ವಿಯೆಟ್ನಾಂ ಪ್ರವಾಸಕ್ಕೆ ತೆರಳಿದ್ದ ಬೆಂಗಳೂರು ಮೂಲದ ದಂಪತಿ ಹನ್ನಾ ಸೂಸನ್ ಮತ್ತು ಅಥುಲ್ ತೇಜ್ ಹಂಚಿಕೊಂಡ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದೆ. ಹಾ ಲಾಂಗ್ ಬೇ ಮತ್ತು ನಿನ್ ಬಿನ್ ಪ್ರದೇಶಗಳ ಕ್ರೂಸ್ ಪ್ರವಾಸದ ವೇಳೆ ಭಾರತೀಯ ಪ್ರವಾಸಿಗರನ್ನು ಪ್ರತ್ಯೇಕವಾಗಿ ಕೂರಿಸಿ, ಸುರಕ್ಷತಾ ಸೂಚನೆಗಳ ಬದಲು ‘ನಡವಳಿಕೆ ಪಾಠ’ ಹೇಳಿದ್ದ ಅನುಭವವನ್ನು ಅವರು ಹಂಚಿಕೊಂಡಿದ್ದಾರೆ.
ಕ್ರೂಸ್ಗೆ ಏರಿದ ಬಳಿಕ ಭಾರತೀಯರ ಗುಂಪಿಗೆ ಸಿಬ್ಬಂದಿ ಮೂಲಭೂತ ಶಿಷ್ಟಾಚಾರಗಳ ಬಗ್ಗೆ ವಿಶೇಷ ಸೂಚನೆಗಳನ್ನು ನೀಡಿದ್ದರು. ಬಫೇನಲ್ಲಿ ಆಹಾರ ತೆಗೆದುಕೊಳ್ಳುವ ವಿಧಾನ, ಕೈಯಿಂದ ಆಹಾರ ಮುಟ್ಟಬಾರದು, ಟಾಂಗ್ಗಳನ್ನು ಹೇಗೆ ಬಳಸಬೇಕು ಎಂಬ ವಿವರಗಳನ್ನು ತಿಳಿಸಲಾಗಿತ್ತು.
ಆರಂಭದಲ್ಲಿ ಇದನ್ನು ಭಾರತೀಯರ ವಿರುದ್ಧದ ತಾರತಮ್ಯ ಅಥವಾ ವರ್ಣಭೇದ ಎಂದು ದಂಪತಿ ಭಾವಿಸಿದ್ದರು. ಆದರೆ ಕೆಲವೇ ನಿಮಿಷಗಳಲ್ಲಿ ಅವರ ಅಭಿಪ್ರಾಯ ಬದಲಾಗಿದೆ.
ಬಫೇ ಆರಂಭವಾದ ಕೆಲವೇ ಹೊತ್ತಿನಲ್ಲಿ ಭಾರತೀಯ ಪ್ರವಾಸಿಗರೊಬ್ಬರು ಆಹಾರ ನೀಡಲು ಸ್ವಲ್ಪ ತಡವಾಗಿದ್ದಕ್ಕೆ ಸಿಬ್ಬಂದಿಯ ಮೇಲೆ ಜೋರಾಗಿ ಕೂಗಾಡಲು ಆರಂಭಿಸಿದ್ದಾರಂತೆ. ಕ್ರೂಸ್ನಲ್ಲಿ ಅಡುಗೆಮನೆಯಿಂದ ಆಹಾರ ತರಲು ಸಮಯ ಬೇಕಾಗುತ್ತದೆ ಎಂದು ಸಿಬ್ಬಂದಿ ವಿವರಿಸಿದರೂ ಅವರು ಕೋಪಗೊಂಡು ಗದ್ದಲ ಮಾಡಿದ್ದನ್ನು ಕಂಡು ದಂಪತಿಗೆ ಮೊದಲೇ ನೀಡಿದ್ದ ಸೂಚನೆಗಳ ಅರ್ಥ ಗೊತ್ತಾಗಿದೆ.
“ಆ ಕ್ಷಣದಲ್ಲಿ ಯಾಕೆ ಭಾರತೀಯರಿಗೆ ಮಾತ್ರ ಆ ಪಾಠ ಹೇಳಲಾಗಿತ್ತು ಎಂಬುದು ಅರ್ಥವಾಯಿತು. ಕೆಳ ಮಹಡಿಯಲ್ಲಿ ಇದ್ದ ಇತರ ದೇಶಗಳ ಪ್ರವಾಸಿಗರು ದೃಶ್ಯಾವಳಿಗಳನ್ನು ಆನಂದಿಸುತ್ತಿದ್ದರೆ, ನಾವು ಮಾತ್ರ ಒಳಗೆ ಕುಳಿತು ಶಿಷ್ಟಾಚಾರ ತರಗತಿ ಕೇಳುತ್ತಿದ್ದೆವು” ಎಂದು ದಂಪತಿ ಹೇಳಿದ್ದಾರೆ.
ತಮ್ಮ ವಿಡಿಯೋ ಅಂತ್ಯದಲ್ಲಿ ಅವರು ಭಾರತೀಯ ಪ್ರವಾಸಿಗರಿಗೆ ಮನವಿ ಮಾಡಿದ್ದು, “ವಿದೇಶ ಪ್ರವಾಸದ ವೇಳೆ ಗೌರವದಿಂದ ವರ್ತಿಸಿ. ನಿಮ್ಮ ನಡೆ-ನುಡಿ ನಿಮ್ಮ ದೇಶದ ಪ್ರತಿನಿಧಿತ್ವ ಮಾಡುತ್ತದೆ ಎಂಬುದನ್ನು ಮರೆಯಬೇಡಿ” ಎಂದು ಕರೆ ನೀಡಿದ್ದಾರೆ.
