newsics.com/ನ್ಯೂಸಿಕ್ಸ್
ಕೇಂದ್ರ ಸರ್ಕಾರ ಮತ್ತೆ ಆಭರಣ ಪ್ರಿಯರಿಗೆ ಬಿಗ್ ಶಾಕ್ ಕೊಟ್ಟಿದೆ. ಮತ್ತೊಮ್ಮೆ ಚಿನ್ನ ಮತ್ತು ಬೆಳ್ಳಿಯ ಮೂಲ ಆಮದು ಬೆಲೆಗಳನ್ನು ಹೆಚ್ಚಿಸಿದೆ. ಈಗಾಗಲೇ ಚಿನ್ನ ಬೆಳ್ಳಿ ಬೆಲೆ ಕಂಡು ಜನರು ಆಘಾತಕ್ಕೊಳಗಾಗಿದ್ದಾರೆ, ಆದರೂ ಮತ್ತೆ ಕೇಂದ್ರ ಸರ್ಕಾರ ಚಿನ್ನ ಮತ್ತು ಬೆಳ್ಳಿ ಮೇಲಿನ ಆಮದು ಸುಂಕ ಹೆಚ್ಚಳ ಮಾಡಿದೆ. ಇದು ಎರಡು ತಿಂಗಳಲ್ಲಿ ಎರಡನೇ ಬಾರಿಗೆ ಏರಿಕೆಯಾಗಿದೆ.
ಹೌದು, ಸರ್ಕಾರ ಮತ್ತೆ ಆಮದು ಸುಂಕ ಹೆಚ್ಚಿಸಿರುವುದು ಚಿನ್ನ-ಬೆಳ್ಳಿ ಮಾರುಕಟ್ಟೆಯಲ್ಲಿ ಮತ್ತೆ ಚರ್ಚೆಗೆ ಕಾರಣವಾಗಿದೆ. ಕೇಂದ್ರ ಪರೋಕ್ಷ ತೆರಿಗೆಗಳು ಮತ್ತು ಕಸ್ಟಮ್ಸ್ ಮಂಡಳಿ (CBIC) ಸೋಮವಾರ ಹೊರಡಿಸಿದ ಅಧಿಸೂಚನೆಯ ಪ್ರಕಾರ, ಚಿನ್ನದ ಮೂಲ ಆಮದು ಬೆಲೆ 10 ಗ್ರಾಂಗೆ $5 ರಷ್ಟು ಹೆಚ್ಚಾಗಿದೆ. ಇದರಿಂದ ಚಿನ್ನದ ಹೊಸ ಮೂಲ ಆಮದು ಬೆಲೆ 10 ಗ್ರಾಂಗೆ $1,348 ಆಗಿದೆ. ಅದೇ ರೀತಿ, ಬೆಳ್ಳಿಯ ಮೂಲ ಆಮದು ಬೆಲೆಯನ್ನು ಪ್ರತಿ ಕಿಲೋಗ್ರಾಂಗೆ $83 ಹೆಚ್ಚಿಸಲಾಗಿದ್ದು, ಈಗ ಅದು ಪ್ರತಿ ಕಿಲೋಗ್ರಾಂಗೆ $2,175 ಆಗಿದೆ.
ಕೇವಲ 3 ದಿನಗಳ ಹಿಂದೆ ಮಾತ್ರ ಸರ್ಕಾರ ಚಿನ್ನದ ಮೂಲ ಆಮದು ಬೆಲೆಯನ್ನು $80 ಮತ್ತು ಬೆಳ್ಳಿಯ ಬೆಲೆಯನ್ನು $276 ರಷ್ಟು ಕಡಿಮೆ ಮಾಡಿತ್ತು. ಬೆಲೆ ಕಡಿಮೆ ಮಾಡಿದ ತಕ್ಷಣವೇ ಮತ್ತೆ ಹೆಚ್ಚಿಸಿರುವುದು ಜನರಲ್ಲಿ ಕುತೂಹಲ ಮೂಡಿಸಿದೆ. ಆದರೆ ಸರ್ಕಾರದ ಮಾತಿನ ಪ್ರಕಾರ, ಭಾರತದ ವಿದೇಶಿ ವಿನಿಮಯ ಮೀಸಲುಗಳ ಮೇಲೆ ಹೆಚ್ಚುತ್ತಿರುವ ಒತ್ತಡವನ್ನು ಕಡಿಮೆ ಮಾಡಲು ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ.
