Subscribe ನ್ಯೂಸಿಕ್ಸ್ ಕನ್ನಡ NewsicsKannada/YouTube
newsics.com
ಬೆಳಗಾವಿ ಜಿಲ್ಲೆ ಅಥಣಿ ಸೇರಿ ಕೆಲ ತಾಲೂಕುಗಳಿಗೆ ಕಾಲಿಟ್ಟರೆ ಸಾಕು ನಿಮಗೆ ಚರ್ಮದ ವಾಸನೆ ಬಡಿಯುತ್ತದೆ. ಚರ್ಮದ ಚಪ್ಪಲಿಗಳ ತಯಾರಿಕೆಗೆ ಈ ಊರು ಪ್ರಸಿದ್ಧಿ ಪಡೆದಿದೆ. ಆದರೆ, ಇಲ್ಲಿ ತಯಾರಾಗುವ ಚಪ್ಪಲಿಗಳು, ‘ಕೊಲ್ಹಾಪುರೀಸ್’ ಹೆಸರಿನಲ್ಲಿ ಮಾರಾಟವಾಗುತ್ತಿವೆ.
ಇದೀಗ ಲೆದರ್ ಉದ್ಯಮದ ಪ್ರೋತ್ಸಾಹಕ್ಕೆಂದು ಇರುವ ಸರ್ಕಾರಿ ಸ್ವಾಮ್ಯದ ಲಿಡ್ಕರ್ ಹಾಗೂ ಮಹಾರಾಷ್ಟ್ರದ ಲಿಡ್ಕಾಮ್ ನಿಗಮ ಸಂಸ್ಥೆಗಳ ಜತೆ ಇಟಲಿಯ ಪ್ರಸಿದ್ಧ ಪ್ರಾಡಾ ಕಂಪನಿ ಅನಿವಾರ್ಯವಾಗಿ ಎಂಒಯು (ಒಡಂಬಡಿಕೆ) ಮಾಡಿಕೊಂಡಿದೆ.
ಮುಂಬೈನಲ್ಲಿರುವ ಇಟಲಿ ರಾಯಭಾರ ಕಚೇರಿಯಲ್ಲಿ ನಡೆದ ಇಟಲಿ-ಭಾರತ ಬ್ಯುಸಿನೆಸ್ ಫೋರಂ ಸಂದರ್ಭದಲ್ಲಿ ಈ ತಿಳಿವಳಿಕೆ ಒಪ್ಪಂದಕ್ಕೆ ಸಹಿ ಹಾಕಲಾಗಿದೆ.
ಲಿಡ್ಕರ್ನ ಉತ್ಪನ್ನವಾದ ಜಿಐ ಟ್ಯಾಗ್ ಹೊಂದಿರುವ ಕೊಲ್ಹಾಪುರಿ ಚಪ್ಪಲಿ ತನ್ನದೆಂದು ಇಟಲಿಯ ಪ್ರಾಡಾ ಕಾಂಪನಿ ಹೇಳಿಕೊಂಡಿದ್ದನ್ನೇ ಆಧಾರವಾಗಿಟ್ಟುಕೊಂಡು ಲಿಡ್ಕರ್ ಎಂಡಿ ಡಾ.ಕೆ.ಎಂ. ವಸುಂಧರಾ ಅವರು ಪ್ರಾಡಾ ಕಂಪನಿಗೆ ಲೀಗಲ್ ನೋಟಿಸ್ ಕಳುಹಿಸಿದ ಬಳಿಕ ಪ್ರಾಡಾ ಕಂಪನಿ ಅಧಿಕಾರಿಗಳು ಮಾಡಿದ ತಪ್ಪನ್ನು ತಿದ್ದಿಕೊಳ್ಳುವ ಭಾಗವಾಗಿ ಲಿಡ್ಕರ್ ಹಾಗೂ ಲಿಡ್ಕಾಮ್ನ ಕೊಲ್ಹಾಪುರಿ ಚಪ್ಪಲಿಯ ಲಿಮಿಟೆಡ್ ಎಡಿಷನ್ ತರಲು ಪ್ರಾಡಾ ಮುಂದಾಗಿದೆ. ಈ ಮೂಲಕ ಕೊಲ್ಹಾಪುರಿ ಚಪ್ಪಲಿ ಅಧಿಕೃತವಾಗಿ ಇಟಲಿಯನ್ನು ಪ್ರವೇಶಿಸುವ ಮೂಲಕ ಜಾಗತಿಕ ಮನ್ನಣೆ ಪಡೆದುಕೊಂಡಿದೆ.
ಇದಕ್ಕಾಗಿ ಈಗ ಇಟಲಿಯ ಪ್ರಾಡಾ ಕಂಪನಿ ಭಾರತದ ಚರ್ಮಕಾರರೊಂದಿಗೆ ಒಪ್ಪಂದ ಮಾಡಿಕೊಂಡಿದೆ ಎಂದು ಕೇಂದ್ರ ವಾಣಿಜ್ಯ ಸಚಿವ ಪೀಯೂಶ್ ಗೋಯಲ್ ಹೇಳಿದ್ದಾರೆ.
ಕೊಲ್ಹಾಪುರಿ ಶೈಲಿಯ ಚಪ್ಪಲಿಗಳು ಮಹಾರಾಷ್ಟ್ರದ ಕೊಲ್ಹಾಪುರಿಯಲ್ಲಿ ಮಾರಾಟವಾಗುತ್ತವೆ. ಕರ್ನಾಟಕ ಹಾಗೂ ಮಹಾರಾಷ್ಟ್ರದ ಕೆಲ ಜಿಲ್ಲೆಗಳಲ್ಲಿ ಈ ಶೈಲಿಯ ಚಪ್ಪಲಿಗಳನ್ನು ತಯಾರಿಸುವ ಚರ್ಮಕಾರರು ಇದ್ದಾರೆ. ಪ್ರಾಡಾ ಕಂಪನಿಯ ವಿನ್ಯಾಸ ಮತ್ತು ಸಾಮಗ್ರಿಗಳನ್ನು ಬಳಸಿ ಈ ಚರ್ಮಕಾರರು ತಮ್ಮ ಸಾಂಪ್ರದಾಯಿಕ ವಿಧಾನಗಳಿಂದ ಚಪ್ಪಲಿ ತಯಾರಿಸಿಕೊಡುವುದು ಈ ಒಡಂಬಡಿಕೆಯ ಮುಖ್ಯಾಂಶವಾಗಿದೆ.
ಡಿ. 16 ರಾಜ್ಯಕ್ಕೆ ರಾಷ್ಟ್ರಪತಿ ದ್ರೌಪದಿ ಮುರ್ಮು ಭೇಟಿ: ಸುತ್ತೂರು ಮಠದ ಕಾರ್ಯಕ್ರಮದಲ್ಲಿ ಭಾಗಿ
