newsics.com/ನ್ಯೂಸಿಕ್ಸ್
ಇತ್ತೀಚಿನ ದಿನಗಳಲ್ಲಿ ವಾಷಿಂಗ್ ಮಷಿನ್ ಅನ್ನು ಎಲ್ಲರ ಮನೆಯಲ್ಲಿಯೂ ಬಳಸುವುದು ಸರ್ವೇ ಸಾಮಾನ್ಯವಾಗಿದೆ. ನೀವು ಒಂಟಿಯಾಗಿರಲಿ ಅಥವಾ ದಂಪತಿಗಳಾಗಿರಲಿ ಅಥವಾ ಕೆಲಸ ಮಾಡಲು ಮತ್ತು ಓದಲು ಹೊರಗೆ ಎಲ್ಲೋ ವಾಸಿಸುತ್ತಿರಲಿ, ಬಟ್ಟೆ ಒಗೆಯುವುದು ಅವಶ್ಯಕ. ಹಾಗಾಗಿ ಕೊಳಕಾಗಿರುವ ಬಟ್ಟೆಗಳನ್ನು ಸ್ವಚ್ಛಗೊಳಿಸಲು ಹೆಚ್ಚು ಶ್ರಮ ಮತ್ತು ಸಮಯ ತೆಗೆದುಕೊಳ್ಳುತ್ತದೆ ಎಂದು ವಾಷಿಂಗ್ ಮಷಿನ್ ಅನ್ನು ಜನ ಉಪಯೋಗಿಸುತ್ತಾರೆ.
ಆದರೆ ಎಷ್ಟೋ ಜನಕ್ಕೆ ವಾಷಿಂಗ್ ಮಷಿನ್ ಹೇಗೆ ಬಳಸಬೇಕು? ಯಾವ ತರಹದ ಬಟ್ಟೆಗಳನ್ನು ಅದರೊಳಗೆ ಹಾಕಬೇಕು ಎಂಬ ಬಗ್ಗೆ ಗೊತ್ತಿಲ್ಲ. ಹಾಗಾಗಿ ನಾವಿಂದು ಈ ಬಗ್ಗೆ ಒಂದಷ್ಟು ಮಾಹಿತಿ ನೀಡುತ್ತೇವೆ. ಈ ಮೂಲಕ ನೀವು ಎಲ್ಲಾ ಬಟ್ಟೆಗಳನ್ನು ಯಂತ್ರದಲ್ಲಿ ಹಾಕುವ ಬದಲು ಯಾವ ಬಟ್ಟೆಗಳನ್ನು ಪ್ರತ್ಯೇಕಿಸಿ ಹಾಕಬೇಕು ಎಂಬುವುದನ್ನು ತಿಳಿದುಕೊಳ್ಳಿ. ಆಗ ಬಟ್ಟೆಗಳು ಹೆಚ್ಚು ದಿನಗಳ ಕಾಲ ಬಾಳಿಕೆ ಕೂಡ ಬರುತ್ತದೆ.
1. ಅತಿಯಾದ ಕೊಳಕಾಗಿರುವ ವಸ್ತುಗಳು
ಮರಳು ತುಂಬಿರುವ ಟವೆಲ್ಗಳು, ಸಾಕುಪ್ರಾಣಿಗಳ ಕೂದಲಿನಿಂದ ತುಂಬಿದ ಬ್ಲಾಂಕೆಟ್ಗಳು ಮತ್ತು ಕೆಸರಾಗಿರುವ ಬಟ್ಟೆಗಳನ್ನು ನೇರವಾಗಿ ವಾಷಿಂಗ್ ಮಷಿನ್ಗೆ ಹಾಕಬಾರದು. ಅತಿಯಾದ ಮರಳು, ಮಣ್ಣು ಅಥವಾ ಕೂದಲು ಮಷಿನ್ ಅನ್ನು ಹಾಳು ಮಾಡುವುದು ಮಾತ್ರವಲ್ಲದೆ, ನಿಮ್ಮ ಬಟ್ಟೆಗಳೂ ಸರಿಯಾಗಿ ಸ್ವಚ್ಛವಾಗುವುದಿಲ್ಲ. ಮಷಿನ್ಗೆ ಹಾಕುವ ಮುನ್ನ ಇಂತಹ ಬಟ್ಟೆ ಅಥವಾ ಟವೆಲ್ಗಳನ್ನು ಹೊರಗೆ ಅಥವಾ ಕಸದ ಬುಟ್ಟಿಯ ಮೇಲೆ ಚೆನ್ನಾಗಿ ಉದರಿಸಿ/ಕೊಡವಿ ಹಾಕಿ. ನಾಯಿಯ ಕೂದಲನ್ನು ತೆಗೆಯಲು ನೀವು ಲಿಂಟ್ ರೋಲರ್ (Lint Roller) ಕೂಡ ಬಳಸಬಹುದು.
