newsics.com
ವಾಷಿಂಗ್ಟನ್: ಅಮೆರಿಕದಲ್ಲಿ ಮೊಟ್ಟೆ ಬೆಲೆ ಸಖತ್ ದುಬಾರಿಯಾಗಿದೆ. ಒಂದು ಕಾರ್ಟನ್ ಬೆಲೆ ಸರಾಸರಿಯಾಗಿ ಐದು ಡಾಲರ್ ಇದೆ. ಕೆಲ ನಗರಗಳಲ್ಲಿ ಡಜನ್ ಮೊಟ್ಟೆಗೆ 10 ಡಾಲರ್ ಕೂಡ ಬೆಲೆ ಏರಿದೆ. ಅಂದರೆ, ಒಂದು ಮೊಟ್ಟೆಗೆ ಹತ್ತಿರಹತ್ತಿರ 80 ರುಪಾಯಿ ಆಗಿದೆ. ಇಷ್ಟು ದುಬಾರಿ ಬೆಲೆ ತೆತ್ತು ಮೊಟ್ಟೆ ಖರೀದಿಸುವ ಬದಲು ಕೋಳಿಗಳನ್ನೇ ಅಮೆರಿಕನ್ನರು ಬಾಡಿಗೆಗೆ ಪಡೆಯುತ್ತಿದ್ದಾರೆ.
ಮೊಟ್ಟೆಕೋಳಿಗಳನ್ನು ಬಾಡಿಗೆಗೆ ಕೊಡುವ ಕಂಪನಿಗಳು ಅಮೆರಿಕದಾದ್ಯಂತ ಇವೆ. ಈ ಕೋಳಿಗಳನ್ನು ಖರೀದಿಸುವ ಬದಲು ಕೆಲ ತಿಂಗಳ ಕಾಲ ಸಾಕುವ ಟ್ರೆಂಡ್ ಅಲ್ಲಿ ಶುರುವಾಗಿದೆ.
ಅಮೆರಿಕದ ಸರಾಸರಿ ಕುಟುಂಬದ ಸರಾಸರಿ ಮಾಸಿಕ ಆಹಾರ ವೆಚ್ಚದಲ್ಲಿ ಮೊಟ್ಟೆ ಬೆಲೆಯೇ ಮುಕ್ಕಾಲು ಭಾಗ ಆಗುತ್ತಿದೆಯಂತೆ. ಹೀಗಾಗಿ, ಮೊಟ್ಟೆ ಖರೀದಿಸುವ ಬದಲು ಮೊಟ್ಟೆ ಕೋಳಿಗಳನ್ನೇ ಅಮೆರಿಕನ್ನರು ಸಾಕುತ್ತಿದ್ಧಾರೆ. ಒಂದು ಆರೋಗ್ಯಯುತ ಕೋಳಿ ಒಂದು ವಾರದಲ್ಲಿ ಐದು ಮೊಟ್ಟೆಗಳನ್ನು ಇಡುತ್ತದೆ. ಕೋಳಿಗೆ ಬಾಡಿಗೆ ಹಾಗು ಫೀಡ್ಗೆ ಒಂದಷ್ಟು ಹಣ ವೆಚ್ಚವಾದರೂ ಮೊಟ್ಟೆಯ ಮಾರುಕಟ್ಟೆ ಬೆಲೆಗಿಂತ ವೆಚ್ಚ ಬಹಳ ಕಡಿಮೆ ಆಗುತ್ತದೆ. ಹೀಗಾಗಿ, ಕೋಳಿ ಸಾಕುವ ಟ್ರೆಂಡ್ ಶುರುವಾಗಿದೆ.
ಅಮೆರಿದಕಲ್ಲಿ ಕಳೆದ ಎರಡು ಮೂರು ವರ್ಷಗಳಿಂದ ಹಕ್ಕಿ ಜ್ವರ ಬಾಧೆ ಇದೆ. 2022ರಿಂದ ಈಚೆ 16.3 ಕೋಟಿ ಕೋಳಿ, ಟರ್ಕಿ ಕೋಳಿ ಮತ್ತಿತರ ಹಕ್ಕಿಗಳನ್ನು ಸಾಯಿಸಲಾಗಿದೆ ಅಥವಾ ಅವು ರೋಗಕ್ಕೆ ಬಲಿಯಾಗಿವೆ ಎಂದು ಹೇಳಲಾಗುತ್ತಿದೆ.
ಜನವರಿ ಒಂದೇ ತಿಂಗಳಲ್ಲಿ ಅಮೆರಿಕಾದ್ಯಂತ ಹತ್ತಿರಹತ್ತಿರ ಎರಡು ಕೋಟಿಯಷ್ಟು ಮೊಟ್ಟೆ ಕೋಳಿಗಳನ್ನು ಸಾಯಿಸಲಾಗಿದೆ. ಒಂದು ಕೋಳಿ ಫಾರ್ಮ್ನಲ್ಲಿ ಒಂದು ಕೋಳಿಗೆ ಹಕ್ಕಿ ಜ್ವರ ವೈರಸ್ (ಎವಿಯನ್ ಇನ್ಫ್ಲುಯೆನ್ಜಾ) ಬಂತೆಂದರೆ ಆ ಫಾರ್ಮ್ನಲ್ಲಿರುವ ಎಲ್ಲಾ ಹಕ್ಕಿಗಳನ್ನು ಸಾಯಿಸುವುದು ಅನಿವಾರ್ಯ. ಡಿಸೆಂಬರ್ನಲ್ಲಿ ಐಯೋವಾದ ಒಂದು ಫಾರ್ಮ್ನಲ್ಲಿ 42 ಲಕ್ಷ ಮೊಟ್ಟೆಕೋಳಿಗಳನ್ನು ಕೊಲ್ಲಲಾಗಿತ್ತು. ಅಮೆರಿಕದ ಆಹಾರಕ್ರಮದಲ್ಲಿ ಮೊಟ್ಟೆಗೆ ಪ್ರಮುಖ ಸ್ಥಾನ ಇದೆ. ಹಾಗೆಯೇ ಅಲ್ಲಿ ಪ್ರತಿಯೊಂದು ಮನೆಯಲ್ಲೂ ಕೋಳಿ ಸಾಕುವ ಸಂಪ್ರದಾಯ ಇದೆ.
ಅಮೆರಿಕದಲ್ಲಿ 34 ಕೋಟಿ ಜನಸಂಖ್ಯೆ ಇದೆ. ಐದು ವರ್ಷದ ಹಿಂದೆ 50 ಕೋಟಿಗೂ ಹೆಚ್ಚು ಕೋಳಿಗಳಿದ್ದುವು. ಈಗ 30 ಕೋಟಿ ಕೋಳಿಗಳಿವೆ ಎಂದು ಅಂಕಿ ಅಂಶವೊಂದು ಹೇಳುತ್ತಿದೆ.
