newsics.com | ನ್ಯೂಸಿಕ್ಸ್
ಯಕೃತ್ತು ಅಥವಾ ಲಿವರ್ಗೆ ಸಂಬಂಧಿಸಿದ ಕಾಯಿಲೆಗಳು ಆರಂಭದಲ್ಲಿ ಯಾವುದೇ ಗಂಭೀರ ನೋವು ಅಥವಾ ತೊಂದರೆಯನ್ನು ನೀಡದೆ ಒಳಗೊಳಗೇ ಹೆಚ್ಚಾಗುತ್ತವೆ. ಆದರೆ, ರೋಗ ಉಲ್ಬಣಗೊಳ್ಳುವ ಮುನ್ನವೇ ನಮ್ಮ ಚರ್ಮವು ದೇಹದ ಆಂತರಿಕ ಸ್ಥಿತಿಯ ಬಗ್ಗೆ ಕೆಲವು ಎಚ್ಚರಿಕೆಗಳನ್ನು ನೀಡುತ್ತದೆ. ಹೆಪಟೈಟಿಸ್ ಅಥವಾ ಲಿವರ್ ಸಿರೋಸಿಸ್ನಂತಹ ಅಪಾಯಕಾರಿ ಕಾಯಿಲೆಗಳ ಬಗ್ಗೆ ಮುನ್ಸೂಚನೆ ನೀಡುವ 5 ಪ್ರಮುಖ ಚರ್ಮದ ಲಕ್ಷಣಗಳು ಇಲ್ಲಿವೆ.
1. ಕಣ್ಣಿನ ಬಿಳಿಭಾಗ ಹಾಗೂ ಚರ್ಮ ಹಳದಿಯಾಗುವುದು
ದೇಹದಲ್ಲಿ ಯಕೃತ್ತಿನ ಕಾರ್ಯವೈಖರಿ ಹದಗೆಟ್ಟಾಗ ಕಾಣಿಸಿಕೊಳ್ಳುವ ಮೊದಲ ಪ್ರಮುಖ ಲಕ್ಷಣವೇ ಕಾಮಾಲೆ. ಮೃತ ಕೆಂಪು ರಕ್ತಕಣಗಳಿಂದ ಉತ್ಪತ್ತಿಯಾಗುವ ‘ಬಿಲಿರುಬಿನ್’ ಎಂಬ ಹಳದಿ ದ್ರವವನ್ನು ಲಿವರ್ ಹೊರಹಾಕಲು ವಿಫಲವಾದಾಗ, ಅದು ರಕ್ತದಲ್ಲಿ ಸೇರಿ ಚರ್ಮ ಹಾಗೂ ಕಣ್ಣುಗಳು ಹಳದಿ ಬಣ್ಣಕ್ಕೆ ತಿರುಗುವಂತೆ ಮಾಡುತ್ತದೆ. ಇದು ಪಿತ್ತರಸ ನಾಳದ ಬ್ಲಾಕೇಜ್ ಇರಬಹುದು ಎಂಬುದನ್ನು ಸೂಚಿಸುತ್ತದೆ.
2. ಚರ್ಮದ ಮೇಲೆ ಯಾವುದೇ ದದ್ದಿಲ್ಲದೆ ಕಾಡುವ ತೀವ್ರ ತುರಿಕೆ
ಚರ್ಮದ ಮೇಲೆ ಯಾವುದೇ ರೀತಿಯ ಗುಳ್ಳೆಗಳು ಅಥವಾ ಅಲರ್ಜಿ ಇಲ್ಲದಿದ್ದರೂ ತೀವ್ರವಾಗಿ ತುರಿಕೆ ಉಂಟಾಗುತ್ತಿದ್ದರೆ ಅದು ಲಿವರ್ ಕಾಯಿಲೆಯ ಸಂಕೇತವಾಗಿರಬಹುದು. ಅದರಲ್ಲೂ ರಾತ್ರಿ ವೇಳೆ ಕೈಕಾಲುಗಳಲ್ಲಿ ಈ ಸಮಸ್ಯೆ ಹೆಚ್ಚಾಗಿ ಕಾಡುತ್ತದೆ. ಪಿತ್ತರಸ ಆಮ್ಲಗಳು ರಕ್ತದಲ್ಲಿ ಶೇಖರಣೆಯಾಗುವುದರಿಂದ ಹೀಗಾಗುತ್ತದೆ ಎಂದು ಚೆನ್ನೈ ಲಿವರ್ ಫೌಂಡೇಶನ್ ಸ್ಪಷ್ಟಪಡಿಸಿದೆ.
