newsics.com
ನವದೆಹಲಿ: ಭಾರತದ ಪ್ರಧಾನಿ ನರೇಂದ್ರ ಮೋದಿ ಅವರ ಜನಪ್ರಿಯತೆ ಗಡಿ ದಾಟಿ ಜಾಗತಿಕ ಮಟ್ಟದಲ್ಲಿ ಹೊಸ ಎತ್ತರಕ್ಕೇರಿದೆ. ಅಮೆರಿಕದ ಡೇಟಾ ವಿಶ್ಲೇಷಣಾ ಸಂಸ್ಥೆ ಮಾರ್ನಿಂಗ್ ಕನ್ಸಲ್ಟ್ನ ಇತ್ತೀಚಿನ ಸಮೀಕ್ಷೆಯ ಪ್ರಕಾರ, ಪ್ರಧಾನಿ ಮೋದಿ ಶೇ. 68 ರಷ್ಟು ಅನುಮೋದನೆಯೊಂದಿಗೆ ಮೊದಲ ಸ್ಥಾನವನ್ನು ಅಲಂಕರಿಸಿದ್ದಾರೆ. ಇತ್ತ ಅಮೆರಿಕದ ಪ್ರಭಾವಿ ನಾಯಕ ಡೊನಾಲ್ಡ್ ಟ್ರಂಪ್ ಸೇರಿದಂತೆ ಹಲವು ಗಣ್ಯರು ಅಗ್ರ 10ರ ಪಟ್ಟಿಯಿಂದ ಹೊರಬಿದ್ದಿರುವುದು ಕುತೂಹಲ ಮೂಡಿಸಿದೆ.
ಮಾರ್ಚ್ 2 ರಿಂದ 8 ರವರೆಗೆ ಮಾರ್ನಿಂಗ್ ಕನ್ಸಲ್ಟ್ ನಡೆಸಿದ ಸಮೀಕ್ಷೆಯು ಇತರ ಜಾಗತಿಕ ನಾಯಕರ ಸ್ಥಾನಮಾನವನ್ನು ಬಹಿರಂಗಪಡಿಸಿದ್ದು, ಅದರಲ್ಲಿ, ಸ್ವಿಟ್ಜರ್ಲೆಂಡ್ನ ಗೈ ಪಾರ್ಮೆಲಿನ್ ಹಾಗೂ ದಕ್ಷಿಣ ಕೊರಿಯಾದ ಲೀ ಜೇ-ಮ್ಯುಂಗ್ ತಲಾ ಶೇ. 62 ರಷ್ಟು ಅನುಮೋದನೆ ರೇಟಿಂಗ್ ಪಡೆದು ಎರಡನೇ ಸ್ಥಾನದಲ್ಲಿದ್ದಾರೆ. ಜೆಕ್ ಗಣರಾಜ್ಯದ ಆಂಡ್ರೆಜ್ ಬಾಬಿಸ್ ಶೇ. 57 ಮತ್ತು ಅರ್ಜೆಂಟೀನಾದ ಜೇವಿಯರ್ ಮೆಲ್ಲಿ ಶೇ. 56 ಬೆಂಬಲದೊಂದಿಗೆ ನಂತರದ ಸ್ಥಾನಗಳನ್ನು ಪಡೆದಿದ್ದಾರೆ. ಜಪಾನ್ನ ಸನೇ ತಕೈಚಿ ಹಾಗೂ ಕೆನಡಾದ ಮಾರ್ಕ್ ಕಾರ್ನಿ ಕೂಡ ಶೇ. 56 ರಷ್ಟು ಅನುಮೋದನೆ ಪಡೆದಿದ್ದಾರೆ.
ಈ ಪಟ್ಟಿಯಲ್ಲಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅಗ್ರ 10 ಸ್ಥಾನದಲ್ಲೂ ಕಾಣಿಸಿಕೊಳ್ಳಲಿಲ್ಲ. ಅವರಿಗೆ ಕೇವಲ ಶೇ. 39 ರಷ್ಟು ಅನುಮೋದನೆ ಸಿಕ್ಕಿದ್ದು, ಶೇ. 55 ರಷ್ಟು ಜನರು ವಿರೋಧ ವ್ಯಕ್ತಪಡಿಸಿದ್ದಾರೆ. ಬ್ರಿಟನ್ ಪ್ರಧಾನಿ ಕೀರ್ ಸ್ಟಾರ್ಮರ್ ಶೇ. 24 ಮತ್ತು ಜರ್ಮನಿಯ ಫ್ರೆಡ್ರಿಕ್ ಮೆರ್ಜ್ ಶೇ. 20 ರಷ್ಟು ಬೆಂಬಲ ಪಡೆದಿದ್ದಾರೆ. ಫ್ರಾನ್ಸ್ ಅಧ್ಯಕ್ಷ ಎಮ್ಯಾನುಯೆಲ್ ಮ್ಯಾಕ್ರನ್ ಕೇವಲ ಶೇ. 17 ರಷ್ಟು ಅನುಮೋದನೆಯೊಂದಿಗೆ ಪಟ್ಟಿಯಲ್ಲಿ ಹಿಂಬದಿಯಲ್ಲಿದ್ದಾರೆ.
ಜಾಗತಿಕ ಜನಪ್ರಿಯತೆಗೆ ಜೊತೆಯಾಗಿ ಪ್ರಧಾನಿ ಮೋದಿ ಭಾರತೀಯ ರಾಜಕೀಯದಲ್ಲೂ ಮಹತ್ವದ ಸಾಧನೆ ಮಾಡಿದ್ದಾರೆ. ಗುಜರಾತ್ ಮುಖ್ಯಮಂತ್ರಿ ಹಾಗೂ ಭಾರತದ ಪ್ರಧಾನಿಯಾಗಿ ಒಟ್ಟು 8,931 ದಿನಗಳ ಸೇವೆ ಸಲ್ಲಿಸಿದ್ದು, ಇದು ಸ್ವತಂತ್ರ ಭಾರತದ ಇತಿಹಾಸದಲ್ಲಿ ದೀರ್ಘಾವಧಿಯ ನಾಯಕತ್ವದ ದಾಖಲೆಯಾಗಿದೆ.
https://www.newsics.com/2026/03/26/terrorist-links-12-accused-including-one-from-karnataka-arrested/
