ಭಾರತೀಯರು ಚಹಾ ಪ್ರಿಯರು. ಬಹುತೇಕ ಮಂದಿ ಹಲ್ಲುಜ್ಜಿದ ತಕ್ಷಣ ಮಾಡುವ ಮೊದಲ ಕೆಲಸವೆಂದರೆ ಚಹಾ ಕುಡಿಯುವುದು. ಇದಾದ ನಂತರ ಮಾತ್ರ ಉಳಿದ ಕೆಲಸವನ್ನು ಮಾಡುತ್ತಾರೆ. ಏಕೆಂದರೆ ಚಹಾ ಕುಡಿದ ನಂತರ ನಮಗೆ ಹೊಸ ಎನರ್ಜಿ ಸಿಕ್ಕಂತೆ ಅನಿಸುತ್ತದೆ. ಜೊತೆಗೆ ಈ ಶಕ್ತಿಯಿಂದ ದಿನವಿಡೀ ನಾವು ಲವಲವಿಕೆಯಿಂದ ಕೂಡಿರುತ್ತೇವೆ ಎಂದು ಜನ ಭಾವಿಸುತ್ತಾರೆ.
ತಲೆ ನೋವು, ಒತ್ತಡ, ಟೆನ್ಷನ್ ಕಡಿಮೆ ಮಾಡಿ ಫ್ರೆಶ್ನೆಸ್ ಬೇಕು ಅನಿಸುವ ಪ್ರತಿಯೊಬ್ಬರಿಗೂ ಚಹಾ ಅದೆನೋ ಒಂದು ರೀತಿ ಮಾತ್ರೆ ಇದ್ದಂತೆ. ಇದನ್ನು ಕುಡಿದಾಗಲೇ ಕೆಲವರ ತಲೆ ಓಡೋದು. ಕಚೇರಿಗಳಲ್ಲಿ ಕೆಲ ಮಾಡುವವರಿಗಂತೂ ಕಡಿಮೆ ಅಂದರೂ ದಿನಕ್ಕೆ ಎರಡು ಬಾರಿ ಚಹಾ ಬೇಕೇ ಬೇಕು. ಅದೆಷ್ಟೇ ಒತ್ತಡದ ಕೆಲಸವಿದ್ದರು ಒಂದು ಬ್ರೇಕ್ ಹಾಕಿ ಚಹಾ ಕುಡಿದುಬಿಟ್ಟರೆ ಹೊಸ ಉಲ್ಲಾಸವೇ ಮೂಡುತ್ತದೆ. ಹೀಗೇ ಚಹಾವನ್ನು ಪ್ರೀತಿಸುವ ಪ್ರತಿಯೊಬ್ಬರಿಗೂ ಅಂತರರಾಷ್ಟ್ರೀಯ ಚಹಾ ದಿನದ ಶುಭಾಶಯಗಳು. ಪ್ರತಿ ವರ್ಷ ಮೇ 21 ರಂದು ಅಂತರರಾಷ್ಟ್ರೀಯ ಚಹಾ ದಿನವನ್ನು ಆಚರಿಸಲಾಗುತ್ತದೆ.
ಚಹಾ ಕಾರ್ಮಿಕರ ಸುರಕ್ಷಿತ ಕೆಲಸದ ಪರಿಸ್ಥಿತಿಗಳು, ನ್ಯಾಯಯುತ ವ್ಯಾಪಾರ ಮತ್ತು ಚಹಾ ಉತ್ಪಾದನೆಯನ್ನು ಸುಧಾರಿಸಲು ಸುಸ್ಥಿರ ವಾತಾವರಣದ ಬಗ್ಗೆ ಜಾಗೃತಿ ಮೂಡಿಸಲು ಈ ದಿನವನ್ನು ಆಚರಿಸಲಾಗುತ್ತದೆ
ಅಂತರರಾಷ್ಟ್ರೀಯ ಚಹಾ ದಿನವನ್ನು ಯುಎನ್ನ ಆಹಾರ ಮತ್ತು ಕೃಷಿ ಸಂಸ್ಥೆ (ಎಫ್ಎಒ) ಆಚರಿಸುತ್ತದೆ. ಇದಕ್ಕೂ ಮುನ್ನ, ಚಹಾ ಉತ್ಪಾದಿಸುವ ರಾಷ್ಟ್ರಗಳಾದ ಬಾಂಗ್ಲಾದೇಶ, ಶ್ರೀಲಂಕಾ, ನೇಪಾಳ, ವಿಯೆಟ್ನಾಂ, ಇಂಡೋನೇಷ್ಯಾ, ಕೀನ್ಯಾ, ಮಲಾವಿ, ಮಲೇಷ್ಯಾ, ಉಗಾಂಡಾ, ಭಾರತ ಮತ್ತು ಟಾಂಜಾನಿಯಾಗಳಲ್ಲಿ ಡಿಸೆಂಬರ್ 15 ಅನ್ನು ಅಂತರರಾಷ್ಟ್ರೀಯ ಚಹಾ ದಿನವಾಗಿ ಆಚರಿಸಲಾಗುತ್ತಿತ್ತು.
