newsics.com
ಮುಂಬೈ: ಮಹಿಳೆಯರ ಜನನಾಂಗವನ್ನು(Vagina) ಬಿಗಿಗೊಳಿಸುತ್ತದೆ ಎಂದು ಹೇಳಿಕೊಳ್ಳುವ ಉತ್ಪನ್ನವೊಂದರ ಜಾಹೀರಾತಿನಲ್ಲಿ ಕಾಣಿಸಿಕೊಂಡ ಹಿಂದಿ ಕಿರುತೆರೆಯ ಜನಪ್ರಿಯ ನಟಿ ನಿಯಾ ಶರ್ಮಾ ಅವರ ವಿರುದ್ಧ ನೆಟ್ಟಿಗರು ಗರಂ ಆಗಿದ್ದಾರೆ.
ಜಾಹೀರಾತಿನಲ್ಲಿ ಕಾಣಿಸಿಕೊಂಡ ನಿಯಾ ಶರ್ಮಾ ಅವರಿಗೆ ಹಿಗ್ಗಾಮುಗ್ಗಾ ಝಾಡಿಸಿದ್ದಾರೆ. ತಮ್ಮ ಇನ್ಸ್ಟಾಗ್ರಾಮ್ ಪೇಜ್ನಲ್ಲಿ ನಿಯಾ ಶರ್ಮಾ ಈ ಉತ್ಪನ್ನವನ್ನು ಪರಿಚಯಿಸುವ ವಿಡಿಯೊ ಹಂಚಿಕೊಂಡಿದ್ದು, ಇದಕ್ಕೆ ನೆಟ್ಟಿಗರು ಕಿಡಿಕಾರಿದ್ದಾರೆ.
ತಪ್ಪು ಮತ್ತು ಹಾನಿಕಾರಕ ಮಾಹಿತಿ ಪ್ರಚಾರ ಮಾಡುತ್ತಿದ್ದಾರೆ ಎಂದು ನಟಿಯ ವಿರುದ್ಧ ಅನೇಕ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ವಿಡಿಯೊದಲ್ಲೇನಿದೆ?:
ನಿಯಾ ಶರ್ಮಾ ಜಾಹೀರಾತಿನ ವಿಡಿಯೊವನ್ನು ಇನ್ಸ್ಟಾಗ್ರಾಮ್ನಲ್ಲಿ ಹಂಚಿಕೊಂಡಿದ್ದಾರೆ, “ಕೆಲವೊಮ್ಮೆ ಪರಿಪೂರ್ಣ ಫಿಟ್ ಆಗಿರುವುದನ್ನು ಬಯಸುತ್ತೇವೆ. ಅದು ನಿಮ್ಮ ನೆಚ್ಚಿನ ಉಡುಗೆಯಾಗಿರಬಹುದು ಅಥವಾ ಅದಕ್ಕಿಂತ ಹೆಚ್ಚು ಆಪ್ತವಾದದ್ದಾಗಿರಬಹುದು. ಪರಿಪೂರ್ಣ ‘ಬಿಗಿ’ಯನ್ನು ಅನುಭವಿಸಿ” ಎಂದು ವಿಡಿಯೊದಲ್ಲಿ ಅವರು ಉತ್ಪನ್ನವನ್ನು ಪರಿಚಯಿಸಿದ್ದಾರೆ.
ವಿಡಿಯೊದ ಆರಂಭದಲ್ಲಿ ಅವರು ಉಡುಪು, ಬಾಟಲ್ ಕ್ಯಾಪ್ನಿಂದ ಹಿಡಿದು ಶೂ ಲೇಸ್ಗಳವರೆಗೆ ‘ಸಡಿಲ’ ವಸ್ತುಗಳೊಂದಿಗೆ ಹೆಣಗಾಡುತ್ತಿರುವುದನ್ನು ಕಾಣಬಹುದು. ಸ್ವಲ್ಪ ಹೊತ್ತಿನ ಬಳಿಕ ಅವರು ಸಂಪೂರ್ಣ ಫಿಟ್ ಆಗಿರುವ ಉಡುಪಿನಲ್ಲಿ ಕಾಣಿಸಿಕೊಳ್ಳುತ್ತಾರೆ. “ಅದನ್ನು ಸರಿಯಾಗಿ ಮಾಡಿ, ಅದನ್ನು ಬಿಗಿಯಾಗಿರಿಸಿಕೊಳ್ಳಿ” ಎಂದು ಹೇಳುತ್ತಾರೆ.