ಚಿನ್ನ ಮತ್ತು ಬೆಳ್ಳಿ ಆಮದು ಹೆಚ್ಚು ಆಗುವುದರಿಂದ ಡಾಲರ್ ಬೇಡಿಕೆ ಹೆಚ್ಚಾಗಿ, ವಿದೇಶಿ ವಿನಿಮಯ ಮೀಸಲುಗಳ ಮೇಲೆ ಒತ್ತಡ ಹೆಚ್ಚುತ್ತದೆ. ಅದನ್ನು ನಿಯಂತ್ರಿಸಲು ಆಮದು ಬೆಲೆ ಮತ್ತು ಸುಂಕಗಳನ್ನು ಬದಲಾಯಿಸುವ ಮೂಲಕ ಸರ್ಕಾರ ಪರಿಸ್ಥಿತಿಯನ್ನು ಸಮತೋಲನಗೊಳಿಸಲು ಪ್ರಯತ್ನಿಸುತ್ತಿದೆ.
ಕಳೆದ 2 ತಿಂಗಳಲ್ಲಿ ಇದು ಎರಡನೇ ಬಾರಿ ಸರ್ಕಾರ ಚಿನ್ನದ ಮೇಲಿನ ಆಮದು ನಿಯಮಗಳನ್ನು ಕಠಿಣಗೊಳಿಸಿರುವುದು. ಕಳೆದ ತಿಂಗಳು ಚಿನ್ನ ಮತ್ತು ಬೆಳ್ಳಿಯ ಮೇಲಿನ ಆಮದು ಸುಂಕವನ್ನು 15% ಕ್ಕೆ ಏರಿಸಲಾಯಿತು. ಸುಂಕ ಹೆಚ್ಚಾದರೆ ಚಿನ್ನ-ಬೆಳ್ಳಿ ಆಮದು ದುಬಾರಿ ಆಗುತ್ತದೆ, ಇದರ ಪರಿಣಾಮವಾಗಿ ಅನಾವಶ್ಯಕ ಅಥವಾ ಅತಿಯಾದ ಆಮದು ಕಡಿಮೆಯಾಗಬಹುದು. ಇದು ದೇಶದ ವಿದೇಶಿ ವಿನಿಮಯ ಸಂಗ್ರಹವನ್ನು ಕಾಪಾಡುವಲ್ಲಿ ಸಹಾಯ ಮಾಡಬಹುದು ಎಂದು ಸರ್ಕಾರ ಭಾವಿಸಿದೆ.
ಬೆಳ್ಳಿಯ ವಿಷಯದಲ್ಲಿ ಸರ್ಕಾರ ಇನ್ನೂ ಕಠಿಣ ಕ್ರಮಗಳನ್ನು ಕೈಗೊಂಡಿದೆ. ಇತ್ತೀಚೆಗೆ ಬೆಳ್ಳಿ ಆಮದುಗಳ ಮೇಲಿನ ನಿಯಮಗಳನ್ನು ಬಿಗಿಗೊಳಿಸಿ, ವ್ಯಾಪಾರಿಗಳು ಬೆಳ್ಳಿಯನ್ನು ಆಮದು ಮಾಡಲು ಮೊದಲು ಸರ್ಕಾರಿ ಪರವಾನಗಿ ಪಡೆಯುವುದು ಕಡ್ಡಾಯಗೊಳಿಸಲಾಗಿದೆ. ವಿದೇಶಿ ವ್ಯಾಪಾರ ನಿರ್ದೇಶನಾಲಯ (DGFT) ಬೆಳ್ಳಿ ಬಾರ್ಗಳ ಆಮದನ್ನು ‘ಉಚಿತ’ ವರ್ಗದಿಂದ ತೆಗೆದು ‘ನಿರ್ಬಂಧಿತ’ ವರ್ಗಕ್ಕೆ ಸೇರಿಸುವ ಅಧಿಸೂಚನೆ ಹೊರಡಿಸಿದೆ. ಇದರಿಂದ ಈಗ ಯಾರೇ ಆಗಲಿ ಸ್ವತಂತ್ರವಾಗಿ ಬೆಳ್ಳಿಯನ್ನು ಆಮದು ಮಾಡಲು ಸಾಧ್ಯವಿಲ್ಲ, ಸರ್ಕಾರದ ಅನುಮತಿ ಬೇಕಾಗುತ್ತದೆ. ಈ ನಿಯಮ ತಕ್ಷಣದಿಂದಲೇ ಜಾರಿಯಲ್ಲಿದೆ.
