newsics.com/ನ್ಯೂಸಿಕ್ಸ್
ಅನಿಯಮಿತ ಮುಟ್ಟು ಅಥವಾ ಮುಟ್ಟಿನ ಸಮಯದಲ್ಲಿ ಆಗುವ ಸಮಸ್ಯೆ ಅನೇಕ ರೋಗಗಳ ಅಪಾಯವನ್ನು ಹೆಚ್ಚಿಸುತ್ತದೆ. ಒಂದು ಅಧ್ಯಯನದ ಪ್ರಕಾರ 40 ವರ್ಷಕ್ಕಿಂತ ಮೊದಲು ಋತುಬಂಧ ಸಂಭವಿಸಿದಲ್ಲಿ ಹೃದಯ ವೈಫಲ್ಯ ಮತ್ತು ಹೃತ್ಕರ್ಣದ ಕಂಪನ ಅಪಾಯ ಹೆಚ್ಚಾಗುತ್ತದೆಯಂತೆ. ಹೃತ್ಕರ್ಣದ ಕಂಪನದಲ್ಲಿ ಹೃದಯ ಬಡಿತವು ಹೆಚ್ಚಾಗುತ್ತದೆ. ಹೃದಯ ಬಡಿತ ಅನಿಯಮಿತವಾಗಿರುತ್ತದೆ.
ಇದು ರಕ್ತ ಹೆಪ್ಪುಗಟ್ಟುವಿಕೆಯೊಂದಿಗೆ ಪಾರ್ಶ್ವವಾಯು ಮತ್ತು ಹೃದಯ ವೈಫಲ್ಯದ ಅಪಾಯವನ್ನು ಹೆಚ್ಚಿಸುತ್ತದೆ. ಸುಮಾರು 1.4 ಮಿಲಿಯನ್ ಮಹಿಳೆ ಯರ ಮೇಲೆ ನಡೆಸಿದ ಈ ಅಧ್ಯಯನದ ಸಂಶೋಧನೆಗಳನ್ನು ವಿಶ್ವಪ್ರಸಿದ್ಧ ‘ದಿ ಲ್ಯಾನ್ಸೆಟ್ ಅಬ್ಸ್ಟೆಟ್ರಿಕ್ಸ್, ಗೈನಕಾಲಜಿ ಅಂಡ್ ವುಮೆನ್ಸ್ ಹೆಲ್ತ್ ಪ್ರಕಟಿಸಲಾಗಿದೆ.
ವಿಶ್ವದ 26 ದೇಶಗಳ 1,11,600 ಕ್ಕೂ ಹೆಚ್ಚು ಮಹಿಳೆಯರ ದತ್ತಾಂಶವನ್ನು ಬಳಸಿ ‘ಪ್ಯೂರ್’ (PURE – Prospective Urban Rural Epidemiologic) ಸಂಸ್ಥೆಯ ಸಂಶೋಧಕರು ಈ ಅಧ್ಯಯನ ನಡೆಸಿದ್ದಾರೆ.45 ವರ್ಷದ ಆಸುಪಾಸಿನಲ್ಲಿ ಮುಟ್ಟು ನಿಲ್ಲುವ ಮಹಿಳೆಯರಿಗೆ ಹೋಲಿಸಿದರೆ, 40 ರಿಂದ 44 ವರ್ಷದೊಳಗೆ ಆರಂಭಿಕ ಋತುಬಂಧಕ್ಕೆ ಒಳಗಾಗುವ ಮಹಿಳೆಯರಲ್ಲಿ ಹೃದಯ ಸಂಬಂಧಿ ಕಾಯಿಲೆಗಳ ಅಪಾಯ ಶೇಕಡಾ 30 ರಿಂದ 40 ರಷ್ಟು ಹೆಚ್ಚು ಇರುತ್ತದೆ.
