newsics.com/ನ್ಯೂಸಿಕ್ಸ್
ಸ್ವಪ್ನ ಶಾಸ್ತ್ರದ ಪ್ರಕಾರ ನಾವು ಕಾಣುವ ಪ್ರತಿಯೊಂದು ಕನಸಿಗೂ ನಮ್ಮ ಭವಿಷ್ಯದ ಆಗುಹೋಗುಗಳೊಂದಿಗೆ ನೇರವಾದ ಸಂಬಂಧವಿರುತ್ತದೆ.
ಹಲವು ಬಾರಿ ನಮ್ಮ ಕನಸಿನಲ್ಲಿ ಜಿರಳೆ ಕೂಡ ಕಾಣಿಸಿಕೊಳ್ಳುತ್ತದೆ. ಇದು ನೋಡಲು ಸಾಮಾನ್ಯ ಕೀಟವೆನಿಸಿದರೂ, ಸ್ವಪ್ನ ಶಾಸ್ತ್ರದ ಪ್ರಕಾರ ಇದು ಭವಿಷ್ಯದ ಹಲವು ಪ್ರಮುಖ ಬೆಳವಣಿಗೆಗಳ ಹಾಗೂ ಎಚ್ಚರಿಕೆಯ ಸಂಕೇತವಾಗಿದೆ. ಜ್ಯೋತಿಷ್ಯ ಶಾಸ್ತ್ರದ ಪ್ರಕಾರ ಜಿರಳೆಗಳು ರಾಹು ಗ್ರಹದ ನಕಾರಾತ್ಮಕ ಪ್ರಭಾವ ಹಾಗೂ ಮನೆಯ ವಾಸ್ತು ದೋಷವನ್ನು ಕೂಡ ಪ್ರತಿನಿಧಿಸುತ್ತವೆ.
ಆರ್ಥಿಕ ನಷ್ಟದ ಮುನ್ಸೂಚನೆ
ಕನಸಿನಲ್ಲಿ ಜಿರಳೆ ಪದೇ ಪದೇ ಕಾಣಿಸಿಕೊಂಡರೆ ಅದನ್ನು ಅಶುಭವೆಂದು ಪರಿಗಣಿಸಲಾಗುತ್ತದೆ. ಇದು ಮುಂಬರುವ ದಿನಗಳಲ್ಲಿ ಎದುರಾಗಬಹುದಾದ ಆರ್ಥಿಕ ಮುಗ್ಗಟ್ಟು, ಸಾಲದ ಬಾಧೆ ಅಥವಾ ಅನಗತ್ಯ ಖರ್ಚುಗಳ ಮುನ್ಸೂಚನೆಯಾಗಿದೆ. ನಿಮ್ಮ ವ್ಯಾಪಾರ ಅಥವಾ ವ್ಯವಹಾರದಲ್ಲಿ ಯಾವುದೇ ಹೊಸ ಹೂಡಿಕೆ ಮಾಡುವಾಗ ಅಥವಾ ಯಾರಿಗಾದರೂ ಹಣ ನೀಡುವಾಗ ಅತ್ಯಂತ ಎಚ್ಚರಿಕೆಯಿಂದ ಹೆಜ್ಜೆ ಇಡುವುದು ಒಳಿತು.
ಆರೋಗ್ಯದ ಬಗ್ಗೆ ಇರಲಿ ಎಚ್ಚರ
ನಿಮ್ಮ ಮೇಲೆ ಜಿರಳೆ ಹರಿದಾಡುತ್ತಿರುವಂತೆ ಅಥವಾ ಮೈಮೇಲೆ ಬಿದ್ದಂತೆ ಕನಸು ಬಿದ್ದರೆ, ಅದು ನಿಮ್ಮ ಅಥವಾ ನಿಮ್ಮ ಕುಟುಂಬದ ಹತ್ತಿರದ ಸದಸ್ಯರ ಆರೋಗ್ಯದಲ್ಲಿ ಏರುಪೇರಾಗುವ ಸ್ಪಷ್ಟ ಸಂಕೇತವಾಗಿದೆ. ಯಾವುದೇ ಸಣ್ಣಪುಟ್ಟ ಕಾಯಿಲೆಗಳಿದ್ದರೂ ನಿರ್ಲಕ್ಷ್ಯ ಮಾಡದೆ ತಕ್ಷಣವೇ ವೈದ್ಯರನ್ನು ಸಂಪರ್ಕಿಸಿ, ಆರೋಗ್ಯದ ಕಡೆ ಹೆಚ್ಚಿನ ಗಮನ ಹರಿಸುವುದು ಅತ್ಯಗತ್ಯ.