2. ಗಟ್ಟಿಯಾದ ಫೋಮ್ ದಿಂಬುಗಳು
ನೆಕ್ ಸಪೋರ್ಟ್ ನೀಡುವ ಗಟ್ಟಿಯಾದ ಮೆಮೊರಿ ಫೋಮ್ ದಿಂಬುಗಳನ್ನು ಎಂದಿಗೂ ವಾಷಿಂಗ್ ಮಷಿನ್ನಲ್ಲಿ ತೊಳೆಯಬಾರದು. ಮಷಿನ್ನ ಫೋರ್ಸ್ ಮೂವಿಂಗ್ ಮತ್ತು ಹೈ-ಸ್ಪೀಡ್ ಸ್ಪಿನ್ ಈ ಫೋಮ್ ಅನ್ನು ಸಂಪೂರ್ಣವಾಗಿ ಹಾಳುಮಾಡುತ್ತದೆ. “ಇವುಗಳನ್ನು ಕೈಯಲ್ಲೂ ತೊಳೆಯಬಾರದು, ಏಕೆಂದರೆ ನೀರು ತುಂಬಿಕೊಂಡಾಗ ನೀರಿನ ತೂಕಕ್ಕೆ ಫೋಮ್ ಹರಿದುಹೋಗಬಹುದು” ಎನ್ನುತ್ತಾರೆ ತಜ್ಞರು. ಇದರ ಬದಲು ಮಷಿನ್ನಲ್ಲಿ ತೊಳೆಯಬಹುದಾದ ಪಿಲ್ಲೋ ಕವರ್ಗಳನ್ನು ಬಳಸುವುದು ಉತ್ತಮ.
3. ಹೆಚ್ಚು ತೂಕವಿರುವ ಬ್ಲಾಂಕೆಟ್ಗಳು
ಕೆಲವು ದೊಡ್ಡ ಮತ್ತು ತೂಕದ ಬ್ಲಾಂಕೆಟ್ಗಳ ಮೇಲೆ ‘ಮಷಿನ್ ವಾಶ್ ಮಾಡಬಹುದು’ ಎಂದು ಬರೆದಿರಬಹುದು. ಆದರೆ ನಿಮ್ಮ ವಾಷಿಂಗ್ ಮಷಿನ್ನ ಸಾಮರ್ಥ್ಯವನ್ನು ಯೋಚಿಸುವುದು ಮುಖ್ಯ. ದೊಡ್ಡ ಹೋಮ್ ವಾಷಿಂಗ್ ಮಷಿನ್ಗಳು 22 ರಿಂದ 24 ಪೌಂಡ್ಸ್ (ಸುಮಾರು 10 ಕೆಜಿ) ತೂಕವನ್ನು ತಡೆದುಕೊಳ್ಳಬಲ್ಲವಾದರೂ, ಒಂದೇ ಒಂದು 20 ಪೌಂಡ್ಸ್ (ಸುಮಾರು 9 ಕೆಜಿ) ತೂಕದ ವಸ್ತು ಮಷಿನ್ ಮೇಲೆ ಭಾರಿ ಒತ್ತಡ ಹೇರಬಹುದು. ನಿಮ್ಮ ಮಷಿನ್ ಸಾಮರ್ಥ್ಯ ಹೆಚ್ಚಿದ್ದರೂ, 15 ಪೌಂಡ್ಗಿಂತ (ಸುಮಾರು 6.8 ಕೆಜಿ) ಹೆಚ್ಚು ತೂಕವಿರುವ ಬ್ಲಾಂಕೆಟ್ಗಳನ್ನು ಮಷಿನ್ನಲ್ಲಿ ತೊಳೆಯಬೇಡಿ ಎಂದು ತಜ್ಞರು ಶಿಫಾರಸು ಮಾಡುತ್ತಾರೆ.
