newsics.com
ವೈವಾಹಿಕ ಸಂಬಂಧಗಳು ನೂಲಿನಷ್ಟೇ ಸೂಕ್ಷ್ಮ ಎನ್ನುವುದನ್ನು ಸಂಗಾತಿಗಳಿಬ್ಬರು ತಿಳಿದುಕೊಂಡಿರುವುದು ಅಗತ್ಯ. ಕೆಲವೊಮ್ಮೆ ವಿವಾಹಿತ ಪುರುಷರು ಪರಸ್ತ್ರೀ ಸಂಗವನ್ನು ಬಯಸುವುದು ಇದೆ.
ಆದರೆ ಕೇವಲ ಪುರುಷರು ಮಾತ್ರವಲ್ಲದೆ, ಕೆಲವೊಮ್ಮೆ ಮಹಿಳೆಯರು ಕೂಡ ವಿವಾಹೇತರ ಸಂಬಂಧದಲ್ಲಿ ಸಿಲುಕಿರುವುದನ್ನು ಇಂದಿನ ದಿನಗಳಲ್ಲಿ ನಾವು ಕಾಣುತ್ತಿದ್ದೇವೆ. ಒಳ್ಳೆಯ ಪತಿ, ಆರ್ಥಿಕವಾಗಿಯೂ ಯಾವುದೇ ಸಮಸ್ಯೆಯಿಲ್ಲದೆ ಇದ್ದರೂ ಕೆಲವರು ಈ ಸಂಬಂಧದ ಹೊರಗಡೆ ಪ್ರೀತಿಗಾಗಿ ಹಾತೊರೆಯುತ್ತಾರೆ. ಅದು ಯಾಕೆ ಎನ್ನುವುದೇ ಕೆಲವರಿಗೆ ಪ್ರಶ್ನೆಯಾಗಿ ಕಾಡುವುದು.
ಭಾವನಾತ್ಮಕ ಬೆಂಬಲ: ಮದುವೆಯಾದ ನಂತರ ಮಹಿಳೆಯರು ಭಾವನಾತ್ಮಕ ಬಾಂಧವ್ಯವನ್ನು ಕಂಡುಕೊಳ್ಳದಿದ್ದರೆ, ಅವರು ಇತರ ಪುರುಷರತ್ತ ಆಕರ್ಷಿತರಾಗುತ್ತಾರೆ. ಅಂದರೆ ಮಹಿಳೆಗೆ ತನ್ನ ಭಾವನೆಗಳನ್ನು ಅಥವಾ ವಿಚಾರಗಳನ್ನು ಹಂಚಿಕೊಳ್ಳಲು ಯಾರಾದರೂ ಪುರುಷರು ಸಿಕ್ಕಿದರೆ ಆಗ ಅದು ಮುಂದೆ ಸಂಬಂಧವಾಗಿ ಬೆಳವಣಿಗೆ ಆಗಬಹುದು. ಮೊದಲಿಗೆ ಮಹಿಳೆಯರು ಇತರ ಪುರುಷನನ್ನು ಒಬ್ಬ ಉತ್ತಮ ಸ್ನೇಹಿತನೆಂಬಂತೆ ಕಾಣುತ್ತಾರೆ. ಆದರೆ ಕ್ರಮೇಣ ಅವರ ಸ್ನೇಹ ಪ್ರೀತಿಯಾಗಿ ಬದಲಾಗುತ್ತದೆ.
ಸಮಯದ ಕೊರತೆ: ಮದುವೆಯಾದ ಹಲವು ವರ್ಷಗಳ ನಂತರ ಪುರುಷನು ಮನೆ ಮತ್ತು ಮಕ್ಕಳ ಜವಾಬ್ದಾರಿಗಳಲ್ಲಿ ಎಷ್ಟು ಮುಳುಗಿರುತ್ತಾನೆಂದರೆ, ಆತನಿಗೆ ತನ್ನ ಹೆಂಡತಿಗೆ ಕೂಡ ಸಮಯ ನೀಡಲು ಸಾಧ್ಯವಾಗುವುದಿಲ್ಲ. ಇಂತಹ ವೇಳೆ ಮಹಿಳೆಯರು ಇತರ ಪುರುಷರತ್ತ ಆಕರ್ಷಿತರಾಗುತ್ತಾರೆ.
ತೃಪ್ತಿಯ ಕೊರತೆ: 40 ವರ್ಷದ ನಂತರ ಮಹಿಳೆಯರು ವಿವಾಹೇತರ ಸಂಬಂಧಗಳಲ್ಲಿ ತೊಡಗಿಸಿಕೊಳ್ಳಲು ಪ್ರಮುಖ ಕಾರಣವೆಂದರೆ ದೈಹಿಕ ತೃಪ್ತಿಯ ಕೊರತೆ. ಒಬ್ಬ ಮಹಿಳೆ ತನ್ನ ಗಂಡನಿಂದ ದೈಹಿಕ ಸುಖವನ್ನು ಪಡೆಯಲು ಸಾಧ್ಯವಾಗದಿದ್ದಾಗ ಮಾತ್ರ ಆಕೆ ಮತ್ತೊಬ್ಬ ಪುರುಷನ ಕಡೆಗೆ ಆಕರ್ಷಿತಳಾಗಬಹುದು.
ದಿನನಿತ್ಯದ ಜಗಳಗಳು: ಮನೆಯಲ್ಲಿ ದಿನನಿತ್ಯದ ಜಗಳಗಳು ಗಂಡ ಹೆಂಡತಿಯ ನಡುವಿನ ಪ್ರೀತಿಯನ್ನು ಕಡಿಮೆ ಮಾಡುತ್ತದೆ. ಇಂತಹ ಘಟನೆಗಳು ವಿವಾಹೇತರ ಸಂಬಂಧಕ್ಕೆ ಕಾರಣವಾಗುತ್ತದೆ.
ಅನೇಕ ಬಾರಿ ಮಹಿಳೆಯರು ಮನೆಯ ಸಮಸ್ಯೆಗಳಿಂದ ಒತ್ತಡಕ್ಕೊಳಗಾಗುತ್ತಾರೆ ಮತ್ತು ಅದರಿಂದ ಹೊರಬರಲು ಅವರು ಇತರರಿಂದ ಪ್ರೀತಿಯನ್ನು ಹುಡುಕಲು ಪ್ರಾರಂಭಿಸುತ್ತಾರೆ.