3. ಮುಖ ಮತ್ತು ತೋಳುಗಳ ಮೇಲೆ ಕಪ್ಪು ತೇಪೆಗಳು
ಲಿವರ್ ತನ್ನ ಶಕ್ತಿಯನ್ನು ಕಳೆದುಕೊಂಡಾಗ ದೇಹದಲ್ಲಿ ಹಾರ್ಮೋನುಗಳ ಏರುಪೇರು ಮತ್ತು ಇನ್ಸುಲಿನ್ ಪ್ರತಿರೋಧ ಉಂಟಾಗುತ್ತದೆ. ಇದರ ಪರಿಣಾಮವಾಗಿ ಮೆಲನಿನ್ ಉತ್ಪಾದನೆ ಹೆಚ್ಚಾಗಿ ಕಣ್ಣುಗಳು, ಬಾಯಿ ಹಾಗೂ ತೋಳುಗಳ ಸುತ್ತಲೂ ಚರ್ಮವು ಅಸಹಜವಾಗಿ ಕಪ್ಪಾಗಲು ಅಥವಾ ಕಪ್ಪು ಕಲೆಗಳು ಮೂಡಲು ಆರಂಭವಾಗುತ್ತದೆ.
4. ಜೇಡರ ಬಲೆಯಂತಹ ಕೆಂಪು ರಕ್ತನಾಳಗಳ ಗೋಚರತೆ
ಮುಖ, ಕುತ್ತಿಗೆ ಅಥವಾ ಎದೆಯ ಭಾಗದಲ್ಲಿ ಸಣ್ಣ ಜೇಡರ ಬಲೆಯ ಮಾದರಿಯಲ್ಲಿ ಕೆಂಪು ಬಣ್ಣದ ರಕ್ತನಾಳಗಳು ಎದ್ದುಕಾಣುವುದನ್ನು ‘ಸ್ಫೈಡರ್ ಆಂಜಿಯೋಮಾಸ್’ ಎನ್ನಲಾಗುತ್ತದೆ. ಲಿವರ್ ಈಸ್ಟ್ರೊಜೆನ್ ಹಾರ್ಮೋನ್ ಅನ್ನು ಸರಿಯಾಗಿ ನಿಯಂತ್ರಿಸದಿದ್ದಾಗ ರಕ್ತನಾಳಗಳು ಹೀಗೆ ಹಿಗ್ಗುತ್ತವೆ. ಇದು ಸಿರೋಸಿಸ್ನ ಆರಂಭಿಕ ಹಂತದ ಲಕ್ಷಣವಾಗಿದೆ.
5. ಅಂಗೈ ಭಾಗ ವಿಪರೀತ ಕೆಂಪಾಗುವುದು
ಅಂಗೈಯ ಹೆಬ್ಬೆರಳು ಮತ್ತು ಕಿರುಬೆರಳಿನ ಕೆಳಗಿನ ಭಾಗವು ಸದಾ ಕೆಂಪು ಬಣ್ಣದಲ್ಲಿ ಇರುವುದನ್ನು ‘ಪಾಲ್ಮರ್ ಎರಿಥೆಮಾ’ ಎಂದು ಕರೆಯಲಾಗುತ್ತದೆ. ಅನೇಕರು ಇದನ್ನು ಕೇವಲ ಶರೀರದ ಉಷ್ಣತೆ ಎಂದು ತಪ್ಪು ತಿಳಿಯುತ್ತಾರೆ. ಆದರೆ, ಲಿವರ್ ಮೇಲಿನ ಒತ್ತಡ ಹಾಗೂ ರಕ್ತ ಪರಿಚಲನೆಯ ಏರುಪೇರಿನಿಂದ ಇದು ಸಂಭವಿಸುವುದರಿಂದ ತಕ್ಷಣವೇ ವೈದ್ಯರನ್ನು ಕಾಣುವುದು ಅಗತ್ಯ.
ಇಂತಹ ಲಕ್ಷಣಗಳು ಕಂಡುಬಂದರೆ ತಕ್ಷಣವೇ ರಕ್ತ ಪರೀಕ್ಷೆ ಹಾಗೂ ಸ್ಕ್ಯಾನಿಂಗ್ ಮಾಡಿಸಿಕೊಳ್ಳಬೇಕು. ಉತ್ತಮ ಆಹಾರ ಪದ್ಧತಿ ಅಳವಡಿಸಿಕೊಳ್ಳುವುದು, ನಿಯಮಿತ ವ್ಯಾಯಾಮ ಮತ್ತು ಮದ್ಯಪಾನದಿಂದ ಸಂಪೂರ್ಣವಾಗಿ ದೂರವಿರುವ ಮೂಲಕ ಲಿವರ್ ಆರೋಗ್ಯವನ್ನು ಕಾಪಾಡಿಕೊಳ್ಳಬಹುದು ಎಂದು ವೈದ್ಯರು ಸಲಹೆ ನೀಡಿದ್ದಾರೆ.