4. ‘ಡ್ರೈ ಕ್ಲೀನ್ ಒನ್ಲಿ’ ಎಂದು ಬರೆದಿರುವ ಬಟ್ಟೆಗಳು
ಬಟ್ಟೆಗಳನ್ನು ಮಷಿನ್ಗೆ ಹಾಕುವ ಮುನ್ನ ಯಾವಾಗಲೂ ಕೇರ್ ಲೇಬಲ್ ಪರಿಶೀಲಿಸಿ. ಲೇಬಲ್ನಲ್ಲಿ ಡ್ರೈ ಕ್ಲೀನ್ ಒನ್ಲಿ ಎಂದಿದ್ದರೆ, ಅಂತಹ ಬಟ್ಟೆಗಳನ್ನು ಮಷಿನ್ಗೆ ಹಾಕಿದಾಗ ಅವು ಕುಗ್ಗುವ, ಬಣ್ಣ ಮಸುಕಾಗುವ ಅಥವಾ ಹರಿದುಹೋಗುವ ಅಪಾಯವಿರುತ್ತದೆ. ರೇಷ್ಮೆ , ಕ್ಯಾಶ್ಮೀರ್ , ಚರ್ಮ , ಎಂಬ್ರಾಯ್ಡರಿ ಇರುವ ಬಟ್ಟೆಗಳು ಮತ್ತು ಸೂಟ್ ಹಾಗೂ ಗೌನ್ಗಳಂತಹ ಫಾರ್ಮಲ್ ಉಡುಪುಗಳನ್ನು ಡ್ರೈ ಕ್ಲೀನ್ ಮಾತ್ರ ಮಾಡಿಸಬೇಕು.
5. ಹಳೆಯ ಮತ್ತು ಸೂಕ್ಷ್ಮವಾದ ಬಟ್ಟೆಗಳು
ಹಳೆಯ ಕಾಲದ ಉಡುಪುಗಳು ಅಥವಾ ರೇಷ್ಮೆ, ಸೂಡ್ ಮತ್ತು ಲೇಸ್ನಂತಹ ಸೂಕ್ಷ್ಮವಾದ ಬಟ್ಟೆಗಳನ್ನು ಮಷಿನ್ನಲ್ಲಿ ತೊಳೆಯಬಾರದು. ಬದಲಿಗೆ, ಇವುಗಳನ್ನು ತಣ್ಣೀರಿನಲ್ಲಿ ಮೈಲ್ಡ್ ಡಿಟರ್ಜೆಂಟ್ ಬಳಸಿ ಕೈಯಿಂದ ತೊಳೆಯಬೇಕು ಅಥವಾ ಡ್ರೈ ಕ್ಲೀನಿಂಗ್ಗೆ ನೀಡಬೇಕು. ನೆರಿಗೆಯ ಸ್ಕರ್ಟ್ಗಳು , ಚರ್ಮದ ಬಟ್ಟೆಗಳು ಮತ್ತು ಮಣಿಗಳು, ಮಿನುಗುಗಳು ಅಥವಾ ಲೇಸ್ ವರ್ಕ್ ಇರುವ ಬಟ್ಟೆಗಳಿಗೆ ಡ್ರೈ ಕ್ಲೀನಿಂಗ್ ಉತ್ತಮ.
6. ಜಿಪ್ ಹಾಕದ ಬಟ್ಟೆಗಳು
ನೀವು ಜೀನ್ಸ್ ಪ್ಯಾಂಟ್, ಜಾಕೆಟ್ ಅಥವಾ ಬೆಡ್ ಶೀಟ್ಗಳನ್ನು ತೊಳೆಯುವಾಗ ಅವುಗಳ ಜಿಪ್ ಸಂಪೂರ್ಣವಾಗಿ ಮುಚ್ಚಲಾಗಿದೆಯೇ ಎಂದು ಖಚಿತಪಡಿಸಿಕೊಳ್ಳಿ. ತೆರೆದಿರುವ ಜಿಪ್ನ ಟೀತ್ ಸುಲಭವಾಗಿ ಇತರ ಬಟ್ಟೆಗಳಿಗೆ ಸಿಲುಕಿ ಅವುಗಳನ್ನು ಹರಿದು ಹಾಕಬಹುದು. ಅಲ್ಲದೆ, ಮೆಶ್ ಲಾಂಡ್ರಿ ಬ್ಯಾಗ್ಗಳನ್ನು ಮಷಿನ್ಗೆ ಹಾಕುವ ಮುನ್ನವೂ ಅವುಗಳ ಜಿಪ್ ಲಾಕ್ ಮಾಡಿ.
