https://youtube.com/shorts/lsgNUyCTs8Y?si=OuKr-U-hBu1JK7p1
newsics.com
ಮಧ್ಯಪ್ರಾಚ್ಯದಲ್ಲಿ ಅಮೆರಿಕ-ಇಸ್ರೇಲ್ ಮತ್ತು ಇರಾನ್ ನಡುವೆ ಎರಡು ವಾರಗಳ ಕದನ ವಿರಾಮ ಒಪ್ಪಂದ ಜಾರಿಯಾಗುತ್ತಿದ್ದಂತೇ, ಭಾರತೀಯ ಷೇರು ಮಾರುಕಟ್ಟೆ ನಳನಳಿಸಲಾರಂಭಿಸಿದೆ. ಹೂಡಿಕೆದಾರರ ಸಂಪತ್ತು ಒಂದೇ ದಿನದಲ್ಲಿ ಸುಮಾರು 9 ಲಕ್ಷ ಕೋಟಿ ರೂಪಾಯಿ ಹೆಚ್ಚಾಗಿದೆ.
ಸೆನ್ಸೆಕ್ಸ್ 1,400 ಪಾಯಿಂಟ್ಸ್ಗಳಿಗಿಂತ ಹೆಚ್ಚು (ಸುಮಾರು 2%) ಏರಿಕೆ ಕಂಡು 78,270 ಮಟ್ಟವನ್ನು ತಲುಪಿತು. ನಿಫ್ಟಿ 400 ಪಾಯಿಂಟ್ಸ್ಗಳಿಗಿಂತ ಹೆಚ್ಚು ಏರಿಕೆ ಕಂಡು 24,281 ಮಟ್ಟವನ್ನು ಮುಟ್ಟಿತು. ಬಿಎಸ್ಇ (BSE) ಪಟ್ಟಿಯಲ್ಲಿದ್ದ ಕಂಪನಿಗಳ ಒಟ್ಟು ಮಾರುಕಟ್ಟೆ ಮೌಲ್ಯವು 449 ಲಕ್ಷ ಕೋಟಿಯಿಂದ 458 ಲಕ್ಷ ಕೋಟಿಗೆ ಏರಿಕೆಯಾಗಿದೆ.
1. ಅಮೆರಿಕ–ಇರಾನ್ ಮಾತುಕತೆಯ ಹೊಸ ಭರವಸೆ: ಅಮೆರಿಕ ಮತ್ತು ಇರಾನ್ ನಡುವಿನ ಸಂಘರ್ಷವನ್ನು ಬಗೆಹರಿಸಲು ಶೀಘ್ರದಲ್ಲೇ ಮಾತುಕತೆಗಳು ಪುನರಾರಂಭಗೊಳ್ಳಬಹುದು ಎಂಬ ವರದಿಗಳು ಮಾರುಕಟ್ಟೆಯಲ್ಲಿ ಧನಾತ್ಮಕ ಸಂಚಲನ ಮೂಡಿಸಿವೆ. ಪಾಕಿಸ್ತಾನದಲ್ಲಿ ಮುಂದಿನ ಎರಡು ದಿನಗಳಲ್ಲಿ ಮಾತುಕತೆ ನಡೆಯಬಹುದು ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹೇಳಿರುವುದು ಹೂಡಿಕೆದಾರರಲ್ಲಿ ಭರವಸೆ ಮೂಡಿಸಿದೆ.
2. ಕಚ್ಚಾ ತೈಲ ಬೆಲೆಯಲ್ಲಿ ಭಾರಿ ಇಳಿಕೆ: ಜಾಗತಿಕ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲ ಬೆಲೆ ಕುಸಿದಿರುವುದು ಭಾರತೀಯ ಮಾರುಕಟ್ಟೆಗೆ ವರದಾನವಾಗಿದೆ. ಬ್ರೆಂಟ್ ಕ್ರೂಡ್ ಬೆಲೆ ಪ್ರತಿ ಬ್ಯಾರೆಲ್ಗೆ 95 ಡಾಲರ್ ಗಿಂತ ಕೆಳಕ್ಕೆ ಇಳಿದಿದೆ. ಇದು ಹಣದುಬ್ಬರ ಇಳಿಕೆಗೆ ಸಹಕಾರಿಯಾಗಲಿದೆ ಎಂಬ ನಿರೀಕ್ಷೆ ಮಾರುಕಟ್ಟೆಗೆ ಬಲ ನೀಡಿದೆ.
3. ಜಾಗತಿಕ ಮಾರುಕಟ್ಟೆಗಳ ಸಕಾರಾತ್ಮಕ ಪ್ರಭಾವ: ಏಷ್ಯಾ ಮತ್ತು ಅಮೆರಿಕದ ಷೇರು ಮಾರುಕಟ್ಟೆಗಳಲ್ಲಿ ಕಂಡುಬಂದ ಏರಿಕೆ ಭಾರತದ ಮೇಲೂ ಪ್ರಭಾವ ಬೀರಿದೆ. ಜಪಾನ್ನ ನಿಕೈ, ದಕ್ಷಿಣ ಕೊರಿಯಾದ ಕಾಸ್ಪಿ ಮತ್ತು ಅಮೆರಿಕದ ನಾಸ್ಡಾಕ್ ಸೂಚ್ಯಂಕಗಳು ಗಣನೀಯ ಏರಿಕೆ ಕಂಡಿವೆ.
4. ಬಲಗೊಂಡ ರೂಪಾಯಿ ಮೌಲ್ಯ: ಅಂತರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಡಾಲರ್ ಎದುರು ರೂಪಾಯಿ ಮೌಲ್ಯ 12 ಪೈಸೆ ಏರಿಕೆಯಾಗಿ 93.23 ಕ್ಕೆ ತಲುಪಿದೆ. ತೈಲ ಬೆಲೆ ಇಳಿಕೆ ಮತ್ತು ಭೌಗೋಳಿಕ ರಾಜಕೀಯ ಉದ್ವಿಗ್ನತೆ ಕಡಿಮೆಯಾಗಿರುವುದು ರೂಪಾಯಿಗೆ ಶಕ್ತಿ ನೀಡಿದೆ.
5. ತಾಂತ್ರಿಕ ಅಂಶಗಳು: ಷೇರು ಮಾರುಕಟ್ಟೆಯ ತಾಂತ್ರಿಕ ವಿಶ್ಲೇಷಣೆಯಂತೆ, ನಿಫ್ಟಿ 24,100 ಮಟ್ಟವನ್ನು ದಾಟಿರುವುದು ಹೆಚ್ಚಿನ ಏರಿಕೆಗೆ ದಾರಿಯಾಗಿದೆ. ಇದು ಹೀಗೆಯೇ ಮುಂದುವರಿದರೆ ನಿಫ್ಟಿ 24,500 ಮಟ್ಟವನ್ನು ತಲುಪಬಹುದು ಎಂದು ತಜ್ಞರು ಅಂದಾಜಿಸಿದ್ದಾರೆ.