ಈ ತಿಂಗಳ ಆರಂಭದಲ್ಲೇ ಸರ್ಕಾರ ಇನ್ನೂ ಸ್ಪಷ್ಟವಾಗಿ ನಿಯಮ ಬದಲಾವಣೆ ಮಾಡಿ, DGFT ಯಿಂದ ಪೂರ್ವಾನುಮತಿ ಪಡೆದ ನಂತರವೇ ಬೆಳ್ಳಿ ಆಮದು ಮಾಡಿಕೊಳ್ಳಬಹುದು ಎಂದು ತಿಳಿಸಿದೆ. ಬ್ಯಾಂಕುಗಳ ಮೂಲಕ ಆಗಲಿ, ಅಥವಾ ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಸೂಚಿಸಿರುವ ಇತರ ಏಜೆನ್ಸಿಗಳ ಮೂಲಕ ಆಗಲಿ, ಎಲ್ಲರಿಗೂ ಇದೇ ನಿಯಮ ಅನ್ವಯಿಸುತ್ತದೆ. ಅಂದರೆ, ಬ್ಯಾಂಕುಗಳು ಅಥವಾ ಮಾನ್ಯತೆ ಪಡೆದ ಸಂಸ್ಥೆಗಳು ಬೆಳ್ಳಿ ಆಮದು ಮಾಡಿದರೂ, ಮೊದಲು DGFT ಅನುಮತಿ ಕಡ್ಡಾಯ.
ಈ ಎಲ್ಲಾ ಕ್ರಮಗಳ ಮುಖ್ಯ ಉದ್ದೇಶ ಚಿನ್ನ ಮತ್ತು ಬೆಳ್ಳಿ ಆಮದುಗಳನ್ನು ನಿಯಂತ್ರಣದಲ್ಲಿಡುವುದು, ವಿದೇಶಿ ವಿನಿಮಯ ಸಂಗ್ರಹವನ್ನು ಕಾಪಾಡುವುದು ಮತ್ತು ಅತಿಯಾದ ಆಮದುಗಳಿಂದ ದೇಶದ ಆರ್ಥಿಕ ಸ್ಥಿತಿಗೆ ಬರುವ ಒತ್ತಡವನ್ನು ಕಡಿಮೆ ಮಾಡುವುದು. ಆದರೆ, ಚಿನ್ನ-ಬೆಳ್ಳಿ ಖರೀದಿಸುವ ಸಾಮಾನ್ಯ ಗ್ರಾಹಕರಿಗೆ ದರ ಹೆಚ್ಚಳದ ಹೊರೆ ಬರುವ ಸಾಧ್ಯತೆ ಇದೆ. ಮದುವೆಗಳು, ಹಬ್ಬ-ಹರಿದಿನಗಳಲ್ಲಿ ಚಿನ್ನ-ಬೆಳ್ಳಿ ಖರೀದಿಸುವ ಪರಂಪರೆಯಿರುವ ಭಾರತದಲ್ಲಿ ಇಂತಹ ನೀತಿಗಳು ಮಾರುಕಟ್ಟೆ ಮೇಲೆ ನೇರ ಪರಿಣಾಮ ಬೀರುವ ಸಾಧ್ಯತೆ ಇದೆ. ಆದರೆ ಸರ್ಕಾರದ ದೃಷ್ಟಿಯಲ್ಲಿ, ದೇಶದ ಆರ್ಥಿಕ ಸುರಕ್ಷತೆ ಮತ್ತು ವಿದೇಶಿ ವಿನಿಮಯ ಸಮತೋಲನ ಈಗ ಹೆಚ್ಚು ಮುಖ್ಯವಾಗಿದೆ.