7. ಜೇಬಿನಲ್ಲಿ ಉಳಿದುಕೊಳ್ಳುವ ವಸ್ತುಗಳು
ಬಟ್ಟೆಗಳನ್ನು ಮಷಿನ್ಗೆ ಹಾಕುವಾಗ ಜೇಬಿನಲ್ಲಿ ಏನಾದರೂ ಇದೆಯೇ ಎಂದು ಯಾವಾಗಲೂ ಪರಿಶೀಲಿಸಿ. ಕಾಯಿನ್ಗಳು, ಕೀಗಳು, ಟಿಶ್ಯೂ ಪೇಪರ್, ಹಳೆಯ ರಶೀದಿಗಳು ಅಥವಾ ಲಿಪ್ ಬಾಮ್ಗಳು ಜೇಬಿನಲ್ಲೇ ಉಳಿದುಬಿಡಬಹುದು. ಲಿಪ್ ಬಾಮ್ ಮತ್ತು ಟಿಶ್ಯೂಗಳು ಕರಗಿ ಇಡೀ ಬಟ್ಟೆಯ ತುಂಬಾ ಹರಡಿದರೆ, ಕಾಯಿನ್ ಮತ್ತು ಕೀಗಳಂತಹ ಲೋಹದ ವಸ್ತುಗಳು ವಾಷಿಂಗ್ ಮೆಷಿನ್ನ ಒಳಗಿನ ಭಾಗವನ್ನು ಹಾನಿಗೊಳಿಸಬಹುದು.
8. ಲೆದರ್ ಬಟ್ಟೆಗಳು
ಮೊದಲೇ ಹೇಳಿದಂತೆ, ಲೆದರ್ (ಚರ್ಮದ) ಬಟ್ಟೆಗಳನ್ನು ವಾಷಿಂಗ್ ಮಷಿನ್ನಿಂದ ದೂರವಿಡಬೇಕು. ವಾಟರ್ ಸೈಕಲ್ ಅಥವಾ ಅತಿಯಾದ ಶಾಖಕ್ಕೆ ಒಡ್ಡಿಕೊಂಡಾಗ ಲೆದರ್ ಬಟ್ಟೆಗಳು ಮುರುಟಿಕೊಳ್ಳಬಹುದು, ಬಿರುಕು ಬಿಡಬಹುದು ಅಥವಾ ಕುಗ್ಗಬಹುದು. ಲೆದರ್ ಜಾಕೆಟ್ಗಳು ಅಥವಾ ಪ್ಯಾಂಟ್ಗಳನ್ನು ಕೈಯಿಂದ ಸ್ವಚ್ಛಗೊಳಿಸಿ ಅಥವಾ ಕಲೆ ಇರುವ ಜಾಗವನ್ನು ಮಾತ್ರ ಒರೆಸಿ.
9. ಬಣ್ಣ ಬಿಡುವ ಡಾರ್ಕ್ ಮತ್ತು ಬ್ರೈಟ್ ಬಟ್ಟೆಗಳು
ಕೆಲವು ಬಣ್ಣಗಳು, ಅದರಲ್ಲೂ ವಿಶೇಷವಾಗಿ ಕೆಂಪು ಮತ್ತು ಆರೆಂಜ್ ಬಣ್ಣದ ಹೊಸ ಬಟ್ಟೆಗಳು ಒಗೆಯುವಾಗ ಬಣ್ಣ ಬಿಡುತ್ತವೆ. ಇದು ಮಷಿನ್ನಲ್ಲಿರುವ ಉಳಿದೆಲ್ಲಾ ಬಟ್ಟೆಗಳಿಗೂ ಕಲೆಯಾಗುವಂತೆ ಮಾಡಬಹುದು. ಬಣ್ಣ ಬಿಡಬಹುದು ಎಂಬ ಅನುಮಾನವಿದ್ದರೆ, ಅಂತಹ ಬಟ್ಟೆಗಳನ್ನು ಪ್ರತ್ಯೇಕವಾಗಿ ಕೈಯಲ್ಲೇ ತೊಳೆಯುವುದು ಜಾಣತನ.
Nivedita Gowda ಪ್ರೀತಿ ಅರ್ಥಾನೆ ಗೊತ್ತಿಲ್ಲ ಅಂತ ಟ್ರೋಲ್ ಮಾಡೋರಿಗೆ ತಿರುಗೇಟು ಕೊಟ್ಟ ನಿವೇದಿತಾ ಗೌಡ
