newsics.com
ಕಳೆದ ವರ್ಷದ ಜೂನ್ ನಿಂದ ಅಂತರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣದಲ್ಲಿ ಸಿಕ್ಕಿಬಿದ್ದಿರುವ ಅಮೆರಿಕದ ಇಬ್ಬರು ಗಗನಯಾತ್ರಿಗಳು ನಿರೀಕ್ಷೆಗಿಂತಲೂ ಮೊದಲೇ ಭೂಮಿಗೆ ವಾಪಸಾಗುವ ಸಾಧ್ಯತೆಯಿದೆ ಎಂದು ಅಮೆರಿಕದ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ ನಾಸಾ ಹೇಳಿದೆ.
ಗಗನಯಾತ್ರಿಗಳಾದ ಸುನೀತಾ ವಿಲಿಯಮ್ಸ್ ಮತ್ತು ಬುಚ್ ವಿಲ್ಮೋರ್ ಮಾರ್ಚ್ ಪ್ರಥಮ ವಾರ ಅಥವಾ ಎರಡನೇ ವಾರದಲ್ಲಿ ಭೂಮಿಗೆ ವಾಪಸಾಗುವ ಸಾಧ್ಯತೆಯಿದೆ ಎನ್ನಲಾಗುತ್ತಿದೆ. 8 ತಿಂಗಳು ಅಂತರಿಕ್ಷದಲ್ಲಿ ಕಳೆದ ಸುನೀತಾ ವಿಲಿಯಮ್ಸ್ ಇದೀಗ ಭೂಮಿಗೆ ವಾಪಸ್ ಬರ್ತಿದ್ದಾರೆ. ಆದರೆ ಗುರುತ್ವಾಕರ್ಷಣೆ ಅವರಿಗೆ ದೊಡ್ಡ ಸವಾಲಾಗಲಿದೆ .
ಸದ್ಯ ಸುನೀತಾ ISS (ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣ)ದಲ್ಲಿದ್ದಾರೆ. ಗುರುತ್ವಾಕರ್ಷಣೆ ಇಲ್ಲದೆ ಬಾಹ್ಯಾಕಾಶದಲ್ಲಿ ದೀರ್ಘಕಾಲ ಇದ್ದಿದ್ದರಿಂದ ಭೂಮಿಯ ಗುರುತ್ವಾಕರ್ಷಣೆಗೆ ಹೊಂದಿಕೊಳ್ಳುವುದು ಅವರಿಗೆ ದೊಡ್ಡ ಸವಾಲಾಗಲಿದೆ. ಹೀಗಾಗಿ ಅವರಿಗೆ ಪೆನ್ಸಿಲ್ ಎತ್ತುವುದೂ ಕೂಡ ಕಸರತ್ತಿನಂತೆ ಅನಿಸುತ್ತದೆ.
ಐಎಸ್ಎಸ್ನಲ್ಲಿ ದೀರ್ಘಾವಧಿ ಇದ್ದ ಗಗನಯಾತ್ರಿಗಳು ವಿವಿಧ ರೀತಿ ದೈಹಿಕ ಸಮಸ್ಯೆಗಳನ್ನು ಎದುರಿಸುತ್ತಾರೆ. ಅವುಗಳ ಪೈಕಿ ಸ್ನಾಯು ದೌರ್ಬಲ್ಯ, ಮೂಳೆ ಸಾಂದ್ರತೆಯ ಕುಸಿತ, ಶರೀರ ದ್ರವಗಳ ಅಸಮತೋಲನ ಮುಂತಾದವು ಸೇರಿಕೊಂಡಿವೆ. ಗುರುತ್ವಾಕರ್ಷಣೆಯೊಳಗೆ ಇಲ್ಲದ ಮೂಳೆಗಳ ಸಾಂದ್ರತೆ ದಿನಕಳೆದಂತೆ, ತಿಂಗಳು ಕಳೆದಂತೆ ಕಡಿಮೆಯಾಗುತ್ತದೆ. ಗಗನಯಾತ್ರಿಗಳು ಬಾಹ್ಯಾಕಾಶದಲ್ಲಿರುವಾಗ ಭೂಮಿಯ ಗುರುತ್ವಾಕರ್ಷಣೆಯ ವ್ಯಾಪ್ತಿಯಿಂದ ಹೊರಗಿರುತ್ತಾರೆ ಎಂಬುದನ್ನು ಇಲ್ಲಿ ನೆನಪಿಸಿಕೊಳ್ಳಬೇಕು.
ಗುರುತ್ವಾಕರ್ಷಣೆ ಕಡಿಮೆ ಇರುವುದರಿಂದ ಬಾಹ್ಯಾಕಾಶದಲ್ಲಿ ದೇಹದ ದ್ರವಗಳ ಹಂಚಿಕೆ ಬದಲಾಗುತ್ತದೆ. ಇದರಿಂದ ಅಂತರಿಕ್ಷಯಾತ್ರಿಗಳ ಮುಖ ಊದಿಕೊಳ್ಳುತ್ತದೆ. ಭೂಮಿಗೆ ಬಂದಾಗ ಈ ದ್ರವಗಳು ಸಾಮಾನ್ಯ ಸ್ಥಿತಿಗೆ ಬರುತ್ತವೆ. ಇದರಿಂದ ತಾತ್ಕಾಲಿಕ ತೊಂದರೆಯಾಗಬಹುದು.
ಗಗನಯಾತ್ರೆ ಮುಗಿಸಿ ಬಂದ ನಂತರದಲ್ಲಿ ಸುನಿತಾ ವಿಲಿಯಮ್ಸ್ ತಮ್ಮ ಶರೀರವನ್ನು ಭೂಮಿಯ ಪರಿಸ್ಥಿತಿಗೆ ಹೊಂದಿಸಿಕೊಳ್ಳಬೇಕು. ಇದಕ್ಕಾಗಿ, ಮತ್ತೆ ಕಟ್ಟುನಿಟ್ಟಾದ ಪುನರ್ವಸತಿ ಕಾರ್ಯಕ್ರಮಕ್ಕೆ ಒಳಗಾಗಬೇಕಾಗುತ್ತದೆ. ಬಾಹ್ಯಾಕಾಶದಲ್ಲಿರುವಾಗ ಶರೀರದ ದ್ರವಗಳು ಮುಖ, ತಲೆಯ ಭಾಗಕ್ಕೆ ಹೋಗುತ್ತದೆ. ಹೀಗಾಗಿ, ಕೈ, ಕಾಲು ತೆಳ್ಳಗಾಗುತ್ತವೆ. ಭೂಮಿಗೆ ಮರಳಿದ ಬಳಿಕ ಶರೀರ ಮತ್ತೆ ಸಹಜ ಸ್ಥಿತಿಗೆ ಬರಬೇಕಾದರೆ ಸ್ವಲ್ಪ ದಿನಗಳು ಬೇಕಾಗಬಹುದು.