ಈ ಅಧ್ಯಯನದಲ್ಲಿದ್ದ 7,872 ಭಾರತೀಯ ಮಹಿಳೆಯರ ಪೈಕಿ ಶೇ. 18.4 ರಷ್ಟು (1,445 ಮಹಿಳೆಯರು) ಅವಧಿಗೆ ಮುನ್ನವೇ (Premature Menopause) ಮುಟ್ಟು ನಿಲ್ಲುವ ಸಮಸ್ಯೆಗೆ ಒಳಗಾಗಿದ್ದಾರೆ. ಭಾರತೀಯ ಮಹಿಳೆಯರಲ್ಲಿ ಋತುಬಂಧದ ಸರಾಸರಿ ವಯಸ್ಸು ಕೇವಲ 44.6 ವರ್ಷಗಳಾಗಿದೆ. ಒಟ್ಟಾರೆಯಾಗಿ, ಶೇ. 43.6 ರಷ್ಟು ಭಾರತೀಯ ಮಹಿಳೆಯರು ನಿಗದಿತ ಸಮಯಕ್ಕಿಂತ ಮುಂಚಿತವಾಗಿಯೇ ಋತುಬಂಧವನ್ನು ಎದುರಿಸುತ್ತಿದ್ದಾರೆ.
ಯುರೋಪ್ (47.8 ವರ್ಷ) ಮತ್ತು ಶ್ರೀಮಂತ ದೇಶಗಳಿಗೆ (48 ವರ್ಷ) ಹೋಲಿಸಿದರೆ, ಭಾರತ ಸೇರಿದಂತೆ ದಕ್ಷಿಣ ಏಷ್ಯಾ ಹಾಗೂ ಕಡಿಮೆ ಆದಾಯವಿರುವ ದೇಶಗಳ ಮಹಿಳೆಯರಲ್ಲಿ ಸರಾಸರಿ 44.7 ವರ್ಷಕ್ಕೇ ಮುಟ್ಟು ನಿಲ್ಲುತ್ತಿದೆ ಎಂದು ಆಸ್ಟ್ರೇಲಿಯಾದ ಸಿಡ್ನಿ ವಿಶ್ವವಿದ್ಯಾಲಯದ ಮುಖ್ಯ ಸಂಶೋಧಕಿ ಡಾ. ಸಿಮೋನ್ ಮಾರ್ಷ್ನರ್ ತಿಳಿಸಿದ್ದಾರೆ.
ಮಹಿಳೆಯರಲ್ಲಿ ಮುಟ್ಟು ನಿಲ್ಲುವ ಮುನ್ನ ಉತ್ಪತ್ತಿಯಾಗುವ ಸ್ತ್ರೀ ಹಾರ್ಮೋನ್ಗಳು (Estrogen) ಅವರ ರಕ್ತದ ಲಿಪಿಡ್ಗಳು, ದೇಹದ ಕೊಬ್ಬಿನ ವಿತರಣೆ ಮತ್ತು ರಕ್ತನಾಳಗಳನ್ನು ರಕ್ಷಿಸುತ್ತವೆ. ಹೀಗಾಗಿ ಅವರಿಗೆ ಹೃದಯಾಘಾತದ ಭಯ ಕಡಿಮೆ ಇರುತ್ತದೆ.ಆದರೆ, ಒಮ್ಮೆ ಮುಟ್ಟು ನಿಂತರೆ ಈ ಹಾರ್ಮೋನ್ಗಳ ರಕ್ಷಣೆ ಇಲ್ಲದಂತಾಗುತ್ತದೆ. ಆಗ ಮಹಿಳೆಯರಲ್ಲೂ ಪುರುಷರಷ್ಟೇ ಸಮಾನವಾಗಿ ಹೃದಯಾಘಾತದ ಅಪಾಯ ಹೆಚ್ಚಾಗುತ್ತದೆ ಎಂದು ಸಾರ್ವಜನಿಕ ಆರೋಗ್ಯ ತಜ್ಞರಾದ ಡಾ. ಕೆ. ಶ್ರೀನಾಥ್ ರೆಡ್ಡಿ ವಿವರಿಸಿದ್ದಾರೆ.