2005ರಲ್ಲಿ ಮೊದಲ ಬಾರಿಗೆ ಅಂತಾರಾಷ್ಟ್ರೀಯ ಚಹಾ ದಿನವನ್ನು ಭಾರತದಲ್ಲಿ ಆಚರಿಸಲಾಯಿತು. 2015 ರಲ್ಲಿ ಭಾರತ ಸರ್ಕಾರ ಜಾಗತಿಕವಾಗಿ ಈ ದಿನವನ್ನು ವಿಸ್ತರಿಸಲು ಪ್ರಸ್ತಾಪಿಸಿತು. ಈ ದಿನವನ್ನು ಮೇ ತಿಂಗಳಲ್ಲಿ ಆಚರಿಸಲಾಗುತ್ತದೆ. ಏಕೆಂದರೆ ವರ್ಷದ ಈ ಸಮಯದಲ್ಲಿ ಹೆಚ್ಚಿನ ದೇಶಗಳಲ್ಲಿ ಚಹಾ ಉತ್ಪಾದನೆಯು ಪ್ರಾರಂಭವಾಗುತ್ತದೆ.
ಚಹಾವು ಪಾನೀಯಕ್ಕಿಂತ ಹೆಚ್ಚಿನದಾಗಿದೆ; ಇದು ಪ್ರಪಂಚದಾದ್ಯಂತದ ಸಂಸ್ಕೃತಿಗಳ ಅವಿಭಾಜ್ಯ ಅಂಗವಾಗಿದೆ. ಬ್ರಿಟನ್ನಲ್ಲಿ, ಮಧ್ಯಾಹ್ನದ ಚಹಾ ಜೀವನಶೈಲಿ ಬಹುತೇಕ ಪವಿತ್ರವಾಗಿದೆ. ಅದೇ ಸಮಯದಲ್ಲಿ, ಜಪಾನ್ನಲ್ಲಿ, ಚಹಾ ಸಮಾರಂಭವು ಒಂದು ಕಲಾ ಪ್ರಕಾರ ಮತ್ತು ಧ್ಯಾನದ ವ್ಯಾಯಾಮವಾಗಿದೆ.
ಚೀನಾದಲ್ಲಿ ಚಹಾವು ಶತಮಾನಗಳಿಂದ ಸಾಮರಸ್ಯ ಮತ್ತು ಜ್ಞಾನೋದಯದ ಚಿತ್ರವಾಗಿದೆ. ಆರ್ಥಿಕವಾಗಿ ಚಹಾ ಉದ್ಯಮವು ನಿರ್ದಿಷ್ಟವಾಗಿ ಗ್ರಾಮೀಣ ಪ್ರದೇಶಗಳಲ್ಲಿ ನೂರಾರು ಸಾವಿರ ಜೀವನೋಪಾಯಗಳನ್ನು ಪೋಷಿಸುತ್ತದೆ.
ಚಹಾ ಉದ್ಯಮವು ಕೆಲವು ಬಡ ದೇಶಗಳಿಗೆ ರಫ್ತು ಆದಾಯದ ಮುಖ್ಯ ಮೂಲವಾಗಿದೆ. ಹಾಗೆಯೇ ಅನೇಕರಿಗೆ ಉದ್ಯೋಗವನ್ನು ಒದಗಿಸುತ್ತದೆ. ಅಷ್ಟೇ ಅಲ್ಲ, ಅಭಿವೃದ್ಧಿಶೀಲ ರಾಷ್ಟ್ರಗಳಲ್ಲಿ ಗ್ರಾಮೀಣಾಭಿವೃದ್ಧಿ, ಬಡತನ ನಿವಾರಣೆ ಮತ್ತು ಆಹಾರ ಸುರಕ್ಷತೆಯಲ್ಲಿ ಬಹುಮುಖ್ಯ ಪಾತ್ರವನ್ನು ವಹಿಸುತ್ತದೆ. ಲಕ್ಷಾಂತರ ಕುಟುಂಬಗಳು ಚಹಾ ನಂಬಿಕೊಂಡೇ ಜೀವನ ಸಾಗಿಸುತ್ತಿದ್ದಾರೆ
