newsics.com
ನ್ಯೂಸಿಕ್ಸ್.ಕಾಮ್
ಇಂದಿನ ನಮ್ಮ ಜೀವನ ಸಿಕ್ಕಾಪಟ್ಟೆ ಸ್ಪೀಡ್. ನಮಗಾರಿಗೂ ಸಮಯವೇ ಇಲ್ಲ. ಎಲ್ಲ ಕೆಲಸವೂ ಬೇಗ ಬೇಗ ಆಗಬೇಕು ಎನ್ನುವವರಿಗೆ ಈ ವಿಶಿಷ್ಟ ರುಚಿಯ ಕ್ವಿಕ್ ರೈಸ್ ಬಾತ್ ಇಷ್ಟವಾಗಬಹುದು. ಮಾಡುವುದೂ ಕಷ್ಟವಲ್ಲ. ತೀರಾ ಕಡಿಮೆ ಸಮಯದಲ್ಲಿ ಅತ್ಯಂತ ರುಚಿಕರವಾದ ರೈಸ್ ಬಾತ್ ಮಾಡುವ ವಿಧಾನ ಇಲ್ಲಿದೆ.
ಕುಕ್ಕರಿಗೆ ನಾಲ್ಕು ಟೇಬಲ್ ಸ್ಪೂನ್ ರಿಫೈನ್ಡ್ ಆಯಿಲ್ ಹಾಕಿಕೊಂಡು ಎಣ್ಣೆ ಬಿಸಿಯಾದ ನಂತರ 50 ಗ್ರಾಂ ಶೇಂಗಾ ಬೀಜ, ಸ್ವಲ್ಪ ಕರಿಬೇವು ಹಾಕಿಕೊಂಡು ಶೇಂಗಾ ಬೀಜ ಕೆಂಪಾಗುವವರೆಗೂ ಹುರಿಯಬೇಕು.
ಉದ್ದವಾಗಿ ಹೆಚ್ಚಿಟ್ಟುಕೊಂಡ ಎರಡು ಈರುಳ್ಳಿಯನ್ನು ಹಾಕಿಕೊಂಡು ಈರುಳ್ಳಿ ಕೆಂಪಾಗುವವರೆಗೆ ಹುರಿದುಕೊಳ್ಳಬೇಕು. ಸಣ್ಣದಾಗಿ ಹೆಚ್ಚಿಟ್ಟುಕೊಂಡ ಎರಡು ಟೊಮೇಟೊವನ್ನು ಹಾಕಿ ಎರಡು ನಿಮಿಷ ಹುರಿದುಕೊಂಡು ನಂತರ ಕಾಲು ಚಮಚ ಅರಿಶಿಣ ಪುಡಿ, 15 ಒಣ ದ್ರಾಕ್ಷಿ ಹಾಕಿಕೊಂಡು ಹುರಿದುಕೊಳ್ಳಬೇಕು.
ಎರಡು ಚಮಚ ಬೆಲ್ಲದ ಪುಡಿ, ಒಂದು ಚಮಚ ಸಾರಿನ ಪುಡಿ, ಒಂದು ಚಮಚ ಗರಂ ಮಸಾಲಾ ಪುಡಿ, ಚೆನ್ನಾಗಿ ತೊಳೆದು ಅರ್ಧ ಗಂಟೆ ನೆನೆಸಿಟ್ಟುಕೊಂಡ ಒಂದೂವರೆ ಲೋಟ ಅಕ್ಕಿಯನ್ನು ಹಾಕಿ ಎಲ್ಲವನ್ನೂ ಎರಡು ನಿಮಿಷ ಹುರಿದುಕೊಂಡು ಆಮೇಲೆ ನಾಲ್ಕು ನೋಟ ನೀರು, ಒಂದೂವರೆ ಚಮಚ ಕಲ್ಲುಪ್ಪನ್ನು ಹಾಕಿ ಕುದಿ ಬಂದ ನಂತರ ಕುಕ್ಕರ್ ಮುಚ್ಚಳ ಹಾಕಿ ಎರಡು ವಿಶಲ್ ಬರಿಸಿ ಉರಿಯನ್ನು ಆಫ್ ಮಾಡಬೇಕು.
ಈಗ ಸಿದ್ಧವಾದ ರೈಸ್ ಬಾತ್ಗೆ ಒಂದು ನಿಂಬೆಹಣ್ಣಿನ ರಸ ಮತ್ತು ಸ್ವಲ್ಪ ಕೊತ್ತಂಬರಿ ಸೊಪ್ಪನ್ನು ಹಾಕಿ ಮಿಶ್ರಣ ಮಾಡಿಕೊಂಡರೆ ಅತ್ಯಂತ ರುಚಿಕರವಾದ ರೈಸ್ ಬಾತ್ ಸವಿಯಲು ಸಿದ್ಧ.
