newsics.com
ತ್ರಿಶೂರ್(ಕೇರಳ): ತೆರಿಗೆ ವಂಚನೆ ಆರೋಪದಡಿ ನಡೆದ ಬೃಹತ್ ದಾಳಿಯಲ್ಲಿ ಲೆಕ್ಕವಿಲ್ಲದ 75 ಕೋಟಿ ರೂ. ಮೌಲ್ಯದ 104 ಕೆ.ಜಿ ಚಿನ್ನವನ್ನು ವಶಕ್ಕೆ ಪಡೆದಿದ್ದಾರೆ.
‘ಟೊರ್ರೆ ಡೆಲ್ ಓರೊ’ ಎಂಬ ಹೆಸರಿನಲ್ಲಿ ಈ ಕಾರ್ಯಾಚರಣೆ ನಡೆಸಲಾಗಿದ್ದು, ಇಷ್ಟು ಪ್ರಮಾಣದಲ್ಲಿ ಅಕ್ರಮ ಚಿನ್ನ ಸಿಕ್ಕಿದ್ದು ಇದೇ ಮೊದಲು. ಸಿಕ್ಕ ಬಂಗಾರದ ಒಟ್ಟು ಮೊತ್ತ 75 ಕೋಟಿ ರೂಪಾಯಿ ಎಂದು ಅಂದಾಜಿಸಲಾಗಿದೆ.
ಆಭರಣ ತಯಾರಕರು ಕಳೆದ ಆರು ತಿಂಗಳಿನಿಂದ ಜಿಎಸ್ಟಿ ವಂಚಿಸುತ್ತಿರುವ ಬಗ್ಗೆ ಆರೋಪಗಳು ಕೇಳಿಬಂದಿದ್ದವು. ಇದರ ವಿರುದ್ಧ ಕಾರ್ಯಾಚರಣೆ ನಡೆಸಲು ರಾಜ್ಯ ಜಿಎಸ್ಟಿ ಇಲಾಖೆಯ ಗುಪ್ತಚರ ವಿಭಾಗವು 700 ಅಧಿಕಾರಿಗಳ ತಂಡವನ್ನು ರಚಿಸಿತ್ತು. ಬುಧವಾರ ಸಂಜೆ (ಅ.23) ನಿಗದಿತ 78 ಸ್ಥಳಗಳ ಮೇಲೆ ದಾಳಿ ಮಾಡಿದೆ.
ಜಿಎಸ್ಟಿ ವಿಶೇಷ ಆಯುಕ್ತ ಎಸ್.ಅಬ್ರಹಾಂ ರೆನ್ ನೇತೃತ್ವದಲ್ಲಿ ವ್ಯಾಪಕ ದಾಳಿ ಮುಂದುವರಿದಿದೆ ಎಂದು ರಾಜ್ಯ ಜಿಎಸ್ಟಿ ಗುಪ್ತಚರ ಉಪ ಆಯುಕ್ತ ದಿನೇಶ್ ಕುಮಾರ್ ತಿಳಿಸಿದ್ದಾರೆ.
ತ್ರಿಶ್ಯೂರ್ ಜಿಲ್ಲೆಯಾದ್ಯಂತ ಇರುವ ಚಿನ್ನ ಉತ್ಪಾದನಾ ಘಟಕಗಳು ಮತ್ತು ಆಭರಣ ವ್ಯಾಪಾರಿಗಳ ಮನೆಗಳು ಸೇರಿದಂತೆ ಸುಮಾರು 78 ಸ್ಥಳಗಳ ಮೇಲೆ ದಾಳಿ ನಡೆಸಲಾಗಿದೆ. ದಾಳಿಯ ಎರಡನೇ ದಿನವಾದ ಗುರುವಾರವೂ ಪರಿಶೀಲನೆ ನಡೆಸಲಾಗಿದೆ.
ಅಧಿಕೃತ ಮೂಲಗಳ ಪ್ರಕಾರ, ಅಧಿಕಾರಿಗಳು ಜಪ್ತಿ ಮಾಡಿದ ಚಿನ್ನದ ಜೊತೆಗೆ ಬಿಲ್ಲಿಂಗ್ ಮತ್ತು ತೆರಿಗೆ ಪಾವತಿ ಪ್ರಕ್ರಿಯೆಯಲ್ಲೂ ದೊಡ್ಡ ಅಕ್ರಮ ನಡೆದಿರುವುದನ್ನು ಪತ್ತೆ ಮಾಡಲಾಗಿದೆ. ಇದಕ್ಕೂ ಮೊದಲು ಸಿಕ್ಕ ಮಾಹಿತಿಯಂತೆ ದಾಳಿಯಲ್ಲಿ 120 ಕೆ.ಜಿ.ಯಷ್ಟು ಚಿನ್ನ ವಶವಾಗಿದೆ ಎಂದು ಮೂಲಗಳು ತಿಳಿಸಿದ್ದವು.
ಅಕ್ರಮ ಚಿನ್ನ ವ್ಯವಹಾರದ ವಿರುದ್ಧ ದಾಳಿಗೆ ಜಿಎಸ್ಟಿ ಇಲಾಖೆ ತರಬೇತಿ ಕಾರ್ಯಕ್ರಮದ ನಾಟಕವಾಡಿದ್ದಾರೆ. ದಾಳಿ ನಡೆಯುವ ಬಗ್ಗೆ ಯಾವುದೇ ಸುಳಿವು ಸಿಗದಿರಲು ಅಧಿಕಾರಿಗಳು ಇರುವ ವಾಹನಗಳಿಗೆ ‘ಅಧ್ಯಯನ ಪ್ರವಾಸ’ ಎಂದು ಬರೆಯಲಾದ ಬ್ಯಾನರ್ಗಳನ್ನು ಅಳವಡಿಸಲಾಗಿತ್ತು.