ಈ ವಿಡಿಯೊ ಬಗ್ಗೆ ಅನೇಕರು ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ಇದನ್ನು ಅಸಹ್ಯಕರ ಮತ್ತು ತಪ್ಪಾದ ಮಾಹಿತಿ ಎಂದು ಕರೆದಿದ್ದಾರೆ. “ನಿಯಾ ಶರ್ಮಾ ಅವರ ಮಹಿಳೆಯರ ಜನನಾಂಗವನ್ನು ಬಿಗಿಗೊಳಿಸುವ ಉತ್ಪನ್ನಗಳ ಪ್ರಚಾರವು ಗಂಭೀರ ಪ್ರಶ್ನೆಯನ್ನು ಹುಟ್ಟು ಹಾಕುತ್ತದೆ. ಸಾರ್ವಜನಿಕ ವ್ಯಕ್ತಿಯಾಗಿ ಅವರಿಗೆ ಅನೇಕ ಜವಾಬ್ದಾರಿಗಳಿವೆ. ಇಂತಹ ಉತ್ಪನ್ನಗಳನ್ನು ಅನುಮೋದಿಸುವ ಮೂಲಕ ಅವರು ಸಾರ್ವಜನಿಕರ ದಾರಿ ತಪ್ಪಿಸುತ್ತಿದ್ದಾರೆ ಎಂದು ಹಲವರು ಟೀಕಿಸಿದ್ದಾರೆ.
ದಯವಿಟ್ಟು ಈ ಉತ್ಪನ್ನಗಳ ಪ್ರಚಾರ ಮಾಡುವುದನ್ನು ನಿಲ್ಲಿಸಿ. ವೈದ್ಯರ ಪ್ರಕಾರ ಮಾತ್ರೆಗಳಿಂದ ಸ್ತ್ರೀ ಜನನಾಂಗವನ್ನು ಬಿಗಿಯಾಗಿಸಲು ಸಾಧ್ಯವಿಲ್ಲ ಎಂದು ಒಬ್ಬರು ಬರೆದುಕೊಂಡಿದ್ದಾರೆ.
ನಟಿಯಾಗಿ ಅವರು ಹೊಂದಿರುವ ಜವಾಬ್ದಾರಿಯನ್ನು ಕೆಲ ನೆಟ್ಟಿಗರು ನೆನಪಿಸಿದ್ದಾರೆ. ನಾನು ನಿಮ್ಮ ಅಭಿಮಾನಿಯಾಗಿದ್ದೆ. ಆದರೆ ನೀವು ಈ ರೀತಿಯ ಉತ್ಪನ್ನಗಳನ್ನು ಪ್ರಚಾರ ಮಾಡುತ್ತೀರಾ ಎನ್ನುವುದು ತಿಳಿದಿರಲಿಲ್ಲ. ಸಾಮಾನ್ಯ ಹುಡುಗಿಯನ್ನು ದುರ್ಬಲ ಸಂದೇಶಗಳಿಂದ ಅವಮಾನಿಸುತ್ತಿದ್ದೀರಿ ಎಂದು ಅಭಿಮಾನಿಯೊಬ್ಬರು ಹೇಳಿದ್ದಾರೆ.
ನಿಯಾ ಶರ್ಮಾ ಜಾಹೀರಾತಿನ ಈ ವಿಡಿಯೊ ಇಂಟರ್ನೆಟ್ನಲ್ಲಿ ಭಾರೀ ಸದ್ದು ಮಾಡುತ್ತಿದೆ. ಈ ಮೂಲಕ ನಿಯಾ ಶರ್ಮಾ ಅಭಿಮಾನಿಗಳ ಕೆಂಗಣ್ಣಿಗೆ ಗುರಿಯಾಗಿದ್ದಾರೆ.
