೆ ಅನುಗುಣವಾಗಿ, ಡ್ರಗ್ಸ್ ಟೆಕ್ನಿಕಲ್ ಅಡ್ವೈಸರಿ ಬೋರ್ಡ್ (DTAB) ರಚಿಸಿದ ತಜ್ಞರ ಸಮಿತಿಯು ಈ ಔಷಧಿಗಳ ತರ್ಕಬದ್ಧತೆ ಮತ್ತು ಹಾನಿಕಾರಕ ಪರಿಣಾಮಗಳನ್ನು ಕೂಲಂಕಷವಾಗಿ ಪರಿಶೀಲಿಸಿದ ಬಳಿಕ ಈ ಕ್ರಮ ಕೈಗೊಳ್ಳಲಾಗಿದೆ.
ನಿಷೇಧಿತ ಔಷಧಿಗಳ ಪಟ್ಟಿಯಲ್ಲಿ ಚರ್ಮದ ಕಾಯಿಲೆಗಳಿಗೆ ಬಳಸುವ ಉತ್ಪನ್ನಗಳು, ನೋವು ನಿವಾರಕಗಳು, ಹೊಟ್ಟೆನೋವು ನಿವಾರಕಗಳು (ಆಂಟಿಸ್ಪಾಸ್ಮೊಡಿಕ್ಸ್) ಮತ್ತು ಪ್ರತಿಜೀವಕ ಆಧಾರಿತ (ಆಂಟಿಬಯೋಟಿಕ್) ಸಂಯೋಜನೆಗಳು ಸೇರಿವೆ. ಮುಖ್ಯವಾಗಿ ಅಸೆಟೈಲ್ ಸ್ಯಾಲಿಸಿಲಿಕ್ ಆಸಿಡ್ ಮತ್ತು ಎಥೋಹೆಪ್ಟಾಜಿನ್; ಡೈಸೈಕ್ಲೋಮೈನ್, ಪ್ಯಾರಸಿಟಮಾಲ್ ಮತ್ತು ಕ್ಲಿಡಿನಿಯಮ್ ಬ್ರೋಮೈಡ್; ಗ್ಲಿಕಾಜೈಡ್ ಮತ್ತು ಕ್ರೋಮಿಯಂ ಪಿಕೋಲಿನೇಟ್ ನಂತಹ ಸಂಯೋಜನೆಗಳನ್ನು ನಿಷೇಧಿಸಲಾಗಿದೆ. ಇದರೊಂದಿಗೆ ಅಮೋಕ್ಸಿಸಿಲಿನ್, ಸೆಫಾಡ್ರಾಕ್ಸಿಲ್ ಮತ್ತು ಸೆಫ್ಯುರಾಕ್ಸಿಮ್ ಒಳಗೊಂಡ ಹಲವು ಆಂಟಿಬಯೋಟಿಕ್ ಸಂಯೋಜನೆಗಳು ಹಾಗೂ ಅಲೋವೆರಾ, ವಿಟಮಿನ್ ಇ, ಜೊಜೊಬಾ ಆಯಿಲ್, ಟೀ ಟ್ರೀ ಆಯಿಲ್ ಒಳಗೊಂಡ ಕೆಲವು ಚರ್ಮದ ಕ್ರೀಮ್ಗಳನ್ನು ಸಹ ಬ್ಯಾನ್ ಮಾಡಲಾಗಿದೆ.
ಕೇಂದ್ರ ಸರ್ಕಾರವು ಡ್ರಗ್ಸ್ ಮತ್ತು ಕಾಸ್ಮೆಟಿಕ್ಸ್ ಆಕ್ಟ್ 1940 ರ ಸೆಕ್ಷನ್ 26A ಅಡಿಯಲ್ಲಿ ಈ ನಿಷೇಧದ ಆದೇಶವನ್ನು ಹೊರಡಿಸಿದೆ. ದೇಶದಲ್ಲಿ ಔಷಧಿಗಳ ತರ್ಕಬದ್ಧ ಬಳಕೆಯನ್ನು ಉತ್ತೇಜಿಸಲು, ರೋಗಿಗಳ ಸುರಕ್ಷತೆಯನ್ನು ಬಲಪಡಿಸಲು ಮತ್ತು ವೈಜ್ಞಾನಿಕವಾಗಿ ಮೌಲ್ಯೀಕರಿಸಿದ ಔಷಧಿಗಳು ಮಾತ್ರ ಮಾರುಕಟ್ಟೆಯಲ್ಲಿ ಲಭ್ಯವಿರುವುದನ್ನು ಖಚಿತಪಡಿಸಿಕೊಳ್ಳಲು ಈ ಕ್ರಮ ಅನಿವಾರ್ಯವಾಗಿದೆ ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ. ಸದ್ಯ ಎಲ್ಲಾ ರಾಜ್ಯಗಳ ಔಷಧ ನಿಯಂತ್ರಕರು ಮತ್ತು ಜಾರಿ ಏಜೆನ್ಸಿಗಳಿಗೆ ಈ ನಿಷೇಧವನ್ನು ಕಟ್ಟುನಿಟ್ಟಾಗಿ ಜಾರಿಗೊಳಿಸಲು ಸೂಚಿಸಲಾಗಿದ್ದು, ತಯಾರಕರು ಮತ್ತು ವಿತರಕರು ಈ ನಿಯಮವನ್ನು ಕಡ್ಡಾಯವಾಗಿ ಪಾಲಿಸುವಂತೆ ಆದೇಶಿಸಲಾಗಿದೆ.
ಐಟಿ ಷೇರುಗಳಲ್ಲಿ ಭಾರಿ ಕುಸಿತ: ಕೆಲವೇ ನಿಮಿಷಗಳಲ್ಲಿ ಹೂಡಿಕೆದಾರರಿಗೆ ₹2 ಲಕ್ಷ ಕೋಟಿ ನಷ್ಟ!
ಜಿಮ್ನಲ್ಲಿ ವರ್ಕೌಟ್ ಮಾಡುತ್ತಿದ್ದ 38 ವರ್ಷದ ಪೊಲೀಸ್ ಅಧಿಕಾರಿ ಏಕಾಏಕಿ ಕುಸಿದು ಸಾವು
