newsics.com/ನ್ಯೂಸಿಕ್ಸ್
2017ರಿಂದೀಚೆಗೆ ದುಡಿಯುವ ವಯಸ್ಸಿನ ಪುರುಷರಲ್ಲಿ ಹೃದಯಾಘಾತವಲ್ಲದ ಹಠಾತ್ ಸಾವಿನ ಪ್ರಕರಣಗಳ ಸಂಖ್ಯೆ ಎರಡು ಪಟ್ಟು ಹೆಚ್ಚಾಗಿದ್ದು, 9,127ರಿಂದ 19,088ಕ್ಕೆ ಏರಿಕೆಯಾಗಿದೆ ಎಂದು ರಾಷ್ಟ್ರೀಯ ಅಪರಾಧ ದಾಖಲೆಗಳ ಬ್ಯೂರೋ (NCRB) ವರದಿ ತಿಳಿಸಿದೆ.
ಪ್ರತಿದಿನವೂ ಸರಾಸರಿ 52 ಹಠಾತ್ ಸಾವಿನ ಪ್ರಕರಣಗಳು ವರದಿಯಾಗುತ್ತಿದ್ದು, ಇದು ಹಿಂದೆ ಇದ್ದುದಕ್ಕಿಂತ ಶೇ.25ರಷ್ಟು ಅಧಿಕವೆಂದು ವರದಿ ಹೇಳಿದೆ.
ಭಾರತದಲ್ಲಿ ಹಠಾತ್ ಸಾವಿನ ಪ್ರಕರಣಗಳಲ್ಲಿ, ಅದರಲ್ಲೂ 30-60 ವಯೋಗುಂಪಿನವರಲ್ಲಿ ತೀವ್ರ ಏರಿಕೆಯಾಗಿದೆ. 2024ರಲ್ಲಿ 76,024 ಮಂದಿ ಹಠಾತ್ ಸಾವನ್ನಪ್ಪಿದ್ದು, ದಶಕದಲ್ಲಿಯೇ ಇದು ಗರಿಷ್ಠವಾಗಿದೆ. ಅವರ ಪೈಕಿ 48,999 ಮಂದಿ 30-60 ವರ್ಷದ ವಯಸ್ಸಿನ ಪುರುಷರಾಗಿದ್ದಾರೆ. ಅಂದರೆ ಪ್ರತಿದಿನವೂ ದುಡಿಯುವ ವಯಸ್ಸಿನ 120 ಮಂದಿ ಪುರುಷರು ಹಠಾತ್ತನೇ ಸಾವನ್ನಪ್ಪಿದ್ದಾರೆ. 2017ರಲ್ಲಿ ಪ್ರತಿ ದಿನವೂ 64 ಮಂದಿ, ಅಂದರೆ ಒಟ್ಟು 23,396 ಮಂದಿ ಈ ರೀತಿ ಸಾವಿಗೀಡಾಗಿದ್ದರು.
NCRB ಪ್ರಕಾರ, 2023ರಲ್ಲಿ 63,609 ಮಂದಿ ಹಠಾತ್ ಸಾವಿಗೀಡಾಗಿದ್ದರೆ, 2024ರಲ್ಲಿ ಅಂತಹ ಪ್ರಕರಣಗಳಲ್ಲಿ ಶೇ.20ರಷ್ಟು ಏರಿಕೆಯಾಗಿದೆ. ಇದು 2017ರಲ್ಲಿ ಇದ್ದುದಕ್ಕಿಂತ (42,999) ಶೇ.77ರಷ್ಟು ಹೆಚ್ಚಾಗಿದೆ.
►ಹೃದಯಾಘಾತದ ಸಾವಿನ ಪ್ರಕರಣಗಳಲ್ಲೂ ಹೆಚ್ಚಳ
ಈ ಅವಧಿಯಲ್ಲಿ ಇದೇ ವಯೋಗುಂಪಿನವರಲ್ಲಿ ಹೃದಯಾಘಾತಕ್ಕೆ ಸಂಬಂಧಿಸಿದ ಹಠಾತ್ ಸಾವಿನ ಪ್ರಕರಣಗಳ ಸಂಖ್ಯೆ 14,011ರಿಂದ 23,600ಕ್ಕೆ ಏರಿಕೆಯಾಗಿದೆ.
2017ರಲ್ಲಿ ಹಠಾತ್ ಸಾವಿನ ಪ್ರಕರಣಗಳು ಎಲ್ಲಾ ಆಕಸ್ಮಿಕ ಸಾವಿನ ಪ್ರಕರಣಗಳ ಶೇ.11ರಷ್ಟಾಗಿದ್ದವು. ಆದರೆ ಅಪಘಾತದ ಪ್ರಕರಣಗಳ ಸಂಖ್ಯೆ ಇದಕ್ಕಿಂತ ತೀರಾ ಅಧಿಕವಾಗಿದ್ದು, ಶೇ.45.1ರಷ್ಟಿತ್ತು.
2024ರಲ್ಲಿ ಎಲ್ಲಾ ಆಕಸ್ಮಿಕ ಸಾವಿನ ಪ್ರಕರಣಗಳ ಪೈಕಿ ಹಠಾತ್ ಸಾವಿನ ಪ್ರಕರಣಗಳ ಪಾಲು ಶೇ.43.4 ಆಗಿದೆಯೆಂದು ದಾಖಲೆಗಳ ಬ್ಯೂರೋ ವರದಿ ತಿಳಿಸಿದೆ.