ಗುಪ್ತ ಶತ್ರುಗಳ ಕಾಟ
ಅನೇಕ ಜಿರಳೆಗಳು ಒಟ್ಟಾಗಿರುವಂತೆ, ಅಥವಾ ಮನೆಯಲ್ಲಿ ಜಿರಳೆಗಳು ತುಂಬಿರುವಂತೆ ಕನಸು ಕಂಡರೆ, ನಿಮ್ಮ ಸುತ್ತಮುತ್ತಲಿನ ವಾತಾವರಣದಲ್ಲಿ ನಕಾರಾತ್ಮಕ ಶಕ್ತಿ ಹೆಚ್ಚಾಗಿದೆ ಎಂದರ್ಥ. ನಿಮ್ಮ ಏಳಿಗೆಯನ್ನು ಸಹಿಸದ ಕೆಲವು ಗುಪ್ತ ಶತ್ರುಗಳು ಅಥವಾ ನಿಮ್ಮ ಜೊತೆಯಲ್ಲೇ ಇರುವ ನಕಲಿ ಸ್ನೇಹಿತರು ನಿಮಗೆ ತೊಂದರೆ ನೀಡಲು ಸಂಚು ರೂಪಿಸುತ್ತಿರುವ ಸಾಧ್ಯತೆ ಇರುತ್ತದೆ ಎಂದು ಸುವರ್ಣನ್ಯೂಸ್ ಕನ್ನಡ ವರದಿ ಮಾಡಿದೆ. ಹೀಗಾಗಿ, ನಿಮ್ಮ ವೈಯಕ್ತಿಕ ವಿಚಾರಗಳನ್ನು ಯಾರೊಂದಿಗೂ ಹಂಚಿಕೊಳ್ಳಬಾರದು.
ಜಿರಳೆ ಕೊಂದರೆ ಶುಭ ಫಲ
ಕನಸಿನಲ್ಲಿ ಬರುವ ಎಲ್ಲಾ ಜಿರಳೆ ದೃಶ್ಯಗಳು ಅಶುಭವಲ್ಲ. ಒಂದು ವೇಳೆ ಕನಸಿನಲ್ಲಿ ನೀವು ಜಿರಳೆಯನ್ನು ಕೊಲ್ಲುತ್ತಿರುವಂತೆ ಅಥವಾ ಅದನ್ನು ಮನೆಯಿಂದ ಗುಡಿಸಿ ಹೊರಹಾಕುತ್ತಿರುವಂತೆ ಕಂಡರೆ, ಅದು ಅತ್ಯಂತ ಶುಭ ಸಂಕೇತ. ಇದರರ್ಥ ನೀವು ಶೀಘ್ರದಲ್ಲೇ ನಿಮ್ಮೆಲ್ಲಾ ಅಡೆತಡೆಗಳನ್ನು ನಿವಾರಿಸಿ, ಶತ್ರುಗಳ ಮೇಲೆ ಜಯ ಸಾಧಿಸಲಿದ್ದೀರಿ. ಬಹುಕಾಲದಿಂದ ಕಾಡುತ್ತಿದ್ದ ಮಾನಸಿಕ ಹಾಗೂ ಆರ್ಥಿಕ ಸಮಸ್ಯೆಗಳಿಗೆ ಶೀಘ್ರವೇ ಮುಕ್ತಿ ಸಿಗಲಿದೆ ಎಂಬ ಸಕಾರಾತ್ಮಕ ಅರ್ಥವನ್ನು ಇದು ನೀಡುತ್ತದೆ. ಇಂತಹ ಕನಸುಗಳು ಬಿದ್ದಾಗ ಆತಂಕಪಡುವ ಬದಲು, ಇಷ್ಟದೇವರ ನಾಮಸ್ಮರಣೆ ಮಾಡುವುದು ಹಾಗೂ ಮನೆಯಲ್ಲಿ ಸ್ವಚ್ಛತೆ ಕಾಪಾಡಿಕೊಳ್ಳುವ ಮೂಲಕ ನಕಾರಾತ್ಮಕ ಶಕ್ತಿಯನ್ನು ದೂರ ಮಾಡಬಹುದು.
ಅಸ್ಸಾಂ ವಿಧಾನಸಭೆಯಲ್ಲಿ ಏಕರೂಪ ನಾಗರಿಕ ಸಂಹಿತೆ (UCC) ಮಸೂದೆ ಅಂಗೀಕಾರ!
