Subscribe ನ್ಯೂಸಿಕ್ಸ್ ಕನ್ನಡ
newsics.com
ರಾತ್ರಿ ಹೊತ್ತು ಮಲಗುವಾಗ ತಲೆ ಕೂದಲಿಗೆ ಸರಿಯಾದ ಕಾಳಜಿ ವಹಿಸುವುದು ಬಹಳ ಮುಖ್ಯವಾಗಿದ್ದು, ಇದನ್ನು ನಿರ್ಲಕ್ಷ್ಯ ಮಾಡಿದರೆ ಬೆಳಗ್ಗೆ ಕೂದಲು ಉದುರುವಿಕೆ ಮತ್ತು ಒಡೆಯುವಿಕೆ ಸಮಸ್ಯೆ ಕಾಣಿಸಿಕೊಳ್ಳುತ್ತದೆ.
ಸಾಮಾನ್ಯವಾಗಿ ಹಲವರು ಕೂದಲನ್ನು ಬಿಚ್ಚಿ ಮಲಗುವುದು ಆರಾಮದಾಯಕ ಎಂದು ಭಾವಿಸುತ್ತಾರೆ.
ಇದರಿಂದ ಕೂದಲಿನ ಮೇಲೆ ಯಾವುದೇ ಒತ್ತಡ ಬೀರುವುದಿಲ್ಲವಾದರೂ, ಉದ್ದನೆಯ ಕೂದಲು ರಾತ್ರಿಯಿಡೀ ದಿಂಬಿನೊಂದಿಗೆ ಉಜ್ಜಿಕೊಂಡು ಸಿಕ್ಕು ಆಗುವ ಸಾಧ್ಯತೆ ಹೆಚ್ಚಾಗುತ್ತದೆ. ಬೆಳಗ್ಗೆ ಆ ಸಿಕ್ಕು ಬಿಡಿಸಲು ಜೋರಾಗಿ ಬಾಚುವುದರಿಂದ ಕೂದಲು ಒಡೆಯುವ ಅಪಾಯವಿದೆ ಹಾಗೂ ಫ್ರಿಜ್ ಸಮಸ್ಯೆಯೂ ಹೆಚ್ಚಾಗಬಹುದು. ಇನ್ನು ಕೆಲವರು ಕೂದಲನ್ನು ಕಟ್ಟಿ ಮಲಗುವುದನ್ನು ಆಯ್ಕೆಮಾಡುತ್ತಾರೆ. ಇದರಿಂದ ಕೂದಲು ಜಟಿಲವಾಗುವುದನ್ನು ತಡೆಯಬಹುದು ಮತ್ತು ಬೆಳಗ್ಗೆ ಸುಲಭವಾಗಿ ಬಾಚಿಕೊಳ್ಳಬಹುದು.
ಆದರೆ ಕೂದಲನ್ನು ತುಂಬಾ ಬಿಗಿಯಾಗಿ ಕಟ್ಟಿದರೆ ನೆತ್ತಿಯ ಮೇಲೆ ಒತ್ತಡ ಉಂಟಾಗಿ ಕೂದಲು ದುರ್ಬಲಗೊಳ್ಳುತ್ತದೆ. ವಿಶೇಷವಾಗಿ ರಬ್ಬರ್ ಬ್ಯಾಂಡ್ ಬಳಕೆ ಕೂದಲು ಒಡೆಯುವಿಕೆಗೆ ಕಾರಣವಾಗಬಹುದು. ಆದ್ದರಿಂದ ಯಾವ ವಿಧಾನ ಉತ್ತಮ ಎಂಬುದು ನಿಮ್ಮ ಕೂದಲಿನ ಉದ್ದ, ದಪ್ಪ ಮತ್ತು ಸ್ವಭಾವವನ್ನು ಅವಲಂಬಿಸಿರುತ್ತದೆ. ಉದ್ದ ಹಾಗೂ ದಪ್ಪ ಕೂದಲು ಇದ್ದವರು ಸಡಿಲವಾಗಿ ಬ್ರೇಡ್ ಅಥವಾ ಸಾಫ್ಟ್ ಬ್ಯಾಂಡ್ ಬಳಸಿ ಮಲಗುವುದು ಉತ್ತಮ. ಚಿಕ್ಕ ಅಥವಾ ತೆಳ್ಳಗಿನ ಕೂದಲು ಹೊಂದಿರುವವರು ಕೂದಲನ್ನು ಮುಕ್ತವಾಗಿ ಬಿಡಬಹುದು. ಜೊತೆಗೆ ಮಲಗುವ ಮುನ್ನ ಕೂದಲನ್ನು ನಿಧಾನವಾಗಿ ಬಾಚುವುದು, ಒದ್ದೆ ಕೂದಲಿನೊಂದಿಗೆ ಮಲಗದೇ ಇರುವುದು, ರೇಷ್ಮೆ ಅಥವಾ ಸ್ಯಾಟಿನ್ ದಿಂಬು ಬಳಸುವುದು ಹಾಗೂ ಸ್ವಲ್ಪ ಹೇರ್ ಸೀರಮ್ ಅಥವಾ ಎಣ್ಣೆ ಹಚ್ಚಿಕೊಳ್ಳುವುದು ಕೂದಲು ಆರೋಗ್ಯಕರವಾಗಿರಲು ಸಹಾಯ ಮಾಡುತ್ತದೆ.
