Subscribe ನ್ಯೂಸಿಕ್ಸ್ ಕನ್ನಡ
newsics.com
ಬಾರಾಮತಿಯಲ್ಲಿ ಸಂಭವಿಸಿದ ಭೀಕರ ವಿಮಾನ ಅಪಘಾತಕ್ಕೆ ಐದು ದಿನಗಳ ಮೊದಲು ಅಜಿತ್ ಪವಾರ್ ವ್ಯಕ್ತಪಡಿಸಿದ ಮನದಾಳದ ಮಾತುಗಳು ಈಗ ಎಲ್ಲರಿಗೂ ಕಣ್ಣೀರು ತರಿಸುತ್ತಿವೆ.
ಅಜಿತ್ ಪವಾರ್ ಅವರ ಆಪ್ತ ಸ್ನೇಹಿತ ಹಾಗೂ ವಿದ್ಯಾ ಪ್ರತಿಷ್ಠಾನದ ಟ್ರಸ್ಟಿ ಕಿರಣ್ ಗುಜರ್ ಅವರು ಹಂಚಿಕೊಂಡ ನೆನಪುಗಳು ಅಜಿತ್ ಅವರ ಒಳಗಿನ ಸಂಕಟವನ್ನು ಬಹಿರಂಗಪಡಿಸುತ್ತವೆ. ನನಗೆ ಈಗ ತುಂಬಾ ಬೇಸರವಾಗಿದೆ… ಈ ಎಲ್ಲದಿಂದ ನನಗೆ ಸಾಕು ಅನಿಸುತ್ತಿದೆ ಎಂದು ದಾದಾ ಹೇಳಿದ್ದನ್ನು ಗುಜರ್ ನೆನಪಿಸಿಕೊಂಡಿದ್ದಾರೆ.
ಅಪಘಾತಕ್ಕೂ ಐದು ದಿನಗಳ ಹಿಂದೆ ದಾದಾ ತುಂಬಾ ಒತ್ತಡದಲ್ಲಿದ್ದರು ಎಂದು ಗುಜರ್ ಹೇಳಿದ್ದಾರೆ. ಒಂದು ದಿನ ಅವರು ನನಗೆ ಕರೆ ಮಾಡಿ, ಕಿರಣ್, ಸ್ವಲ್ಪ ಹೊರಗೆ ಹೋಗೋಣ’ ಎಂದರು. ನಾವು ಇಬ್ಬರೂ ಅರ್ಧ ದಿನ ಒಟ್ಟಿಗೆ ಹೊರಗಡೆ ಕಾಲ ಕಳೆದು, ಒಟ್ಟಿಗೆ ಊಟ ಮಾಡಿದೆವು. ಅದು ನನ್ನ ಜೀವನದಲ್ಲಿ ದಾದಾ ಅವರೊಂದಿಗಿನ ಕೊನೆಯ ಊಟವಾಗುತ್ತದೆ ಎಂದು ನಾನು ಕನಸಲ್ಲೂ ಊಹಿಸಿರಲಿಲ್ಲ” ಎಂದು ಅವರು ಭಾವೋದ್ವೇಗದಿಂದ ಹೇಳಿದರು.
ಆ ದಿನವೂ ಅಜಿತ್ ಅದೇ ಮಾತನ್ನು ಮರುಮರು ಹೇಳುತ್ತಿದ್ದರು. “ನನಗೆ ಈಗ ದಣಿವಾಗಿದೆ… ಈ ಎಲ್ಲ ರಾಜಕೀಯ ವಿಚಾರಗಳಿಂದ ನನಗೆ ತುಂಬಾ ತೊಂದರೆಯಾಗುತ್ತಿದೆ ಎಂಬ ಅಸಮಾಧಾನ ಅವರ ಮಾತುಗಳಲ್ಲಿ ಸ್ಪಷ್ಟವಾಗಿ ಕಾಣುತ್ತಿತ್ತು. ಅಧಿಕಾರ ರಾಜಕಾರಣದಲ್ಲಿ ಸದಾ ಸಕ್ರಿಯರಾಗಿದ್ದ ಈ ನಾಯಕ ಹೀಗೆ ಮಾತಾಡುತ್ತಿದ್ದುದೇಕೆ ಎಂಬ ಪ್ರಶ್ನೆ ಈಗ ಎಲ್ಲರನ್ನೂ ಕಾಡುತ್ತಿದೆ.
ಅತ್ಯಂತ ಹೃದಯವಿದ್ರಾವಕ ಸಂಗತಿ ಎಂದರೆ, ಅಪಘಾತಕ್ಕೆ ಕೆಲ ನಿಮಿಷಗಳ ಮೊದಲು ದಾದಾ ಗುಜರ್ಗೆ ಕರೆ ಮಾಡಿ, “ನಾನು ವಿಮಾನ ಹತ್ತುತ್ತಿದ್ದೇನೆ” ಎಂದಿದ್ದರು. ಗುಜರ್ ಅವರನ್ನು ವಿಮಾನ ನಿಲ್ದಾಣಕ್ಕೆ ಕರೆದುಕೊಂಡು ಹೋಗಿದ್ದರು. ಕೆಲವೇ ಕ್ಷಣಗಳಲ್ಲಿ, ಅವರ ಕಣ್ಣ ಮುಂದೆಯೇ ವಿಮಾನ ಅಪಘಾತಕ್ಕೀಡಾಯಿತು. “ಶವವನ್ನು ಕಾರಿನಲ್ಲಿ ಇಡುವಾಗ ಅದು ದಾದಾ ಎಂದು ಗುರುತಿಸಿದೆ. ಇದು ಕೆಟ್ಟ ಕನಸಾಗಿರಲಿ ಎಂದು ಆಶಿಸಿದೆ, ಆದರೆ ಅದು ನಿಜವಾಗಿತ್ತು” ಎಂದು ಗುಜರ್ ಕಣ್ಣೀರು ಹಾಕಿದರು.
